ລັດມອບລາງວັນທຸລະກິດມອບອາກອນດີເດັ່ນ

 ເພື່ອເປັນການຍ້ອງຍໍຊົມເຊີຍບັນດາຫົວໜ່ວຍທຸລະກິດຕ່າງໆທີ່ມີຜົນງານດີເດັ່ນໃນການປະຕິບັດພັນທະອາກອນປະຈໍາປີ 2020, ໃນວັນທີ 19 ເມສາ 2021 ທີ່ກົມສ່ວຍສາອາກອນ, ລັດຖະບານກໍຄືກະຊວງການເງິນໄດ້ມອບລາງວັນ ແລະ ໃບຍ້ອງຍໍທີ່ລະນຶກປະເພດ I, ປະເພດ II, ໂດຍຕາງໜ້າມອບລາງວັນປະເພດ I ຂອງທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ແລະມອບໃບຍ້ອງຍໍປະເພດ II ຂອງທ່ານ ປອ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນກະຊວງການເງິນ, ມີບັນດາຜູ້ອໍານວຍການ, ຮອງອໍານວຍການ ແລະຕາງໜ້າຫົວໜ່ວຍທຸລະກິດເຂົ້າຮ່ວມ.

 ທ່ານ ທໍາມະລົດ ຣາຊະພົນ ຮອງຫົວໜ້າກົມສ່ວຍສາອາກອນໃຫ້ຮູ້ວ່າ: ການມອບລາງວັນ ແລະໃບຍ້ອງຍໍໃຫ້ແກ່ຫົວໜ່ວຍທຸລະກິດຜູ້ມີຜົນງານດີເດັ່ນໃນການປະຕິບັດພັນທະສ່ວຍສາອາກອນປະຈໍາປີ 2020, ຊຶ່ງເປັນການປະກອບສ່ວນໃນການພັດທະນາສ້າງສາພັດທະນາປະເທດຊາດ,ທັງເປັນການປະຕິບັດຕາມກົດໝາຍຢ່າງຖືກຕ້ອງແລະໃຫ້ການຮ່ວມມືເປັນຢ່າງດີຂອງຫົວໜ່ວຍທຸລະກິດ, ກົມສ່ວຍສາອາກອນກະຊວງການເງິນ, ໄດ້ໃຫ້ຄວາມສໍາຄັນ ແລະຕີລາຄາສູງຕໍ່ການປະຕິບັດພັນທະຂອງບັນດາ ຫົວໜ່ວຍທຸລະກິດທັງໝົດປະຈຸບັນມີປະມານ 1,3 ແສນຫົວໜ່ວຍເວົ້າ ສະເພາະບັນດາຫົວໜ່ວຍທຸລະກິດບໍລິສັດແລະຜູ້ປະກອບການທີ່ຂຶ້ນກັບການຄຸ້ມຄອງຂອງກົມສ່ວຍສາອາກອນມີປະມານ 460 ຫົວໜ່ວຍ ຂະໜາດໃຫຍ່, ແຕ່ການມອບເງິນເຂົ້າງົບປະມານແມ່ນກວມອັດຕາສ່ວນໃຫຍ່ຂອງລາຍຮັບສ່ວຍສາອາກອນ, ການປະກອບສ່ວນພັນທະດັ່ງກ່າວໄດ້ກາຍມາເປັນການປະກອບສ່ວນທາງດ້ານງົບປະມານໃຫ້ພາກລັດຢ່າງຕັ້ງໜ້າໃນການພັດທະນາເສດຖະກິດ-ສັງຄົມ ຂອງປະເທດຊາດເຮັດໃຫ້ເສດຖະກິດຂອງປະເທດມີການຂະຫຍາຍຕົວຢ່າງຕໍ່ເນື່ອງໃນຊຸມປີຜ່ານມາ.

  ສະເພາະສົກງົບປະມານປີ 2020 ສະພາບເສດຖະກິດຂອງໂລກ ແລະພາກພື້ນໄດ້ຮັບຜົນກະທົບຢ່າງໜັກໜ່ວງຕໍ່ກັບການລະບາດຂອງເຊື້ອພະຍາດໂຄວິດ-19, ສຳ ລັບ ສປປ ລາວ ກໍໄດ້ຮັບຜົນກະທົບໃນທຸກຂົງເຂດພາກສ່ວນເສດຖະກິດຫຼາຍພາກສ່ວນທຸລະກິດໄດ້ມີການປະຄັບປະຄອງມີການປັບຕົວ, ພ້ອມທັງຫັນເປັນໂອກາດ ແລະ ຫຼາຍພາກສ່ວນກໍສາມາດດໍາເນີນຕໍ່ໄປໄດ້ຕໍ່ກັບຜົນກະທົບດັ່ງກ່າວນີ້, ກະຊວງການເງິນໄດ້ນໍາສະເໜີນະໂຍບາຍຕໍ່ລັດຖະບານ, ເພື່ອຊ່ວຍຫຼຸດຜ່ອນຜົນກະທົບເຖິງວ່າມີ ຄວາມຫຍຸ້ງຍາກບັນດາຫົວໜ່ວຍທຸລະກິດຜ່ານຜ່າວິກິດຜົນກະທົບການສືບຕໍ່ດໍາເນີນທຸລະກິດທີ່ມີຜົນກໍາໄລຢ່າງຕໍ່ເນື່ອງ ແລະ ໄດ້ມີຄວາມຈິງໃຈປະຕິບັດລະບຽບກົດ ໝາຍ ແລະມອບພັນທະເຂົ້າງົບປະມານຢ່າງຖືກຕ້ອງ ແລະຄົບຖ້ວນ.

 ສໍາລັບການຄົ້ນຄວ້າເພື່ອມອບລາງວັນ ແລະໃບຍ້ອງຍໍທີ່ລະນຶກໄດ້ກໍານົດເອົາ 4 ເງື່ອນໄຂພື້ນຖານຄື: ມີການແຈ້ງ-ມອບປົກກະຕິການຍືນເອກະສານລາຍງານການເງິນທ່ວງທັນຕາມກໍານົດເວລາທີ່ກໍານົດໄວ້, ບໍ່ມີໜ້າຄ້າງໃນລະບົບ ແລະຈາກການກວດກາໄລ່ລຽງ ແລະບໍ່ມີການປັບໄໝຊັກຊ້າ ແລະ ມອບລາຍຮັບຫຼາຍກວ່າ 20 ຕື້ ຂຶ້ນໄປ, ຊຶ່ງບໍລິສັດໃດປະຕິບັດໄດ້ຄົບ 4 ເງື່ອນໄຂແມ່ນໃຫ້ປະເພດ 1 ແລະຖ້າຫາກບໍລິສັດປະຕິບັດບໍ່ຄົບຕາມ 4 ເງື່ອນໄຂແຕ່ບໍ່ໃຫ້ຫຼຸດ 3 ເງື່ອນໄຂ ແລະມອບພັນທະຫຼາຍ ກວ່າ 1 ຕື້ຫາ 19 ຕື້ກີບແມ່ນຈັດຢູ່ໃນປະເພດ 2, ສຳລັບຊຸດນີ້ມອບລາງວັນປະເພດ I ຈຳນວນ 52 ຫົວ ໜ່ວຍ, ປະເພດ II ຈຳນວນ 88 ຫົວໜ່ວຍ.

แชร์