5 ປີ ເຊກອງມີຄະດີ 400 ກວ່າເລື່ອງ.

  ຄະນະພັກ-ຄະນະນໍາສານປະຊາຊົນແຂວງເຊກອງໄດ້ເອົາໃຈນໍາພາ-ຊີ້ນໍາ, ຕິດຕາມກວດກາການຕັດສິນຄະດີຕາມຂະບວນການຍຸຕິທໍາເພື່ອຮັບປະກັນແກ່ການດໍາເນີນຄະດີມີຄວາມໂປ່ງໃສ ແລະຖືກຕ້ອງຕາມຂັ້ນຕອນຂອງກົດໝາຍໂດຍໃນ 5 ປີຜ່ານມາ ມີຄະດີເຂົ້າສານທັງໝົດ 400 ກວ່າເລື່ອງ.

  ຕາມການລາຍງານຂອງທ່ານ ສົມຈິດ ວໍລະວົງ ປະທານສານປະຊາຊົນແຂວງເຊກອງຕໍ່ກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງຊຸດທີ II ເມື່ອວັນທີ 8 ເມສານີ້ວ່າ: ບົນພື້ນຖານລັດຖະທໍາມະນູນ, ກົດໝາຍວ່າດ້ວຍສານປະຊາຊົນ ແລະກົດໝາຍວ່າດ້ວຍຜູ້ພິພາກສາເຊິ່ງຜ່ານມາຄະນະນໍາສານປະຊາຊົນແຂວງ ແລະສານປະຊາຊົນເຂດໄດ້ເອົາໃຈໃສ່ຊຸກຍູ້ໃຫ້ຜູ້ພິພາກສາ, ຜູ້ຊ່ວຍຜູ້ພິພາກສາ, ຈ່າສານ ແລະພະນັກງານວິຊາການຄົ້ນຄວ້າ ແລະແກ້ໄຂຄະດີດ້ວຍຄວາມຮັບຜິດຊອບສູງ, ຮັບປະກັນການດໍາເນີນຄະດີໃຫ້ຄົບຖ້ວນ, ຮອບດ້ານ, ພາວະວິໃສ ແລະຖືກຕ້ອງຕາມຂັ້ນຕອນກົດໝາຍກໍານົດໄວ້, ຮັບປະກັນຄວາມໂປ່ງໃສ ແລະຍຸຕິທໍາແກ່ສັງຄົມ.

  ໃນໄລຍະ 5 ປີ (20216-2020) ມີຄະດີເຂົ້າສານຢູ່ແຂວງເຊກອງທັງໝົດ 402 ເລື່ອງ, ແກ້ໄຂສໍາເລັດແລ້ວ 370 ເລື່ອງເທົ່າກັບ 92,04% ໃນນັ້ນມີຄະດີ ເຂົ້າມາສານປະຊາຊົນແຂວງມີ 281 ເລື່ອງ, ແກ້ໄຂແລ້ວ 265 ເລື່ອງ ເທົ່າກັບ 94% ແລະຄະດີເຂົ້າມາສານປະຊາ ຊົນເຂດ 1 ມີ 121 ເລື່ອງ, ແກ້ໄຂແລ້ວ 105 ເລື່ອງເທົ່າກັບ 86,7%.

  ທ່ານ ສົມຈິດ ວໍລະວົງ ໃຫ້ຮູ້ຕື່ມວ່າ: ສໍາລັບທິດທາງລວມ, ຄາດໝາຍ ແລະແຜນພັດທະນາວຽກງານສານປະຊາຊົນແຂວງໃນ 5 ປີ (2021-2025) ເພີ່ມທະວີການສຶກສາອົບຮົມການເມືອງແນວຄິດໃຫ້ພະນັກງານ, ສະມາຊິກພັກສານປະຊາຊົນມີຄວາມເຊື່ອໝັ້ນຕໍ່ການນໍາພາຂອງພັກ; ປັບປຸງລະບົບກົງຈັກການຈັດຕັ້ງຂອງສານປະຊາຊົນໃຫ້ມີຄວາມໜັກແໜ້ນ ແລະເຂັ້ມແຂງໂດຍສະເພາະແມ່ນການຂະຫຍາຍສ້າງຕັ້ງສານປະຊາຊົນເຂດ II ຢູ່ສອງເມືອງພູດອຍເພື່ອເຮັດໃຫ້ປະຊາຊົນຍັບເຂົ້າໃກ້ສູ່ຂະບວນການຍຸຕິທໍາເທື່ອລະກ້າວ; ບໍາລຸງສ້າງຜູ້ພິພາກສາ,ຜູ້ຊ່ວຍຜູ້ພິພາກສາ, ຈ່າສານ ແລະພະນັກງານວິຊາການໃຫ້ມີຄວາມຮູ້ຄວາມສູງຂຶ້ນ; ພັດທະນາແບບແຜນວິທີເຮັດວຽກ, ກົນໄກການຄຸ້ມຄອງບໍລິຫານຄະດີ ແລະເອົາໃຈໃສ່ຕັດສິນຄະດີໃຫ້ວ່ອງໄວ, ໂປ່ງໃສ່, ຖືກຕ້ອງ ແລະຍຸຕິທໍາ.

ຂ່າວ: ສັນຍາ

แชร์