65% ສະຖານີລົດໄຟ ຫຼວງພະບາງ

  ທ່ານ ຄໍາຂັນ ຈັນທະວີສຸກ ເຈົ້າແຂວງໆຫຼວງພະບາງພ້ອມດ້ວຍການນໍາພະແນກຕ່າງໆຂອງແຂວງລົງຢ້ຽມຢາມສະຖານີລົດໄຟໂດຍໄດ້ຮັບການເຊື້ອເຊີນທ່ານ ຫຼີຈຶກົງ ຫົວໜ້າກົງສູນຈີນ ປະຈໍາຫຼວງພະບາງ, ມີທ່ານ ຫວາງ ໂລ້ ຮອງຫົວໜ້າກົງສູນຈີນປະຈໍາຫຼວງພະບາງ,ທ່ານ ຊຽວສຽນເຫວິ່ນ ຜູ້ອໍານວຍການໃຫຍ່ທາງລົດໄຟລາວ-ຈີນ ແລະບໍລິສັດກໍ່ສ້າງທາງລົດໄຟພາກຕາເວັນຕົກສຽງໃຕ້ ສປ ຈີນ ພ້ອມດ້ວຍພະແນກທີ່ກ່ຽວຂ້ອງໃຫ້ການຕ້ອນຮັບດ້ວຍຄວາມອົບອຸ່ນ.

  ພ້ອມດຽວກັນນີ້ທ່ານ ຊຽວສຽນ ເຫວິ່ນ ຜູ້ອໍານວຍການໃຫຍ່ທາງລົດໄຟ ລາວ-ຈີນ ກໍໄດ້ລາຍງານກ່ຽວກັບສະພາບລວມຂອງການກໍ່ສ້າງສະຖານີລົດໄຟຫຼວງພະບາງ ແລະຄວາມຄືບໜ້າຂອງການກໍ່ສ້າງໃນປະຈຸບັນ, ພ້ອມທັງຊົມການກໍ່ສ້າງຫຼັງຄາອາຄານສະຖານີ ແລະມາດຕະຖານຄວາມປອດໄພການກໍ່ສ້າງ ແລະການນໍາໃຊ້ແຮງງານຢູ່ພາກສະໜາມ,ໂອກາດທີ່ມາຢ້ຽມຢາມໂຄງການກໍ່ສ້າງສະຖານີຄັ້ງນີ້ທ່ານ ຄໍາຂັນ ຈັນທະວີສຸກ ກໍໄດ້ສະແດງຄວາມຂອບອົກຂອບໃຈໃນການຕ້ອນຮັບ ແລະຊົມເຊີຍການເຮັດວຽກຂອງວິຊາການສອງປະເທດ ແລະຍ້ອງຍໍຊົມເຊີຍໜ່ວຍງານກໍ່ສ້າງໃນການພັກດັນໂຄງການກໍ່ສ້າງໃຫ້ມີມາດຕະຖານ, ມີຄຸນນະພາບ ແລະປະສິດທິພາບທີ່ສູງເພາະວ່າທາງລົດໄຟ ລາວ-ຈີນ ມີຄວາມໝາຍຄວາມສຳຄັນຍິ່ງຕໍ່ການພັດທະນາຂອງປະເທດລາວ, ສະນັ້ນອົງການປົກຄອງຫຼວງພະບາງຈະເພີ່ມທະວີການສະໜັບ ສະໜູນ ແລະໃຫ້ການຮ່ວມມືໃນການກໍ່ສ້າງທາງລົດໄຟ, ພ້ອມດຽວກັນນີ້ກໍ່ໃຫ້ສຳເລັດວຽກງານໃຫ້ທັນການເພື່ອຮັບປະກັນໃນການເປີດໃຫ້ບໍລິການທາງລົດໄຟລາວ-ຈີນ ທັນຕາມເວລາທີ່ກໍານົດ ແລະຫຼັງຈາກສ້າງທາງລົດໄຟ ຈີນ-ລາວ ສໍາເລັດຈະເປັນຊ່ອງທາງຂົນສົ່ງຜູ້ໂດຍສານ ແລະຂົນສົ່ງສິນຄ້າຂະໜາດໃຫຍ່ທີ່ມີຄວາມໝາຍຄວາມສໍາຄັນໃນການການຊຸກຍູ້ພັດທະນາເສດຖະກິດ, ອຸດສາຫະກໍາໃນພາກພື້ນຂອງບັນດາແຂວງຕື່ມອີກ, ຈາກນັ້ນທ່ານເຈົ້າແຂວງພ້ອມດ້ວຍຄະນະກໍໄດ້ຂີ່ລົດໄຟຈາກສະຖານີຈຸດຂຶ້ນລົດແມ່ນກິໂລແມັດທີ່ DK170+200, ລົງລົດຢູ່ຂົວຂ້າມນໍ້າຂອງບ້ານລາດຫານ (Dk 143+640), ໂດຍໄລຍະຫ່າງທັງໝົດແມ່ນ 26.56 ກິໂລແມັດ.

  ມາຮອດປະຈຸບັນນີ້ການກໍ່ສ້າງສະຖານີລົດໄຟຫຼວງພະບາງແມ່ນມີຄວາມຄືບໜ້າແລ້ວ 65% ຊຶ່ງກໍາລັງດໍາເນີນການມຸງຫຼັງຄາ, ກໍ່ໂຄງສ້າງຂັ້ນສອງ ແລະກໍ່ຝາມ່ານຄາດວ່າຈະໃຫ້ສໍາເລັດກ່ອນເປີດທາງລົດໄຟລາວ-ຈີນ ໃນທ້າຍ ປີ 2021 ນີ້.

ຂ່າວ: ສີສຸວັນ

แชร์