ຜົນລາງວັນ ວັນນະກໍາແມ່ນໍ້າຂອງ ແລະລາງວັນຊີໄຣ

 ກອງປະຊຸມສະຫຼຸບບັ້ນກວດສອບວັນນະຄະດີເພື່ອຂໍ່ານັບຊົມເຊີຍວັນປະຫວັດສາດສໍາຄັນຂອງຊາດ ແລະພິທີຖະແຫຼງຂ່າວຜົນການຕັດສິນລາງວັນວັນນະກໍາແມ່ນໍ້າຂອງ ແລະ ລາງວັນຊີໄຣ ໄດ້ຈັດຂຶ້ນໃນວັນທີ 2 ເມສາ 2021 ທີ່ນະຄອນຫຼງວຽງຈັນ ພາຍໃຕ້ການເປັນປະທານຂອງ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະ ແຫຼງຂ່າວວັດທະນະທໍາແລະທ່ອງທ່ຽວ, ທ່ານ ທອງໃບ ໂພທິສານ ປະທານສະມາຄົມນັກປະພັນລາວ, ມີບັນດານັກປະພັນ, ນັກກະວີເຂົ້າຮ່ວມຢ່າງຫຼວງຫຼາຍ.

  ກອງປະຊຸມຄັ້ງນີ້ຈັດຂຶ້ນເພື່ອຂໍ່ານັບຊົມເຊີຍກອງປະຊຸມໃຫຍ່ຄັ້ງທີ XI ຂອງພັກ, ລະນຶກວັນຄ້າຍວັນເກີດປະທານໄກສອນ ພົມວິຫານ ຄົບຮອບ 100 ປີ ແລະຜົນສໍາເລັດການເລືອກຕັ້ງສະມາຊິກສະພາແຫ່ງຊາດຊຸດທີ IX, ນອກຈາກນີ້ໃນກອງປະຊຸມຍັງໄດ້ປະກາດຜົນລາງວັນວັນນະກໍາແມ່ນໍ້າຂອງ ແລະ ລາງວັນວັນນະກໍາສ້າງສັນສຸດຍອດແຫ່ງອາຊຽນ (ຊີໄຣ) ປະຈໍາປີ 2020 ນໍາອີກ, ຊຶ່ງລາງວັນວັນນະກໍາແມ່ນໍ້າຂອງປະຈໍາປີ 2020 ມີບົດກະວີ, ບົດເລື່ອງສັ້ນ ແລະ ບົດນະວັດນິຍາຍເຂົ້າຮ່ວມແຂ່ງຂັນຈໍານວນ 21 ເຫຼັ້ມ ໃນນີ້ອັນດັບທີ 1 ແມ່ນບົດກະວີ “ຄໍາໝັ້ນສັນຍາ” ຂຽນໂດຍພະບຸນທະວີ ກົມພະພັນ ແລະບົດກະວີ “ແຍງນາ” ໂດຍທ່ານນາງ ຂັນຄໍາ ສຸດທະວິໄລ, ອັນດັບທີ 3 ແມ່ນບົດກະວີ “ສາຍວາລິນຖິ່ນຊ້າງ” ໂດຍສຸລິເດດ ວົງພັນ, ທີ 4 ເລື່ອງສັ້ນ “ອາວທະຫານ” ໂດຍແຫຍງພິລາກອນ ແລະອັນດັບທີ 5 ແມ່ນບົດ “ບັນທຶກທີ່ຍັງເຫຼືອໄວ້” ຂຽນໂດຍຄໍາສີ ຈັນທະວີທອງ.

  ບົດກະວີ “ຄໍາໝັ້ນສັນຍາ” ຂຽນໂດຍພະບຸນທະວີກົມພະພັນ ມີຄວາມຍາວ 36 ບາດ ໃນປຶ້ມໂຮມກະວີ “ແພພັນລາຍຈາກປາຍມືແມ່”, ຊຶ່ງມີເນື້ອໃນເວົ້າເຖິງມູນເຊື້ອພິລະອາດຫານຂອງນັກຮົບປະຕິບັດທີ່ອຸທິດຊີວິດເພື່ອຊາດ ແລະປະຊາຊົນຊຶ່ງຍາມໃດກໍ່ບໍ່ຍອມຈໍານົນຕໍ່ການທຸບຕີທໍລະມານຂອງສັດຕູ, ຊຶ່ງບົດກະວີນີ້ເຄີຍໄດ້ຮັບລາງວັນທີ 2 ຈາກບັ້ນກວດສອບໃນປີ 2019 ເພື່ອສະເຫຼີມສະຫຼອງເມືອງວຽງໄຊ ຄົບຮອບ 50 ປີ; ສ່ວນບົດກະວີ “ແຍງນາ” ແມ່ນຂຽນ ໂດຍທ່ານ ນາງ ຂັນຄໍາ ສຸດທະວິໄລ ມີຄວາມຍາວ 15 ບາດ ໃນປຶ້ມໂຮມກະວີ “ແຍງນາງ” ເນື້ອໃນແມ່ນເວົ້າເຖິງຄວາມສວຍສົດງົດງາມອັນວິຈິດພິດສະດານຂອງລາຍນາກຈາກຜືນແຜຕໍ່າສີມືຂອງແມ່ຍິງລາວ ແລະເປັນອາພອນປະດັບກາຍທີ່ເປັນເອກະລັກຂອງແມ່ຍິງລາວມາເປັນເວລາດົນນານຊຶ່ງມີຕໍານານຕິເພັນກັບວິຖີຊີວິດຂອງປະຊາຊົນບັນດາເຜົ່າຢູ່ແຕ່ລະຂົງເຂດແຕ່ເໜືອຮອດໃຕ້, ນີ້ແມ່ນໜຶ່ງໃນມູນມໍລະດົກທາງດ້ານວັດທະນະທໍາອັນລໍ້າຄ່າຂອງຊາດ ແລະ ມີຊື່ສຽງໄປທົ່ວໂລກຊຶ່ງຄວນໄດ້ສືບຕໍ່ປົກປັກຮັກສາ ແລະ ເສີມຂະຫຍາຍໃຫ້ໝັ້ນຄົງຕະຫຼອດໄປ.

  ສໍາລັບລາງວັນວັນນະກໍາສ້າງສັນສຸດຍອດແຫ່ງອາຊຽນ (ຊີໄຣ) ປະຈໍາປີ 2020 ມີບົດເລື່ອງສັ້ນເຂົ້າຮ່ວມປະກວດໃນຮອບສຸດທ້າຍຈໍານວນ 9 ເຫຼັ້ມ ໃນນີ້ຊະນະເລີດແມ່ນບົດເລື່ອງສັ້ນ “ເຄິ່ງຄ່າ” ຂຽນໂດຍທ່ານ ອຸດົມ ຮອບຄອບ, ອັນ ດັບທີ 2 “ປຸ່ມມໍລະນະ” ຂຽນໂດຍອາໂນລາດ ພິມໂວຫານ, ອັນດັບທີ 3 ມີ 3 ບົດຄື: “ຮັກນີ້ສຸດຫົວໃຈ” ໂດຍແສງຟ້າໂຫລານຸພາບ, “ສັນຍາຮັກເມື່ອດອນຈານບານ” ໂດຍແຫຍງພິລາກອນ ແລະບົດ “ປີທີ 4” ໂດຍອໍາມະຕະທົດສະຣາຊ.

 ບົດເລື່ອງສັ້ນ “ເຄິ່ງຄ່າ” ຂຽນໂດຍ ທ່ານ ອຸດົມ ຮອບຄອບ ມີຄວາມຍາວ 6 ໜ້າ ເປັນໜຶ່ງໃນປຶ້ມໂຮມເລື່ອງສັ້ນທີ່ມີຊື່ວ່າ “ຂອງດີ”, ເນື້ອໃນຂອງບົດເວົ້າເຖິງຊີວິດຂອງນັກຮົບປະຕິວັດຄົນໜຶ່ງທີ່ຂາກຸດເບື້ອງໜຶ່ງຈາກສົງຄາມຕໍ່ສູ້ກູ້ຊາດ, ຫຼັງຈາກປະເທດຊາດໄດ້ຮັບການປົດປ່ອຍໃໝ່ການດໍາລົງຊີວິຍັງມີຄວາມຫຍຸ້ງຍາກການດູແລນະໂຍ ບາຍຕ່າງໆຍັງຈໍາກັດສົມທົບກັບຄົນຮຸ່ນຫຼັງຈໍານນວນໜຶ່ງຍັງບໍ່ທັນເຂົ້າໃຈໃຫ້ຄວາມສໍາຄັນມູນເຊື້ອຜົນງານຂອງຄົນຮຸ່ນກ່ອນ, ກົງກັນຂ້າມສໍາລັບພະນັກງານອະວຸໂສທ່ານນີ້ຍາມໃດກໍມີຄວາມພາກພູມໃຈທີ່ໄດ້ອຸທິດຕົນໃນພາລະກິດອັນມີກຽດສະຫງ່າງາມສະນັ້ນຈຶ່ງເປັນຂອດຂັດແຍ່ງໜຶ່ງທີ່ເພີ່ນໄດ້ຕໍ່ສູ້ໃຫ້ເຫັນຄວາມຖືກຕ້ອງເປັນທໍາສະ ທ້ອນຈິດໃຈໃຫ້ຄົນທັງຫຼາຍໃນສັງຄົມຫັນມາເອົາໃຈໃສ່ມີນະໂຍບາຍຢ່າງເໝາະສົມຕໍ່ຜູ້ມີຜົນງານຕໍ່ປະເທດຊາດ ແລະການປະຕິວັດ.

  ໃນຕອນທ້າຍພິທີທ່ານ ບົວເງິນ ຊາພູວົງ ໄດ້ຕີລາຄາສູງຕໍ່ຜົນສໍາເລັດໃນການຈັດຕັ້ງບັ້ນກວດສອບໃນຄັ້ງນີ້ກໍຄືການແຂ່ງຂັນລາງວັນລະດັບພາກພື້ນ, ພ້ອມນັ້ນທ່ານຍັງໄດ້ຊີ້ທິດເຍືອງທາງໃຫ້ບັນດານັກປະພັນນັກກະວີທັງຫຼາຍສືບຕໍ່ອຸທິດຜົນງານປາຍປາກກາຂອງຕົນໃຫ້ຫຼາຍ ແລະແຫຼມຄົມກວ່າເກົ່າເຂົ້າໃນພາລະກິດປົກປັກຮັກສາ ແລະພັດທະນາປະເທດຊາດຂອງພວກເຮົາ.

แชร์