ພິທີມອບ-​ຮັບ​ນາມມະຍົດໜ່ວຍພັກໜ່ວຍພັກປອດໃສເຂັ້ມແຂງໜັກແໜ້ນ ປະຈຳປີ 2020 ຂອງພະແນກ ອຸດສາຫະກໍາ ແລະການຄ້າແຂວງໄດ້​ຈັດຂຶ້ນໃນວັນ​ທີ 12 ເມສາ 2021ນີ້ ​ທີ່​ຫ້ອງ​ປະຊຸມ​ຂອງພະແນກດັ່ງກ່າວໂດຍ​ການ​ເປັນ​ປະທານຮ່ວມ​ຂອງ ສະຫາຍ ປອ ຄໍາຄ່ອງ ພົມມະປັນຍາ ຄະນະປະຈໍາພັກແຂວງຫົວໜ້າຄະນະຈັດ ຕັ້ງແຂວງ, ມີ​ສະຫາຍ ບຸນສົມ ຄຸນມະນີ ເລຂາໜ່ວຍພັກພະແນກ ອຄ ແຂວງຫຼວງພະບາງ, ມີແຂກ​ຖືກ​ເຊີນ​ຈາກຄະນະພັກຮາກຖານ ແລະ ໜ່ວຍພັກ​ອ້ອມ​ຂ້າງ​ພະ ແນກການອ້ອມຂ້າງແຂວງຕະຫຼອດຮອດ​ສະມາຊິກ​ພັກ​ພາຍ​ໃນໜ່ວຍພັກ​ເຂົ້າ​ຮ່ວມ.

 

  ສະຫາຍ ສົມສັກ ບຸນມາເພັດ ຮອງເລຂາໜ່ວຍພັກພະແນກ ອຄ ແຂວງຫຼວງພະບາງໄດ້​ຂຶ້ນ​ຜ່ານ​ບົດ​ສະຫຼຸບການຊີ້ນຳໆພາຂອງໜ່ວຍພັກ​ໃນໜຶ່ງປີຜ່ານມາໄດ້ຍົກ​ໃຫ້​ເຫັນ​ຜົນສຳ​ເລັດດ້ານ​ດີ, ດ້ານ​ອ່ອນ ​ແລະຂໍ້ຄົງຄ້າງທີ່ຈະ​ພ້ອມ​ກັນ​ແກ້​ໄຂ. ໜ່ວຍພັກພະແນກອຸດສາຫະກຳ ແລະການຄ້າແຂວງເປັນໜ່ວຍພັກເອກະລາດຂື້ນກັບຄະນະບໍລິຫານງານພັກແຂວງຫຼວງພະບາງທາງດ້ານການເມືອງ ແລະການຈັດຕັ້ງ, ມີພາລະບົດບາດເປັນເສນາທິການໃຫ້ແກ່ຄະນະບໍລິຫານງານພັກແຂວງ ແລະ ຄະນະພັກກະຊວງອຸດສາຫະກຳ ແລະ ການຄ້າມີພາລະບົດບາດ, ສິດ ແລະໜ້າທີ່ໃນການຊີ້ນຳ-ນຳພາການຈັດຕັ້ງປະຕິບັດວຽກງານວິຊາສະເພາະຂອງຫ້ອງການອຸດສາຫະກຳ ແລະການຄ້າ 11 ເມືອງ ແລະ 1 ນະຄອນ.

 

  ໜ່ວຍພັກພະແນກອຸດສາຫະກຳ ແລະການຄ້າແຂວງຫຼວງພະບາງ ໄດ້ແບ່ງອອກເປັນ 3 ຈຸໜ່ວຍພັກເພື່ອຈັດຕັ້ງ ແລະເຄື່ອນໄຫວການດຳເນີນຊີວິດການເມືອງຂອງໜ່ວຍພັກ. ມິຄະນະໜ່ວຍພັກ 5 ສະຫາຍ, ຍິງ 1 ສະຫາຍ; ມີສະມາຊິກພັກທັງໝົດ 40 ສະຫາຍ, ຍິງ 12 ສະຫາຍ.

  ໜຶ່ງປີຜ່ານມາ​ໜ່ວຍ​ພັກ​​ໄດ້​ສຸມ​ໃສ່​ຈັດ​ຕັ້ງ​ປະຕິບັດ​ວຽກງານ​ຂອງ​ຕົນ​ດ້ວຍ​ຄວາມ​ຮັບຜິດຊອບ​ສູງອັນ​ພົ້ນ​ເດັ່ນ​ແມ່ນ​ສຸ​ມ​ໃສ່​ສ້າງໜ່ວຍພັກປອດໃສເຂັ້ມແຂງໜັກແໜ້ນທັງ 4 ດ້ານ ​ 5 ​ເນື້ອໃນ​ ແລະ3 ທິດນໍາເຊິ່ງ​ໄດ້​ຮັບ​ຜົນສຳ​ເລັດ​ເປັນ​ຢ່າງ​ດີສາມາດ​ຕີ​ລາຄາ​ປະ​ເມີນໜ່ວຍພັກ ​ແລະສະມາຊິກ​ພັກເປັນໜ່ວຍພັກປອດໃສເຂັ້ມແຂງໜັກແໜ້ນ, ​ໄປ​ຄຽງຄູ່​ກັບ​ການຕັ້ງໜ້າຈັດ​ຕັ້ງ​ປະຕິບັດ​ວຽກງານ​ວິຊາ​ສະ​ເພາະ​ຂອງ​ຕົນຕິດ​ພັນ​ກັບ​ການ​ຊຸກຍູ້ວຽກງານ​ອົງການ​ຈັດ​ຕັ້ງ​ມະຫາຊົນ ​ແລະປັບປຸງ​ປົວ​ແປງ​ພັກແນ່​ໃສ່​​ເຮັດ​ໃຫ້​ສະມາ​ຊິກ​ພັກ​ມີ​ຄວາມ​ປອດ​ໃສເຂັ້ມ​ແຂງໜັກ​ແໜ້ນ.ນອກ​ນີ້,ຍັງໄດ້ຂະຫຍາຍມະຫາຊົນຜູ້ກ້າວໜ້າເຂົ້າເປັນສະມາຊິກພັກ.ພ້ອມ​ທັງເປັນ​ເອກະ​ພາບຮັບຮອງ​ເອົາ​ທິດ​ທາງປີ 2021 ​ໃນ​ການກໍ່ສ້າງໜ່ວຍພັກ​ໃຫ້​ມີ​ຄວາມ​ປອດ​​ໃສເຂັ້ມ​​ແຂງໜັກ​ແໜ້ນບາງໜ້າວຽກທີ​ເປັນ​ຈຸດ​ສຸມ ​ແລະເປົ້າໝາຍຕື່ມ​ອີກ.

 

   ຈາກນັ້ນ ສະຫາຍ ປອ ຄໍາຄ່ອງ ພົມມະປັນຍາ ໄດ້ໃຫ້ກຽດຂື້ນມອບໃບຢັ້ງຢືນນາມມະຍົດໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2020 ໃຫ້ແກ່ໜ່ວຍພັກ ພອຄ ພ້ອມ​ທັງມີຄຳເຫັນໂອລົມເຊິ່ງສະຫາຍໄດ້ເນັ້ນໜັກໃຫ້ຄະນະພັກ ແລະສະມາຊິກພັກເອົາໃຈໃສ່ສືບຕໍ່ຕັ້ງໜ້າສຶກສາອົບຮົມການເມືອງ-ແນວຄິດ ໃຫ້ພະ ນັກງານສະມາຊິກພັກມີ​ຄວາມໜັກ​ແໜ້ນ​ເຂັ້ມ​ແຂງ, ເປັນເຈົ້າການປະຕິບັດຫຼັກການ​ລວມສູນ​ປະຊາທິປະ​ໄຕ,ປະຕິບັດ​ລະບຽບຂອງ​ພັກ,ກົດໝາຍຂອງ​ລັດ​ຢ່າງ​ເຂັ້ມ​ງວດ,​ເພີ່ມ​ທະວີ​ຄວາມ​ເປັນ​ແບບຢ່າງ​ນຳໜ້າ​ໃນ​ເຮັດໜ້າທີ​ວຽກງານ​ວິຊາ​ສະ​ເພາະ​ທີ​ໄດ້​ຮັບ​ມອບໝາຍ, ປຸກລະດົມ​ທຸກ​ກຳລັງ​ມະຫາຊົນ​ເຂົ້າ​ຮ່ວມ​ຂະ​ບວນການ​ສ້າງໜ່ວຍພັກໃຫ້ມີຄວາມປອດໃສ່, ເຂັ້ມແຂງ ແລະໜັກແໜ້ນຕະຫຼອດໄປ.