ຫຼວງພະບາງ ໃຊ້ງົບ 16 ຕື້ກີບ ຂະຫຍາຍເສັ້ນທາງ 3 ແຍກໂຊກພັນຄຳຫານາດູ

ຂ່າວ: ສີສຸວັນ

  ເສັ້ນທາງແຕ່ 3 ແຍກໂຮງແຮມໂຊກພັນຄໍາຫານາດູທີ່ກໍາລັງປັບປຸງຂະຫຍາຍໜ້າທາງໃຫ້ກວ້າງກວ່າເກົ່ານັ້ນເປັນເສັ້ນທາງຫຼວງແຫ່ງຊາດ ເລກ 13 ເໜືອ ເຂດນະ ຄອນຫຼວງພະບາງ ໂດຍແມ່ນບໍລິສັດ ພັນທະມິດ ກໍ່ສ້າງຂົວທາງເປັນຜູ້ຮັບເໝົາກໍ່ສ້າງຊຶ່ງໄດ້ເລີ່ມລົງມືກໍ່ສ້າງມາແຕ່ຕົ້ນເດືອນມີນາ ຜ່ານມາໂດຍໄດ້ແບ່ງອອກເປັນ 2 ຊ່ວງການກໍ່ສ້າງ, ລວມມູນຄ່າການກໍ່ສ້າງທັງໝົດ 16 ຕື້ກີບ, ຄາດຈະໃຫ້ສໍາເລັດໃນເດືອນ ມິຖຸນາ 2021 ນີ້.

  ທ່ານ ອຸທອນ ພົມສຸວັນ ຫົວໜ້າໂຄງການ 9.1 (ໂຄງການປັບປຸງເສັ້ນທາງຫຼວງແຫ່ງຊາດເຂດແຂວງຫຼວງພະບາງ) ໄດ້ໃຫ້ສໍາພາດຕໍ່ທີມຂ່າວພວກເຮົາວ່າງບໍ່ດົນນີ້ວ່າ: ໂຄງການປັບປຸງເສັ້ນທາງຫຼວງແຫ່ງຊາດເຂດນະຄອນຫຼວງພະບາງນັບແຕ່ສາມແຍກໂຮງແຮມໂຊກພັນຄໍາຫານາດູແມ່ນໄດ້ມີການປັບປຸງຂະຫຍາຍໜ້າທາງໃຫ້ກວ້າງກວ່າເກົ່າເພື່ອຄວາມສະດວກໃນການສັນຈອນ, ສໍາລັບການກໍ່ສ້າງໄດ້ແບ່ງອອກເປັນ 2 ຊ່ວງ, ໂດຍແມ່ນບໍລິສັດ ພັນທະມິດ ກໍ່ສ້າງຂົວທາງ ເປັນຜູ້ຮັບເໝົາກໍ່ສ້າງ ຊຶ່ງໄດ້ເລີ່ມລົງມືການກໍ່ສ້າງນັບແຕ່ວັນທີ 3 ມີນາ 2021.

  ຊ່ວງທີ 1 ກໍານົດແຕ່ 3 ແຍກໂຮງແຮມໂຊກພັນຄໍາຫາເດີ່ນກີລານາຫຼວງ, ມີຄວາມຍາວ 875 ແມັດ ແລະຊ່ວງທີ 2 ແຕ່ເດີ່ນກີລານາຫຼວງຫານາດູ (ບ້ານຂົວທີ 1) ຍາວ 925 ແມັດ, ໜ້າທາງມີຄວາມກວ້າງ 14 ແມັດ, ລວມມູນຄ່າການກໍ່ສ້າງທັງໝົດ 16 ຕື້ກີບ, ຊຶ່ງເປັນການລົງທຶນຂອງລັດ 100%.

  ຜ່ານການລົງມືຈັດຕັ້ງປະຕິບັດກໍໄດ້ພົບຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງເນື່ອງຈາກຈຸດການຂະຫຍາຍໜ້າທາງເປັນເຂດທີ່ຊຸມຊົນແອອັດ, ການຍົກຍ້າຍສິ່ງກີດຂວາງຍັງສັກຊ້າເປັນຕົ້ນແມ່ນບັນຫາທໍ່ນໍ້າປະປາ, ໄຟຟ້າເຖິງຢ່າງໃດກໍຕາມຍ້ອນຄວາມເອົາໃຈໃສ່ຊີ້ນໍາຂອງຄະນະຮັບຜິດຊອບມາຮອດປະຈຸບັນໜ້າວຽກໂດຍລວມທັງ ສອງຊ່ວງການກໍ່ສ້າງແມ່ນຄຶບໜ້າໄປ 40% ແລ້ວ ແລະຕາມສັນຍາທີ່ກໍານົດການກໍ່ສ້າງແມ່ນຈະໃຫ້ສໍາເລັດໃນເດືອນ 6 ປີ 2021 ນີ້.

แชร์