5 ປີ ບໍລິຄຳໄຊ ກວດກາ 137 ເປົ້າໝາຍເຫັນຜົນເສຍຫາຍ 3 ຮ້ອຍຕື້ກວ່າກີບ

  ກອງປະຊຸມວຽກງານກວດກາທົ່ວແຂວງບໍລິຄຳໄຊ ປະຈຳ 5 ປີ (2016-2020) ແລະຈັດຕັ້ງຜັນຂະຫຍາຍເນື້ອໃນຈິດໃຈຂອງກອງປະຊຸມວຽກງານກວດກາທົ່ວປະ ເທດປະຈຳປີ 5 ປີ (2016-2020) ໄດ້ຈັດຂຶ້ນໃນວັນທີ 2 ເມສາຜ່ານມານີ້ທີ່ຫ້ອງປະຊຸມຫ້ອງວ່າການປົກຄອງແຂວງໂດຍການເປັນປະທານຂອງ ສະຫາຍ ສຸວັນນີ ໄຊຊະນະ ຮອງເລຂາພັກແຂວງປະທານສະພາປະຊາຊົນ ແຂວງບໍລິຄຳໄຊ, ມີບັນດາປະທານ, ຮອງປະທານຄະນະກວດກາພັກແຂວງ, ຄະນະກວດກາພັກເມືອງ 7 ເມືອງ ແລະພາກສ່ວນກ່ຽວຂ້ອງເຂົ້າຮ່ວມ.

   ສະຫາຍ ແສງເດືອນ ບໍລິຈັກ ຮອງປະທານຄະນະກວດກາພັກແຂວງໄດ້ຕີລາຄາຄືນຫຼາຍວຽກງານທີ່ໄດ້ຮັບການຈັດຕັ້ງປະຕິບັດໃນໄລຍະ 5 ປີຜ່ານມາ ເປັນຕົ້ນໄດ້ຕິດ ຕາມ, ກວດກາການຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ແລະມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ ບໍລິຄໍາໄຊ ແລະມະຕິກອງປະຊຸມໃຫຍ່ຄະນະພັກຂັ້ນຕ່າງໆ, ກວດກາການປັບປຸງກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານເມື່ອກ່ອນ ແລະການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃນປະຈຸບັນ.

  ຜ່ານການຕິດຕາມ, ກວດກາເຫັນວ່າຄະນະພັກຂັ້ນຕ່າງໆ ມີການຈັດຕັ້ງຄົ້ນຄວ້າເຊື່ອມຊຶມ ແລະຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກດ້ວຍຄວາມຮັບຜິດຊອບສູງ, ຄົ້ນຄວ້າຫັນເປັນນິຕິກໍາ, ເປັນແຜນງານ, ໂຄງການລະອຽດຂອງຂັ້ນຕົນນໍາພາປະຕິບັດມີ ຜົນສໍາເລັດຫຼາຍດ້ານ, ໄດ້ປັບປຸງແບບແຜນວິທີນໍາພາ, ວິທີເຮັດວຽກສອດຄ່ອງຕາມຫຼັກການຂອງພັກ, ຄະນະພັກ ແລະສະມາຊິກພັກສ່ວນຫຼາຍຮັກສາໄດ້ຄຸນທາດການເມືອງ, ຄຸນສົມບັດສິນທໍາປະຕິວັດ, ມີຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບການມອບໝາຍ, ການປັບປຸງກໍ່ສ້າງພັກໄປຕາມ 5 ຫຼັກການ, 3 ທິດນໍາຂອງພັກເຮັດໃຫ້ການຈັດຕັ້ງພັກ, ສະມາຊິກພັກເຕີບໃຫຍ່ຂະຫຍາຍຕົວໃນ ດ້ານປະລິມານ ແລະຄຸນນະພາບ.

  ດ້ານວຽກງານການຕິດຕາມ, ກວດກາການບໍລິຫານລັດແມ່ນໄດ້ຕິດຕາມ, ກວດກາທັງໝົດ 137 ເປົ້າໝາຍ, ໃນນັ້ນ, ກວດກາຕາມຄໍາສັ່ງເລກທີ 15/ນຍ ມີ 16 ເປົ້າໝາຍ (ພົບເຫັນມູນຄ່າການເສຍຫາຍ 16 ເປົ້າໝາຍ); ກວດກາຕາມຜົນການກວດສອບ 96 ເປົ້າໝາຍ (ພົບ ເຫັນ31 ເປົ້າໝາຍ); ກວດກາຕາມການສະ ເໜີຂອງສະພາປະຊາຊົນແຂວງ 17 ເປົ້າໝາຍ (ພົບເຫັນ 8 ເປົ້າໝາຍ)  ແລະກວດກາໂຄງການລົງທຶນຂອງລັດເລີ່ມແຕ່ຫົວທີ 8 ເປົ້າໝາຍ, ຜ່ານການກວດກາພົບເຫັນຜົນເສຍຫາຍທັງໝົດ 364,37 ຕື້ກີບ, ເງິນໂດລາ 1.800 ໂດລາ, ເງິນບາດ 4,31 ລ້ານບາດ, ເກັບກູ້ຄືນໄດ້ 14,84  ຕື້ກີບ, ເງິນໂດລາ 1.800 ໂດລາ, ເງິນບາດ 1,43 ລ້ານບາດ, ດັດແກ້ອວ່າຍທຶນແລ້ວ 727,47 ລ້ານກີບ; ດັດແກ້ຫັກລົບມູນຄ່າໂຄງການຫຼຸດລົງ 49,3 ຕື້ກີບ; ຍັງຄ້າງເກັບກູ້ 1,24 ຕື້ກີບ, 2,88 ລ້ານບາດ ແລະຍັງຄ້າງຫັກລົບມູນຄ່າໂຄງການລົງ 298,3 ຕື້ກີບ.

  ພ້ອມກັນນັ້ນໄດ້ກວດກາໂຄງການລົງທຶນຂອງລັດທີ່ມີມູນຄ່າ 10 ຕື້ກີບຂຶ້ນໄປ ຈໍານວນ 25 ໂຄງການ ແລະກວດກາໂຄງການລົງທຶນຂອງລັດທີ່ມີມູນຄ່າ 10 ຕື້ກີບລົງມາຈໍານວນ 46 ໂຄງການ.

ຂ່າວ: ສີເວດ

แชร์