ຮອງຜູ້ວ່າການ ທຫລ ພົບປະບັນດາທະນະຄານທຸລະກິດຢູ່ແຂວງບໍ່ແກ້ວ

ຂ່າວ:ຄຳພັນ ແກ້ວມະນີ

  ວັນທີ 2 ເມສາ 2021 ທ່ານ ນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ (ທຫລ) ໄດ້ພົບປະກັບບັນດາທະນາຄານທຸລະກິດຢູ່ແຂວງບໍ່ແກ້ວ ທີ່ຫ້ອງຮັບແຂກຫ້ອງວ່າການແຂວງບໍ່ແກ້ວ ມີທະນາຄານການຄ້າຕ່າງປະເທດລາວ, ທະນາຄານພັດທະນາລາວ, ທະນາຄານສົ່ງ ເສີມກະສິກຳ ແລະບັນດາທະນາ ຄານທຸລະກິດພາຍໃນແຂວງບໍ່ແກ້ວເຂົ້າຮ່ວມ.

  ທ່ານ ສົມຫວັງ ເພັງມະດວງຈັກ ຫົວໜ້າທະນາຄານພັດທະນາລາວສາຂາແຂວງບໍ່ແກ້ວໄດ້ຕາງໜ້າບັນດາທະນາຄານທຸລະກິດໄດ້ລາຍງານສະພາບເງິນຕາຢູ່ແຂວງບໍ່ ແກ້ວວ່າ: ແຂວງບໍ່ແກ້ວເປັນແຂວງທີມີຊາຍແດນຕິດກັບບັນດາປະເທດທີ່ມີການເມືອງແຕກຕ່າງກັນເຊັ່ນ: ຣາຊາອານະຈັກໄທ, ສະຫະພາບມຽນມາ ແລະມີເຂດເສດ ຖະກິດພິເສດສາມຫຼ່ຽມຄຳທີ່ມີເສດຖະກິດຂະຫຍາຍຕົວຢ່າງກະໂດດຂັ້ນເຮັດໃຫ້ການຄຸ້ມຄອງລະບົບເງິນຕາມີຄວາມຫຍຸ້ງຍາກການຊື້ຂາຍຂອງປະຊາຊົນຕາມຊາຍແດນສ່ວນຫຼາຍແມ່ນໃຊ້ເງິນຕາຕ່າງປະເທດເນື່ອງຈາກສິນຄ້າສ່ວນຫຼາຍແມ່ນນຳເຂົ້າແຕ່ການສຳລະແມ່ນບໍ່ເປັນລະບົບ, ພ້ອມນັ້ນທ່ານຍັງໄດ້ຍົກໃຫ້ເຫັນສະພາບການບໍລິ ຫານວຽກງານຂອງທະນາຄານເປັນຕົ້ນແມ່ນການສະໜອງສິນເຊື້ອ, ການເບີກຈ່າຍເງິນເດືອນພະນັກງານຜ່ານລະບົບທະນາຄານ, ການຖວງໜີ້ ແລະວຽກງານອື່ນໆ, ຈາກນັ້ນຜູ້ເຂົ້າຮ່ວມໄດ້ປະກອບຄຳເຫັນຕໍ່ວຽກງານທະນາຄານເພື່ອເຮັດໃຫ້ການໃຊ້ຈ່າຍເງິນຕາເຂົ້າສູ່ລະບົບການແທດເໝາະກັບເສດຖະກິດຂອງແຂວງບໍ່ແກ້ວແນໃສ່ເຮັດໃຫ້ອັດຕາເງິນເຟິ້ນັບມື້ຫຼຸດໜ້ອຍຖອຍລົງ.

 ທ່ານ ນາງ ວັດທະນາ ດາລາລອຍ ຮອງຜູ້ວ່າການທະນາຄານ ແຫ່ງ ສປປ ລາວໄດ້ກ່າວວ່າ: ປະຈຸ ບັນ, ສປປ ລາວ ພວມຢູ່ໃນຂັ້ນຕອນການປະເມີນຜົນຮອບດ້ານຮອບທີ 3 ຂອງກຸ່ມ APG (ຊຶ່ງເປັນການປະເມີນຮອບດ້ານ ຄັ້ງທີ 2 ຂອງ ສປປ ລາວ), ລັດຖະບານຂອງພວກເຮົາໄດ້ເພີ່ມທະວີຄວາມເອົາໃຈໃສ່ໃນການຊີ້ນໍາວຽກງານການ ຕ້ານສະກັດກັ້ນການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍໂດຍຖືເອົາວຽກງານດັ່ງກ່າວເປັນວຽກງານບູລິມະສິດໜຶ່ງທີ່ຕ້ອງໄດ້ຮັບການປັບປຸງແກ້ໄຂ ລວມເຖິງການວາງນະໂຍບາຍ ແລະການນໍາໃຊ້ມາດຕະການປ້ອງກັນ ແລະສະກັດກັ້ນບັນຫາດັ່ງກ່າວ, ແຕ່ພວກເຮົາເຫັນໄດ້ເຖິງຄວາມສໍາຄັນ ແລະ ຜົນກະທົບຂອງໄພຂົ່ມຂູ່ຂອງການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍຊຶ່ງຖືເປັນອາຊະຍາກໍາທີ່ຮ້າຍແຮງທີ່ອາດຈະກໍ່ໃຫ້ເກີດຜົນກະທົບໃຫຍ່ຫຼວງ ແລະ ເປັນອັນຕະ ລາຍຕໍ່ການພັດທະນາເສດຖະກິດ-ສັງຄົມຂອງພວກເຮົາ, ໃນໄລຍະຜ່ານມາ, ລັດຖະບານຂອງ ສປປ ລາວ ໄດ້ຮັບຮອງ ແລະຈັດຕັ້ງປະຕິບັດນິຕິກໍາຫຼາຍສະບັບເພື່ອຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ, 

  ທ່ານ ກ່າວຕື່ມວ່າ: ການທີ່ ສປປ ລາວ ໄດ້ພະຍາຍາມລວບລວມຂໍ້ມູນທີ່ກ່ຽວຂ້ອງ, ປະກອບຂໍ້ມູນໃຫ້ຄົບຖ້ວນຕາມຄໍາແນະນໍາຂອງຄະນະປະເມີນລວມເຖິງການທໍາຄວາມເຂົ້າໃຈຕໍ່ກັບ 40 ຂໍ້ແນະນໍາຂອງອົງການຕ້ານການຟອກເງິນສາກົນ, ເຖິງຢ່າງໃດກໍ່ຕາມ, ນັບຕັ້ງແຕ່ ສປປ ລາວ ໄດ້ສົ່ງບົດລາຍງານດ້ານນິຕິກໍາໃຫ້ຄະນະປະ ເມີນໃນທ້າຍເດືອນມີນາ 2020 ຜ່ານມາ, ພວກເຮົາໄດ້ພົບບັນຫາທ້າທາຍຫຼາຍຢ່າງທີ່ເກີດຂຶ້ນເປັນຕົ້ນກໍ່ແມ່ນການແຜ່ລະບາດຂອງເຊື້ອພະຍາດປອດອັກເສບ (COVID-19) ຊຶ່ງໄດ້ສົ່ງຜົນກະທົບຕໍ່ທຸກໆແຜນວຽກເຮັດໃຫ້ການເຄື່ອນໄຫວວຽກງານຕົວຈິງຂອງຫຼາຍພາກສ່ວນຖືກຢຸດສະງັດ ບໍ່ມີ ຄວາມຄືບໜ້າດ້ານປະສິດທິຜົນ, ດ້ວຍສິ່ງທ້າທາຍດັ່ງກ່າວ ເຮັດໃຫ້ພວກເຮົາຈໍາເປັນຕ້ອງເວັ້ນໄລຍະຫ່າງ ແລະຈໍາຕ້ອງເຮັດວຽກໃນສະພາບແວດລ້ອມແບບໃໝ່, ແຕ່ເຖິງຢ່າງກໍ່ຕາມຮຽກຮ້ອງໃຫ້ບັນດາທະນາຄານທຸລະກິດຢູ່ແຂວງບໍ່ແກ້ວຈົ່ງເຄື່ອນໄຫວຕາມພາລະບົດບາດ ແລະສິດໜ້າທີ່ຂອງຕົ້ນເພື່ອເຮັດໃຫ້ອັດຕາເງິນເຟີ້ນັບມື້ຫຼຸດໜ້ອຍຖອຍລົງແລະເຮັດໃຫ້ເງິນກີບແຂງຄາຂຶ້ນ. 

แชร์