ຊາວລາວສະຫຼອງບຸນປີໃໝ່ຕາມຮີດຄອງ ພ້ອມເຄັ່ງຄັດກັນໂຄວິດ

 ບຸນປີໃໝ່ລາວປີນີ້ນັບເປັນປີທີ 2 ທີ່ປະສົບບັນຫາການລະບາດຂອງພະຍາດລະບາດໂຄວິດ-19 ແຕ່ຢ່າງໃດກໍ່ຕາມພາຍໃຕ້ການປະຕິບັດມາດຕະການຕ່າງໆຂອງຂັ້ນເທິງວາງອອກໃຫ້ເຂັ້ມງວດນັ້ນຄົນລາວຊາວພຸດທົ່ວປະເທດທັງຫຼາຍກໍ່ໄດ້ຕື່ນຕົວປະຕິບັດຕາມມາດຕະການເປັນຕົ້ນແມ່ນໄດ້ຮັກສາໄລຍະຫ່າງຫຼີກເວັ້ນການຊຸມນຸມແອອັດຂອງຄົນຈຳນວນຫຼາຍ, ສົງນໍ້າພຣະດ້ວຍຄວາມເປັນລະບຽບຮຽບຮ້ອຍຖືກຮີດຄອງປະເພນີອັນດີງາມຂອງຊາວລາວເຮົາ.

  ສຳລັບແຂວງຫຼວງພະບາງກິດຈະກໍາຫຼິ້ນບຸນປີໃໝ່ລາວ ພສ 2564 ທີ່ນະຄອນຫຼວງພະບາງບາງກິດຈະກໍາແມ່ນໄດ້ໂຈະເໝືອນກັນກັບແຂວງອື່ນໆເປັນຕົ້ນແມ່ນງານໂລະລາດມວນຊົນ, ການປະກວດນາງສັງຂານ, ແໜ່າງສັງຂານຊຶ່ງເປັນງານທີ່ຜູ້ຄົນເຕົ້າໂຮມແອອັດກັນຢ່າງຫຼວງຫຼາຍພ້ອມນັ້ນຍັງໄດ້ກໍານົດຈໍານວນພົນຜູ້ເຂົ້າຮ່ວມຂະ ບວນການຂອງງານຕື່ມອີກ.

  ທ່ານ ວຽງທອງ ຫັດສະຈັນ ເຈົ້ານະຄອນຫຼວງພະບາງໃຫ້ສໍາພາດວ່າ: ສໍາລັບປີຜ່ານມາແມ່ນບໍ່ໄດ້ມີການຈັດງານສະຫຼອງບຸນປີໃໝ່ລາວເນື່ອງຈາກເກີດການລະບາດໂຄວິດ-19 ແລະປີ 2021ນີ້ກໍເຊັ່ນດຽວກັນກັບພໍ່ແມ່ປະຊາຊົນລາວໃນຂອບເຂດທົ່ວປະເທດທີ່ຈັດຂຶ້ນບົນປະຕິບັດການປ້ອງກັນໂຄວິດຢ່າງເຄັ່ງຂັດ ແລະມ່ວນຊື່ນ,ປະຢັດ, ປອດໄພ.

  ສະຫຼອງບຸນປີໃໝ່ລາວຢູ່ນະຄອນຫຼວງພະບາງແມ່ນໄດ້ເລີ່ມຕົ້ນແຕ່ວັນທີ 10 ເມສາ 2021 ຖືເປັນກິດຈະກໍາທໍາອິດຄືງານແຂ່ງຂັນເຮືອແຈສກີທີ່ແມ່ນໍ້າຂອງ (ເຂດດອນຊາຍມຸງຄຸນ) ແລະໃນຕອນເຊົ້າເວລາ 7:30 ໂມງ ຂອງວັນທີ 13 ເມສາ ນີ້ແມ່ນໄດ້ມີພິທີແຫ່ຊ້າງຮຽງເກີຍຈາກວັດໃໝ່ສຸວັນນະພູມາຣາມຫາວັດຊຽງທອງ, ເວລາ 9:00 ໂມງ ເປັນພິທີເປີດຂະບວນການສົ່ງເສີມການທ່ອງທ່ຽວທາງນໍ້າ (ທ່ອງທ່ຽວຫຼວງພະບາງຊົມທໍາມະຊາດບັນຍາກາດສອງຝັ່ງຂອງ), ວັນທີ 14 ເມສາ ເປັນມື້ສັງຂານ ລ່ວງ ເວລາ 9:00 ໂມງ ພິທີອາລາດທະນາ ອັ່ງເຊີນພຣະພຸດທະຮູບລົງຫົດສົງຕາມວັດ ຕ່າງໆພາຍໃນນະຄອນຫຼວງພະບາງ, ເວລາ 13:00 ໂມງ ການນໍາພັກ-ລັດ ແລະປະ ຊາຊົນບັນດາເຜົ່າລົງຕົບພຣະທາດຊາຍ ປາກນໍ້າຄານ(ທ່ານໍ້າວັດຊຽງທອງ) ໄຫວ້ພຣະເທດສະຫຼອງຕາມຮີດຄອງປະເພນີ, ວັນທີ 15 ເມສາ ມື້ສັງຂານເນົາໃນເວລາ 14:00 ໂມງແມ່ນຂະບວນແຫ່ຫວໍ່ (ແຫ່ພຣະສົງ) ປະເພນີແບບດັ້ງເດີມທີ່ເຄີຍປະຕິບັດກັນມາແຕ່ບູຮານນະການແຫ່ໄປຕາມເສັ້ນທາງຖະໜົນສີສະຫວ່າງວົງແຕ່ວັດທາດນ້ອຍຫາວັດຊຽງທອງປະກອບມີ 16 ຂະບວນ, ລວມ 200 ກວ່າຄົນ, ຕອນຄໍາວັນດຽວກັນ 19:00 ໂມງສົງນໍ້າພະເພື່ອເປັນສິລິມຸງຄຸນຕາມວັດຕ່າງໆພາຍໃນນະຄອນຫຼວງພະບາງ, ວັນທີ 16 ເມສາ

  ມື້ສັງຂານຂຶ້ນປີໃໝ່ປ່ຽນ ຈ.ສ 1383 ໃນຕອນເຊົ້າ ເວລາ 5:30 ໂມງການນໍາພັກ-ລັດ, ປະຊາຊົນບັນດາເຜົ່າຮ່ວມກັນໃສ່ບາດຢູ່ໜ້າວັດແສນສຸຂາຣາມ ແລະຂຶ້ນໄປບູ ຊາພະທາດຈອມສີ (ພຣະທາດສັກ ສິດມິ່ງບ້ານຂວັນເມືອງຂອງຊາວ ຫຼວງພະບາງເພື່ອເປັນສິຣິມຸງຄຸນ), ເວລາ14:00ໂມງ ແຫ່ຫວໍ່ (ແຫ່ພຣະສົງ) ປະເພນີແບບດັ້ງເດີມທີ່ເຄີຍປະຕິບັດກັນມາແຕ່ບູຮານນະການແຫ່ກັບໄປຕາມເສັ້ນທາງຖະໜົນສີສະຫວ່າງວົງ ແຕ່ວັດຊຽງທອງຫາວັດທາດນ້ອຍແລະເວລາ 19:00 ໂມງ ພິທີແຫ່ຮູບຈໍາລອງພະຍານາກ, ໂຄມໄພແຕ່ພະທາດຈອມສີລົງມາເຂົ້າສູ່ໜອງໃນຫໍພິພິດຕະພັນ (ພະລາດຊະວັງເກົ່າ) ແລະຕອນເຊົ້າຂອງ ວັນທີ 17 ເມສາ ເວລາ 8:30 ໂມງ ພິທີອາລາດທະນາອັງເຊີນພະບາງຈາກຫໍພະບາງລົງປະດິດສະຖານໄວ້ວັດໃໝ່ສຸວັນນະພູມມາຣາມ ແລະ ຈັດພິທີຫົດສົງຕາມປະເພນີຈົນຮອດວັນທີ 19 ເມສາເວລາ 9:00 ໂມງ ແມ່ນໄດ້ຈັດພິທີອາລາດທະນາອັງເຊີນພຣະບາງຈາກວັດໃໝ່ສຸວັນນະພູມມາຣາມກັບຄືນປະດິດສະຖານຂຶ້ນສູ່ຫໍພຣະບາງ.

  ວັນທີ 20 ເມສາ ເວລາ 9:00 ໂມງ ແມ່ນພິທີອາລາດທະນາອັງເຊີນພະມ່ານລົງຫົດສົງທີ່ວັດຊຽງທອງ ຈົນຮອດວັນທີ 25 ເມສາ 20 21, ເວລາ 15:00 ໂມງ ພິທີອາລາດທະນາອັງເຊີນພະມ່ານກັບຄືນສູ່ຫໍທີ່ປະທັບເປັນອັນວ່າຈົບລາຍການສະຫຼອງປີໃໝ່ລາວ ພສ 2564 ນີ້.

แชร์