ບົວລະພາ ສຳເລັດສ້າງໂຮງງານໄມ້ອັດ ຄາດໄວນີ້ເດີນເຄື່ອງຜະລິດທາງການ

  ບໍລິສັດ ບົວລະພາ ກະສິກຳ-ປ່າໄມ້ ຈຳກັດ ໄດ້ສຳເລັດການກໍ່ສ້າງໂຮງງານຜະລິດໄມ້ອັດຈາກໄມ້ປູກພາຍຫຼັງທີ່ລົງມືກໍ່ສ້າງມາແຕ່ວັນທີ 10 ກໍລະກົດ 2019 ໃນເນື້ອທີ່ດິນ 7 ເຮັກຕາ ເຂດອຸດສາຫະກຳເມືອງຫີນເຫີບ ຕັ້ງຢູ່ບ້ານໂພນສູງ ແລະບ້ານຄອນພຸກແຂວງວຽງຈັນ.

  ໂຄງການດັ່ງກ່າວໄດ້ສ້າງສຳເລັດ ແລະມີພິທີມອບ-ຮັບລະຫວ່າງບໍລິສັດ CAMCE ຈາກ ສປ ຈີນ ຜູ້ຮັບເໝົາກໍ່ສ້າງ ແລະເຈົ້າຂອງໂຄງການກໍຄືບໍລິສັດ ບົວລະພາກະສິ ກຳ-ປ່າໄມ້ ຈຳກັດ ໄດ້ຈັດຂຶ້ນໃນວັນທີ 6 ເມສາ 2021 ໂດຍມີທ່ານ ນາງ ສຸໄພວັນ ທ່ຽງຈັນໄຊ ຮອງຜູ້ອຳນວຍການບໍລິສັດ ບົວລະພາກະສິກຳ-ປ່າໄມ້ຈຳກັດພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ບໍລິສັດ ບົວລະພາ ກະສິກຳ-ປ່າໄມ້ ຈຳກັດ ກໍ່ຕັ້ງຂຶ້ນໃນປີ 1993 ໂດຍການຮ່ວມທຶນກັນລະຫວ່າງລາວ ແລະສະວິເດັນ ເພື່ອຈັດຕັ້ງປະຕິບັດ ແລະດຳເນີດການປູກໄມ້ກະສິກຳ (ສ່ວນໃຫຍ່ແມ່ນພັນໄມ້ວິກ) ໃນຂອບເຂດນະຄອນຫຼວງວຽງຈັນ, ແຂວງວຽງຈັນ, ໄຊຍະບູລີ ແລະໄຊສົມບູນປະຈຸບັນລວມເນື້ອທີ່ປູກແລ້ວ 5 ພັນກວ່າເຮັກຕາ.

ສຳນັກງານໃຫຍ່ຕັ້ງຢູ່ບ້ານໂພນໄຊ, ເມືອງໄຊເສດຖາ, ນະຄອນຫຼວງວຽງຈັນ, ບໍລິສັດມີສວນກ້າເບ້ຍໄມ້ເປັນຂອງຕົນເອງ ແລະ ມີໂຮງງານປຸງແຕ່ງໄມ້ສຳເລັດຮູບ (ຄົບວົງຈອນ) ທີ່ບ້ານແສນອຸດົມ, ເມືອງໄຊທານີ, ນະຄອນຫຼວງວຽງຈັນ; ພ້ອມກັນນັ້ນບໍລິສັດກໍ່ພວມສຳເລັດການກໍ່ສ້າງໂຮງງານຜະລິດໄມ້ອັດຈາກໄມ້ປູກ ( ໂຮງງານໄມ້ອັດ) ຢູ່ເມືອງຫີນເຫີບ,ແຂວງວຽງຈັນ ລວມມູນຄ່າກໍ່ສ້າງຫຼາຍກວ່າ 12 ລ້ານໂດລາສະຫະລັດ ໂດຍແມ່ນບໍລິສັດ CAMCE, ຊຶ່ງເປັນກິດຈະການຂອງລັດຖບານແຫ່ງ ສປ ຈີນ ເປັນຜູ້ຮັບເມົາກໍ່ສ້າງ.

 ໂຮງງານນີ້ຈະມີກຳລັງການຜະລິດໄມ້ອັດປະມານ 1,12 ແສນແມັດກ້ອນຕໍ່ປີ ແລະຈະສາມາດສະໜອງຜະລິດຕະພັນສຳເລັດຮູບໄດ້ປະມານ 48 ແມັດກ້ອນຕໍ່ປີ,ວັດຖຸດິບ (ໄມ້ທ່ອນ) ແມ່ນຈະເອົາມາຈາກສວນປູກຂອງບໍລິສັດບົວລະພາເອງ.

  ໂຄງການນີ້ຈະມີສ່ວນໃນການສະໜັບສະໜູນແຜນການພັດທະນາເສດຖະກິດຂອງລັດຖະບານລາວໃນພາກພື້ນ ແລະຄາດວ່າຈະສ້າງຜົນປະໂຫຍດຢ່າງຫຼວງຫຼາຍໃນລະດັບຊາດ, ພາກພື້ນ ແລະທ້ອງຖິ່ນລວມໄປເຖິງການລົງທຶນຈາກຕ່າງປະເທດໃນເບື້ອງຕົ້ນ 26 ລ້ານໂດລາສະຫະລັດ ເປັນຕົ້ນ ແລະຍັງຈະສາມາດສ້າງວຽກເຮັດງານທຳໃຫ້ແກ່ປະຊາຊົນໃນທ້ອງຖິ່ນຢ່າງໜ້ອຍປະມານ 366 ຕຳແໜ່ງ ແລະຜົນປະໂຫຍດທາງອ້ອມ ອື່ນໆອີກໂດຍເວລານີ້ໂຮງງານແມ່ນໄດ້ສືບຕໍ່ທົດລອງຜະລິດ ແລະຈະເປີດເດີນເຄື່ອງຢ່າງເປັນທາງການພາຍໃນປີນີ້.

------------

ຂ່າວ: ບຸນຕຽງ ຈັນທະວົງ

แชร์