ນຳເຂົ້າລົດເພີ່ມຂື້ນ ລາຍຮັບງວດທຳອິດດ່ານຂົວມິດຕະພາບ I ທະລຸ 851 ຕື້ກວ່າກີບ

  ການຈັດເກັບລາຍຮັບໃນງວດ I ດ່ານພາສີສາກົນຂົວມິດຕະພາບ I ນະຄອນຫຼວງວຽງຈັນປະຕິບັດໄດ້ທັງໝົດ 851 ຕື້ກວ່າກີບເທົ່າກັບ 93,20% ຂອງແຜນການງວດ ຫຼືເທົ່າກັບ 23,30% ຂອງແຜນການປີ, ສາເຫດທີ່ພາໃຫ້ຈັດເກັບລາຍຮັບເພີ່ມຂຶ້ນຈາກງວດ I ປີ 2020 ແມ່ນໄດ້ຈາກການນໍາເຂົ້າສິນຄ້າປະເພດລາຍຮັບຕົ້ນ ຕໍເຊັ່ນ: ການນໍາເຂົ້າພາຫະນະເພີ່ມຂຶ້ນ 886 ຄັນເທົ່າກັບ 57,34% ຄິດເປັນເງິນຄ່າພາສີ-ອາກອນເທົ່າກັບ 135,24 ຕື້ກີບ.

  ຕາມຂໍ້ມູນຈາກກະຊວງການເງິນເປີດເຜີຍໃຫ້ຮູ້ວ່າ: ໃນວັນທີ 12 ເມສາ ຜ່ານມານີ້, ດ່ານພາສີສາກົນຂົວມິດຕະພາບ I, ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງງານວິຊາສະເພາະປະຈໍາງວດ I ປີ 2021 ແລະທິດທາງແຜນການງວດ II ປີ 2021, ໂດຍການເຂົ້າຮ່ວມເປັນປະທານຂອງ ທ່ານ ວົງຄໍາແຫງ ວົງທະຈັກ ຮອງຫົວໜ້າກົມພາສີກະຊວງການເງິນ, ທ່ານ ຄໍາພອນ ເທບພະວົງ ຫົວໜ້າຄະນະຄຸ້ມຄອງດ່ານສາກົນຂົວມິດຕະພາບ I, ທ່ານ ທອງພັດ ລາດຊະວົງ ຫົວໜ້າກອງຄຸ້ມຄອງພາສີ v, ຫົວໜ້າດ່ານພາສີສາກົນຂົວມິດຕະພາບ I, ຄະນະດ່ານ, ຫົວໜ້າຂະແໜງ, ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ.

 ໂອກາດນີ້, ທ່ານ ບຸນແອງ ພັນທະວົງ ຫົວໜ້າດ່ານພາສີສາກົນຂົວມິດຕະພາບ I ໄດ້ລາຍງານໃຫ້ສະພາບການເຄື່ອນໄຫວ ແລະຈັດຕັ້ງປະຕິບັດວຽກງານວິຊາສະເພາະປະຈໍາງວດ I ປີ 2021 ແລະທິດທາງແຜນການງວດ II ປີ 2021, ຊຶ່ງຜ່ານການຈັດຕັ້ງປະຕິບັດແຜນການ ແລະມາດຕະການຕ່າງໆໃນການເຄື່ອນໄຫວວຽກງານແຕ່ລະດ້ານງວດ I ປີ 2021 ຂອງດ່ານພາສີສາກົນຂົວມິດຕະພາບ I ໂດຍພື້ນຖານວຽກງານວິຊາສະເພາະໄດ້ປັບປຸງແກ້ໄຂຫຼາຍດ້ານ, ການບໍລິການພາຍໃນດ່ານມີຄວາມສະດວກວ່ອງໄວຂຶ້ນຮັບປະກັນໄດ້ດ້ານກົດໝາຍ ແລະ ລະບຽບການ, ການນໍາເຂົ້າ-ສົ່ງອອກສິນຄ້າ, ເຄື່ອງຂອງເຫັນວ່າບາງລາຍການຫຼຸດລົງ, ບາງລາຍການ ເພີ່ມຂຶ້ນຖ້າທຽບໃສ່ໄລຍະດຽວກັນ, ລາຍຮັບສ່ວນຫຼາຍແມ່ນການນໍາເຂົ້າພາຫະນະຊຶ່ງກວມເອົາ 43,56% ແລະ ການນໍາເຂົ້ານໍ້າມັນເຊື້ອໄຟກວມເອົາ 23,85% ຂອງລາຍຮັບທົ່ວດ່ານ.

  ສະເພາະການຈັດເກັບລາຍຮັບໃນງວດ I ດ່ານພາສີສາກົນຂົວມິດຕະພາບ I ສາມາດປະຕິບັດລາຍຮັບໄດ້ທັງໝົດ 851 ຕື້ກວ່າກີບ ເທົ່າກັບ 93,20% ຂອງແຜນ ການງວດ ຫຼືເທົ່າກັບ 23,30% ຂອງແຜນການ ປີ, ສາເຫດທີ່ພາໃຫ້ຈັດເກັບລາຍຮັບເພີ່ມຂຶ້ນຈາກງວດ I ປີ 2020 ໄດ້ຈາກການນໍາເຂົ້າສິນຄ້າປະເພດລາຍຮັບຕົ້ນຕໍເຊັ່ນ: ການນໍາເຂົ້າພາຫະນະເພີ່ມຂຶ້ນ 886 ຄັນເທົ່າກັບ 57,34% ຄິດເປັນເງິນຄ່າພາສີ-ອາກອນ ເທົ່າກັບ 135,24 ຕື້ກີບ, ທ່າອ່ຽງເສດຖະກິດປີນີ້ດີຂຶ້ນ, ກໍາລັງຊື້ຢູ່ຕະຫຼາດພາຍໃນມີຄວາມຕ້ອງການຫຼາຍຂຶ້ນ,ການນໍາເຂົ້າສິນຄ້າອຸປະໂພກບໍລິໂພກເພີ່ມຂຶ້ນຄິດເປັນເງິນຄ່າພາສີ-ອາກອນເທົ່າກັບ 29,32 ຕື້ກີບ ທັງນີ້, ຍ້ອນການບໍລິໂພກພາຍໃນມີຄວາມຕ້ອງການເພີ່ມຂຶ້ນ, ການນໍາເຂົ້າໃນນາມບໍລິສັດນໍາສິນຄ້າເຂົ້າເສຍພາສີຖືກຕ້ອງເພີ່ມຂຶ້ນເງິນຄັງແຮນໍ້າມັນເຊື້ອໄຟເພີ່ມຂຶ້ນ ແລະ ບັນຫາອື່ນໆ.

 ໂອກາດັ່ງກ່າວ, ທ່ານ ວົງຄໍາແຫງ ວົງທະຈັກ ໄດ້ໃຫ້ກຽດໂອ້ລົມ ແລະມີຄໍາເຫັນເພື່ອເປັນທິດທາງໃນການຈັດຕັ້ງປະຕິບັດວຽກງານໃນຕໍ່ໜ້າໂດຍໄດ້ເນັ້ນຫຼາຍບັນຫາໃນທາງວິຊາການລົງເລິກແຕ່ລະວຽກງານຕ່າງໆໃຫ້ມີການປັບປຸງແກ້ໄຂເປັນຕົ້ນ: ການປັບປຸງກົນໄກການຄຸ້ມຄອງໃຫ້ມີປະສິດທິພາບປະສິດທິຜົນ, ອໍານວຍຄວາມສະດວກໃຫ້ຫັນເປັນທົນສະໄໝທັງຍົກໃຫ້ເຫັນສະພາບ, ການຈັດຕັ້ງປະຕິບັດວຽກງານຂອງກະຊວງການເງິນກໍຄືຂອງກົມພາສີໃຫ້ເຫັນເຖິງການປັບປຸງການຈັດຕັ້ງ, ພາລະບົດ ບາດ, ພ້ອມທັງເນັ້ນໃຫ້ປະຕິບັດຕາມລະບຽບກົດໝາຍພາສີຢ່າງເຂັ້ມງວດ. ທັງນີ້, ກໍເພື່ອໃຫ້ການຈັດຕັ້ງປະຕິບັດວຽກງານໃຫ້ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ແລະໄດ້ຮັບຜົນສໍາເລັດເປັນກ້າວໆ.

  ໃນກອງປະຊຸມດັ່ງກ່າວຍັງໄດ້ປະກາດພະນັກງານ-ລັດຖະກອນພັກການອຸດໜູນບໍານານໂດຍປະຕິບັດຕາມຂໍ້ຕົກລົງຂອງກະຊວງການເງິນສະບັບເລກທີ 3207/ ກງ  ລົງວັນທີ 1 ທັນວາ 2020 ວ່າດ້ວຍການອະນຸມັດໃຫ້ພະນັກງານລັດຖະກອນພັກການອຸດໜູນບໍານານເຫັນດີໃຫ້ທ່ານ ນາງ ພູແກ້ວ ສຸລິຍະ ພະນັກງານວິຊາການກອງຄຸ້ມຄອງພາສີ V ກົມພາສີກະຊວງການເງິນພັກການຮັບອຸດໜູນບໍານານ ນັບແຕ່ງວດ I (1, 2,3) ປີ 2021 ຂຶ້ນໄປ.

แชร์