ຈັດງານສັບປະດາແຫ່ງຊາດດ້ານຄວາມປອດໄພທາງຫຼວງ

 ວັນທີ 3 ເມສາ 2021 ຜ່ານມາທີ່ເດີ່ນພະທາດຫຼວງວຽງຈັນ ກະຊວງໂຍທາທິການ ແລະຂົນສົ່ງໄດ້ຈັດງານສັບປະດາແຫ່ງຊາດດ້ານຄວາມປອດໄພທາງຫຼວງໂດຍເປັນກຽດການເຂົ້າຮ່ວມຂອງທ່ານ ພົອ ຈັນສະໝອນ ຈັນຍາລາດ ຮອງນາຍົກລັດຖະມົນຕີກະຊວງປ້ອງກັນປະເທດ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນ ຫຼວງວຽງຈັນ, ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະຂົນສົ່ງ, ມີບັນດາລັດ ຖະມົນຕີ, ຮອງລັດຖະມົນຕີ, ພະນັກງານ, ທະຫານ, ຕໍາຫຼວດ, ນັກຮຽນ, ນັກສຶກສາ, ຕະຫຼອດຮອດພໍ່ແມ່ປະຊາຊົນບັນດາເຜົ່າທຸກປ້ວງຊົນເຂົ້າຮ່ວມຢ່າງຟົດຟື້ນ.

  ທ່ານ ວຽງສະຫວັດ ສີພັນດອນ ໃຫ້ຮູ້ວ່າ: ການຈັດງານຄັ້ງນີ້ເພື່ອປະກອບສ່ວນຫຼຸດຜ່ອນການເກີດອຸບັດເຫດ ແລະການສູນເສຍຊີວິດຂອງຜູ້ໃຊ້ລົດໃຊ້ທາງຫຼວງໃນທົ່ວ ໂລກໂດຍສະເພາະກໍແມ່ນການປະກອບສ່ວນຈັດຕັ້ງປະຕິບັດຍຸດທະສາດ ແລະ ແຜນນະໂຍບາຍຂອງພັກ ແລະ ລັດຖະບານຂອງ ສປປ ລາວ ໃນການຫຼຸດຜ່ອນຄວາມທຸກຍາກ ແລະປາກົດການຫຍໍ້ທໍ້ຂອງສັງຄົມໂດຍສະເພາະໃນການດ້ານການຈະລາຈອນທາງບົກໃຫ້ຫຼຸດໜ້ອຍຖອຍລົງເທື່ອລະກ້າວ.

  ນອກຈາກນັ້ນ ກໍ່ເພື່ອເປັນການປຸກລະດົມສະຕິ ແລະປູກຈິດສໍານຶກກ່ຽວກັບຄວາມປອດໄພໃນການໃຊ້ລົດໃຊ້ທາງຫຼວງທຸກເພດທຸກໄວທຸກຊັ້ນຄົນໃນສັງຄົມໃຫ້ເຫັນໄດ້ເຖິງໄພອັນຕະລາຍຂອງການລະເມີດກົດຈະລາຈອນເປັນຕົ້ນແມ່ນການຂັບຂີ່ລົດໄວ, ການດື່ມສິ່ງມືນເມົາ ແລ້ວຂັບຊຶ່ງເປັນສາເຫດສ່ວນໃຫຍ່ຂອງການເກີດອຸບັດເຫດ, ໃຫ້ເຫັນໄດ້ເຖິງຜົນກະທົບ ແລະຜົນສະທ້ອນຂອງການເກີດອຸບັດເຫດຕໍ່ການດໍາລົງຊີວິດຂອງສັງຄົມ, ຕໍ່ເສດຖະກິດ ແລະການພັດທະນາຂອງຊາດ.

  ການຈັດສັບປະດາແຫ່ງຊາດດ້ານຄວາມປອດໄພທາງຫຼວງໃນແຕ່ລະປີແມ່ນເປັນສິ່ງຈໍາເປັນ ແລະ ມີຄວາມໝາຍຄວາມສໍາຄັນທີ່ທຸກພາກສ່ວນກ່ຽວຂ້ອງທັງພາກພັກ ແລະ ເອກະຊົນຕ້ອງຊ່ວຍກັນຮ່ວມແຮງຮ່ວມໃຈປະກອບສ່ວນເຫຼື່ອແຮງວັດຖຸປັດໄຈຈັດງານສັບປະດາຄວາມປອດໄພທາງຫຼວງນີ້ຂຶ້ນໃຫ້ເປັນຂະບວນການຟົດຟື້ນ ແລະພ້ອມພຽງກັນປະຕິບັດກົດຈະລາຈອນຢ່າງເຂັ້ມງວດເພື່ອປົກປ້ອງຊີວິດ ແລະຊັບສິນຂອງທຸກຄົນ.

• 06/04/2021