ບໍ່ຄຳ-ທອງເຊໂປນ ມອບອາກອນກຳໄລໃຫ້ລັດ 158 ຕື້ກວ່າກີບ

 ບໍ່ດົນຜ່ານມານີ້ບໍລິສັດລ້ານຊ້າງ ມິເນໂຣນສ໌ ລິມິເຕັດ (ລຊມລ) ບໍ່ຄຳທອງເຊໂປນໄດ້ມອບແຊັກເງິນອາກອນກຳໄລຂອງປີ 2020 ຈຳນວນ 17,22 ລ້ານໂດລາ ປະມານ 158 ຕື້ກີບ ໃຫ້ແກ່ທ່ານ ທຳມະລົດ ຣາຊາພົນ, ຮອງຫົວໜ້າກົມສ່ວຍສາອາກອນ, ກະຊວງການເງິນ.

 ໃນປີ 2020, ລຊມລ ໄດ້ມອບຫຼາຍກວ່າ 32 ລ້ານໂດລາ ໃຫ້ແກ່ພາກລັດເປັນຄ່າຊັບພະຍາກອນແຮ່ທາດ ແລະອາກອນກຳໄລ. ໃນປີ 2020, ບໍລິສັດ ລຊມລ ຜະລິດຄຳໄດ້ກວ່າ 2 ໂຕນ. ຕັ້ງແຕ່ເລີ່ມດຳເນີນການຂຸດຄົ້ນຜະລິດຄຳ-ທອງໃນປີ 2003, ລຊມລ ໄດ້ມອບລາຍຮັບໂດຍກົງຫຼາຍກວ່າ 1,5 ຕື້ໂດລາ ໃຫ້ແກ່ ສປປ ລາວ ເປັນຄ່າຊັບພະຍາກອນແຮ່ທາດ, ອາກອນແລະເງິນປັນຜົນ. 

  ທ່ານ ສະໝານ ອະເນກາ, ຜູ້ອຳນວຍການໃຫຍ່ ລຊມລ ກ່າວວ່າ “ລຊມລ ມີຄວາມພາກພູມໃຈເປັນຢ່າງຍິ່ງທີ່ໄດ້ປະກອບສ່ວນຕໍ່ການພັດທະນາເສດຖະກິດສັງຄົມໃນ ສປປ ລາວ. ນອກຈາກການປະກອບສ່ວນເປັນລາຍຮັບໂດຍກົງຕໍ່ລັດຖະບານແລ້ວ, ລຊມລ ຍັງໄດ້ປະກອບສ່ວນຫຼາຍຮ້ອຍລ້ານໂດລາສະຫະລັດໂດຍຜ່ານການສ້າງວຽກເຮັດງານທຳແລະການຝຶກອົບຮົມ, ການພັດທະນາພື້ນຖານໂຄງລ່າງ, ການພັດທະນາທຸລະກິດທ້ອງຖິ່ນກໍຄືການພັດທະນາຊຸມຊົນ.”

  ທ່ານໄດ້ກ່າວຕື່ມວ່າ “ລຊມລ ມຸ່ງໝັ້ນປະຕິບັດຕາມມາດຕະຖານສາກົນດ້ານຄວາມປອດໄພ, ມາດຕະຖານດ້ານສິ່ງແວດລ້ອມ ແລະການເຄົາລົບປະເທດກໍຄືຊຸມຊົນເຈົ້າພາບ. ມາດຕະຖານດ້ານສັງຄົມ ແລະ ສິ່ງແວດລ້ອມຂອງ ລຊມລ ໄດ້ຖືກຍົກເປັນແບບຢ່າງດີທີ່ໃຫ້ແກ່ໂຄງການອື່ນໆ. ນອກຈາກນັ້ນ ລຊມລ ເປັນບໍລິສັດໜຶ່ງດຽວເທົ່ານັ້ນໃນ ສປປ ລາວ ທີ່ໄດ້ຮັບໃບຍ້ອງຍໍປະເພດ A+ ຈາກກະຊວງພະລັງງານ ແລະບໍ່ແຮ່ສະເໝີມາ.”

ໂຄງການຄຳ-ທອງ ເຊໂປນໄດ້ສ້າງວຽກເຮັດງານທຳໃຫ້ຄົນລາວຫຼາຍພັນຄົນແລະໄດ້ລົງທຶນຫຼາຍຮ້ອຍລ້ານໂດລາສະຫະລັດເຂົ້າໃສ່ການພັດທະນາ ແລະການຝຶກອົບຮົມ. ໃນຊຸມຊົນເມືອງວິລະບູລີໄດ້ມີປະຊາຊົນກວ່າ 40.000 ຄົນ ໄດ້ຮັບຜົນປະໂຫຍດຈາກໂຄງການພັດທະນາຊຸມຊົນຂອງໂຄງການຄຳ-ທອງເຊ ໂປນລວມມູນຄ່າ 13 ລ້ານໂດລາ ແລະລາຍໄດ້ຂອງກຸ່ມທຸລະກິດທ້ອງຖິ່ນກໍໄດ້ທະວີຄູນຂຶ້ນເປັນ 33 ລ້ານໂດລາ.

แชร์