ເຈົ້າແຂວງບໍລິຄຳໄຊ ລົງຕິດຕາມສູນກັກກັນບໍລິຄັນ

ຂ່າວ: ສາຍສະໝອນ  

  ວັນທີ 17 ເມສາຜ່ານມານີ້ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມດ້ວຍຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຂັ້ນແຂວງໄດ້ລົງຕິດຕາມ ແລະໃຫ້ກຳລັງໃຈຕໍ່ຜູ້ທີ່ມາກັກຕົວເພື່ອກວດຫາເຊື້ອພະຍາດໂຄວິດ-19 ຢູ່ສູນກັກກັນເມືອງບໍລິຄັນ, ໂດຍມີທ່ານ ວັນເລີນ ປຸ້ຍໄມນີເຈົ້າເມືອງບໍລິຄັນຮ່ວມນຳພາທາງ.

 ໃນສູນກັກຕົວດັ່ງກ່າວນີ້ເຫັນວ່າຜົນກວດຕົວຢ່າງໃນວັນທີ 16 ເມສາ ພົບຜູ້ຕິດເຊື້ອເປັນບວກຈຳນວນ 1 ຄົນ ເພດຍິງ,ອາຍຸ 25 ປີປະຊາຊົນຢູ່ບ້ານໂພນມຸງຄຸນ ເມືອງບໍລິຄັນຊຶ່ງປະຫວັດການເດີນທາງຂອງຜູ້ກ່ຽວແມ່ນໄດ້ກັບມາແຕ່ປະເທດໄທເພື່ອມາຢາມພໍ່ແມ່ໃນໄລຍະປີໃໝ່ລາວ, ຊຶ່ງມາແບບບໍ່ຖືກຕ້ອງໂດຍຂີ່ເຮືອນ້ອຍຂາມນໍ້າຂອງຢູ່ເຂດເມືອງປາກກະດິງ ແລະມາຮອດເມືອງບໍລິຄັນເວລາປະມານ 9 ໂມງຂອງວັນທີ 14 ເມສາ ຈາກນັ້ນຜູ້ເປັນພໍ່ກໍໄດ້ປະສານກັບຄະນະສະເພາະກິດຂັ້ນເມືອງ ແລ້ວເອົາຜູ້ກ່ຽວໄປກັກຕົວຢູ່ສູນກັກກັນແຍກປ່ຽວເພື່ອຕິດຕາມອາການ, ຈາກນັ້ນວັນທີ 15 ເມສາ ຄະນະສະເພາະກິດໄດ້ເກັບຕົວຢ່າງໄປກວດ ແລະ ມາຮອດວັນທີ 16 ເມສາ ຜົນກວດໄດ້ຢັ້ງຢືນຈາກກະຊວງສາທາລະນະສຸກເຫັນວ່າຜູ້ກ່ຽວມີເຊື້ອເປັນບວກ (ມີເຊື້ອພະຍາດໂຄວິດ-19). ປະຈຸບັນຄະນະສະເພາະກິດໄດ້ເອົາຜູ້ກ່ຽວມາປິ່ນປົວຢູ່ສູນຫຼັກ 6 ເມືອງປາກຊັນ ແລະຄະນະທີມແພດໝໍກໍໄດ້ເອົາໃຈໃສ່ກວດເຊັກສຸຂະພາບຮ່າງກາຍເຫັນວ່າຜູ້ກ່ຽວມີສຸຂະພາບແຂງແຮງສາມາດກິນອາຫານ ແລະກິນຢາໄດ້ເປັນປົກກະຕິ; ສໍາລັບ 13 ຄົນຢູ່ໃນກຸ່ມສ່ຽງທີ່ໄດ້ພົວພັນກັບພໍ່ຂອງຜູ້ກ່ຽວປະຈຸບັນແມ່ນໄດ້ເຂົ້າແຍກປ່ຽວຢູ່ສູນກັກກັນເມືອງບໍລິຄັນເພື່ອຕິດຕາມອາການ.

  ຕໍ່ກັບສະພາບການດັ່ງກ່າວນີ້ທ່ານເຈົ້າແຂວງໄດ້ເນັ້ນໃຫ້ຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຂັ້ນແຂວງ-ຂັ້ນເມືອງເພີ່ມທະວີເອົາໃຈໃສ່ປະຕິບັດຄຳແນະນຳຄະນະສະເພາະກິດຂັ້ນສູນກາງ,ຄຳແນະນຳຄະນະເພາະກິດຂັ້ນ ແຂວງວ່າດ້ວຍການເພີ່ມທະວີເອົາໃຈໃສ່ໃນການປະຕິບັດມາດຕະການສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຢ່າງເຂັ້ມງວດ, ໂຄສະນາປະຊາສຳພັນຜົນຮ້າຍຂອງພະຍາດໂຄວິດ-19 ໃຫ້ປະຊາຊົນໄດ້ຮັບຮູ້ ແລະເຂົ້າໃຈຢ່າງກວ້າງຂວາງທົ່ວເຖິງ, ເປັນການເຂົ້າສູ່ສະໜາມຮົບຕີກັບສັດຕູອັນຕະລາຍຮ້າຍກາດບໍ່ມີຕົວຕົນບໍ່ຮູ້ຢູ່ບ່ອນໃດແຕ່ມີອິດທິພົນທຳລາຍໂລກ.

แชร์