ພໍ່ເຊີຍ ຄອບຄົວຕົວແບບລ້ຽງໝູລາດ

    ເມື່ອບໍ່ດົນມານີ້ ທ່ານ ໂພໄຊ ໄຊຍະສອນ ເຈົ້າແຂວງສາລະວັນ, ພ້ອມຄະນະ, ໄດ້ລົງເຄື່ອນໄຫວຢ້ຽມຢາມຊຸກຍູ້ຄອບຄົວພໍ່ເຊີຍ ຢູ່ບ້ານນາກະເຈີມ ເມືອງຕຸ້ມລານ ຊຶ່ງເປັນຄອບຄົວຕົວແບບລ້ຽງໝູລາດພື້ນບ້ານ.

ການເຄື່ອນໄຫວຄັ້ງນີ້ທ່ານເຈົ້າແຂວງສາລະວັນກໍ່ໄດ້ຮັບຟັງການລາຍງານຂອງພໍ່ເຊີຍທີ່ໄດ້ລ້ຽງໝູລາດພື້ນເມືອງແບບທໍາມະຊາດ, ຊຶ່ງໃນເບື້ອງຕົ້ນປີ 2016 ໄດ້ມີແນວພັນໝູ 13 ໂຕ ໝູເຖິກ 1 ໂຕ ການເກືອແມ່ນໃຊ້ມັນຕົ້ນທີ່ຕົນເອງປູກປົນກັບຮໍາເລັກນ້ອຍເພື່ອຫຼຸດຕົ້ນທຶນໃນການໃຊ້ຈ່າຍ ແລະເຫັນວ່າໝູທີ່ລ້ຽງຕຸ້ຍພີ ແລະໃຫຍ່ໄວມາຮອດປີ 2017 ໝູກໍໄດ້ອອກລູກໂຕລະ 6-7 ໂຕ ປະມານ 80 ໂຕ. 

   ຕໍ່ມາປີ 2018 ມີໝູນ້ອຍເກີດອອກມາປີລະ 2 ເທື່ອເກີດປະມານ 168 ໂຕ ລາວຂາຍໝູ 132 ໂຕ ໂຕລະ 2 ແສນກີບ ໄດ້ເງິນປະມານ 26,4ລ້ານກີບ, ຮອດປີ 2020 ລາວກໍ່ຊື້ດິນອອກຕໍ່ ແລະລ້ຽງໝູຕາມເດີມຂາຍໝູໄດ້ເງິນ 27,6 ລ້ານກີບ, ມາຮອດປີ 2021 ລາວໄດ້ຂາຍອີກ 30 ໂຕລາວຂາຍໝູໂຕລະ 3 ແສນກີບໄດ້ເງິນ 9 ລ້ານກີບ, ສະເລ່ຍໃນ 5 ປີ ມີລູກໝູເກີດໄດ້ 510 ໂຕ ສາມາດຂາຍ ແລະໄດ້ເງິນຈາກການຂາຍໝູລາດລວມ 79,25 ລ້ານກີບ. 

  ຈາກນັ້ນທ່ານເຈົ້າແຂວງສາລະວັນກໍໄດ້ສະແດງຄວາມຍ້ອງຍໍຊົມເຊີຍຕໍ່ພໍ່ເຊີຍ ແລະຄອບຄົວທີ່ມີແນວຄິດເພິ່ງຕົນເອງ, ກຸ້ມຕົນເອງແລະສ້າງຄວາມເຂັ້ມແຂງດ້ວຍຕົນເອງໄດ້ມີອາຊີບທີ່ບໍລິສຸດສັດຊື່ ແລະເກີດຈາກຄວາມດຸໝັ່ນດ້ວຍຕົນ ແລະຫວັງຢ່າງຍິ່ງວ່າຫຼາຍຄອບຄົວທີ່ໄດ້ເຫັນແລ້ວຈະນໍາໄປເປັນແບບຢ່າງເພື່ອນໍາພາ ຄອບຄົວຂອງຕົນຫຼຸດພົ້ນຈາກຄວາມທຸກຍາກເທື່ອລະກ້າວ ແລະ ໃນວັນດຽວກັນທ່ານເຈົ້າແຂວງກໍໄດ້ລົງຢ້ຽມເບິ່ງຈຸດເຊື່ອມຕໍ່ລະຫວ່າງເມືອງຕຸ້ມລານກັບເມືອງທ່າປາງທອງ ແຂວງສະຫວັນນະເຂດຕື່ມອີກ. 

 

แชร์