ໂຮມຊຸມນຸມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ

ຂ່າວ: ບຸນຕຽງ ຈັນທະວົງ

   ກະຊວງປ້ອງກັນຄວາມສະຫງົບຈັດພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 60 ປີ (5 ເມສາ 1961-5 ເມສາ          2021) ທີ່ສະໂມສອນກະຊວງປ້ອງກັນຄວາມສະຫງົບສະໜາມມ້າ, ນະຄອນຫຼວງວຽງຈັນ ໃນວັນທີ 5  ເມສາ 2021. ມີສະຫາຍ ທອງລຸນ ສີສຸລິດ ເລຂາທິການ ໃຫຍ່ຄະນະບໍລິຫານງານສູນກາງພັກ, ປະທານປະເທດ, ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ,ນາຍົກລັດຖະມົນຕີ,ພ້ອມດ້ວຍບັນດາການນໍາພັກ-ລັດຂັ້ນສູງ, ພະນັກງານອາວຸໂສບຳນານ, ແຂກຮັບເຊີນ, ນາຍ ແລະພົນຕຳຫຼວດເຂົ້າຮ່ວມ.

  ພົນໂທ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກລັດຖະມົນຕີກະຊວງປ້ອງກັນຄວາມສະຫງົບໄດ້ກ່າວຄຳເຫັນຍົກໃຫ້ເຫັນເຖິງມູນເຊື້ອແຫ່ງການເຕີບໃຫຍ່ຂະຫຍາຍຕົວຂອງກຳລັງປ້ອງກັນຄວາມສະຫງົບປະຊາຊົນຕະຫຼອດໄລຍະ 60 ປີຜ່ານມາ,ປະຫວັດສາດແຫ່ງການກຳເນີດ ແລະຄວາມເປັນມາຂອງກໍາລັງປ້ອງກັນຄວາມສະຫງົບປະຊາຊົນແມ່ນຕິດພັນສະໜິດແໜ້ນກັບມູນເຊື້ອອັນສະຫງ່າງາມຂອງຊາດ, ມູນເຊື້ອແຫ່ງການນຳພາອັນປີຊາສາມາດສະຫຼາດສ່ອງໃສຂອງພັກເຮົາໃນພາລະກິດການປະຕິວັດປົດປ່ອຍຊາດໃນເມື່ອກ່ອນກໍຄືພາລະກິດປົກປັກຮັກສາ ແລະສ້າງສາພັດທະນາປະເທດຊາດໃນປະຈຸບັນ, ຕະຫຼອດໄລຍະ 60 ປີ ແຫ່ງການກຳ ເນີດ ແລະເຕີບໃຫຍ່ຂະຫຍາຍຕົວຂອງກຳລັງປ້ອງກັນຄວາມສະຫງົບປະຊາຊົນ, ມັນແມ່ນຂະບວນວິວັດແຫ່ງການທົດສອບອັນໃຫຍ່ຫຼວງໃນການຕໍ່ສູ້ຍືດເຍື້ອຍາວນານ, ລະອິດລະອ້ຽວ, ດຸເດືອດຂ້ຽວຂາດ, ຫຍຸ້ງຍາກ ລໍາບາກນາໆປະການ, ດ້ວຍນໍ້າໃຈປະ ຕິວັດອັນສູງສົ່ງຂອງກໍາລັງປ້ອງກັນຄວາມສະຫງົບປະຊາຊົນໄດ້ເສີມຂະຫຍາຍມູນເຊື້ອຕໍ່ສູ້ອັນເດັດດ່ຽວອາດຫານ, ບໍ່ຍອມຈຳນົນຍາດໄດ້ຜົນງານໄຊຊະນະອັນໃຫຍ່ຫຼວງ, ພ້ອມກັນນັ້ນ,ກຳລັງປ້ອງກັນຄວາມສະຫງົບປະຊາຊົນໄດ້ຮັບການປັບປຸງ-ກໍ່ສ້າງ ແລະເຕີບໃຫຍ່ຂະຫຍາຍຕົວທາງດ້ານຈຳນວນ ແລະຄຸນນະພາບ, ມີຄວາມໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ, ມີລະບຽບວິໄນເຂັ້ມງວດ, ມີຄວາມຊຳນິຊຳນານທາງດ້ານວິຊາສະເພາະ ແລະມີແບບແຜນທັນສະໄໝເປັນກ້າວໆ.

  ໃນໂອກາດທີ່ມີຄວາມໝາຍສໍາຄັນນີ້, ສະຫາຍ ທອງລຸນ ສີສຸລິດ ໄດ້ຂຶ້ນກ່າວສູນທອນພົດ, ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍກໍຄືຕີລາຄາສູງຕໍ່ຜົນງານຂອງກຳລັງປ້ອງກັນຄວາມສະຫງົບປະຊາຊົນທີ່ຍາດມາໄດ້ຕະຫຼອດໄລຍະ 60 ປີ ຜ່ານມາຊຶ່ງບໍ່ວ່າເວລາໃດກໍາລັງປ້ອງກັນຄວາມສະຫງົບປະຊາຊົນແມ່ນເປັນກຳລັງທີ່ສຳ ຄັນໃນການຮັກສາຄວາມສະຫງົບປອດໄພໃນສັງຄົມ ກໍຄືປະກອບສ່ວນສໍາຄັນເຂົ້າໃນຂະບວນການສ້າງສາ ແລະພັດທະນາປະເທດຊາດໃນແຕ່ລະໄລຍະ, ພ້ອມນີ້ທ່ານໄດ້ເນັ້ນໜັກໃຫ້ກຳລັງປ້ອງກັນຄວາມສະຫງົບປະຊາຊົນສືບຕໍ່ເອົາໃຈໃສ່ 7 ວຽກງານສໍາຄັນເພື່ອເຮັດໃຫ້ກໍາລັງປ້ອງກັນຄວາມສະຫງົບປະຊາຊົນນັບມື້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງຄື:

1) ປັບປຸງແບບແຜນວິທີຄົ້ນຄິດ, ວິທີເຮັດວຽກຂອງຖັນແຖວພະນັກງານຂົງເຂດປ້ອງກັນຄວາມສະຫງົບໃຫ້ໄປທ່ວງທັນກັບສະພາບການເລັ່ງທວງປະຈຸບັນ, ທັງຕ້ອງຄາດຄະເນໃຫ້ຖືກຕ້ອງຊັດເຈນສະຖານະການທີ່ເກີດຂຶ້ນ ແລະທີ່ຈະເກີດຂຶ້ນເພື່ອກະກຽມຄວາມພ້ອມທຸກດ້ານຮັບມືໃຫ້ທັນການ, ເປັນເຈົ້າການ, ບໍ່ໃຫ້ຖືກທ່າຮັບໂດຍໃຫ້ມີທັງການປ້ອງກັນເຫດ, ມີທັງການແກ້ໄຂເຫດຕ່າງໆ ໃຫ້ທັນສະພາບການ, ຖືກວິທີ ແລະແນບນຽນສຸຂຸມແຕ່ໜັກແໜ້ນເດັດຂາດສຸດທ້າຍຕ້ອງໃຫ້ໄດ້ໄຊຊະນະ.

2) ໃຫ້ວິໄຈໃຫ້ຖືກຕ້ອງ ແລະວາງແຜນຢ່າງຮັດກຸມ, ຈັດລຽງບູລິມະສິດຂອງສະພາບການທີ່ເກີດຂຶ້ນ ແລະມີຢູ່ປະຈຸບັນຂອງປະເທດເຮົາເພື່ອວາງແຜນໃຫ້ຈັດຕັ້ງປະຕິ ບັດຕາມແຜນບູລິມະສິດໃຫ້ເກີດເປັນຮູບປະທໍາ, ແກ້ອັນໃດກ່ອນ, ແກ້ອັນໃດທັດໄປ, ແກ້ໄຂອັນໃດຕ້ອງໃຫ້ຕົກໄປແຕ່ລະອັນແຕ່ລະກ້າວ.

3) ເພື່ອຮັກສາ ແລະເສີມຂະຫຍາຍມູນເຊື້ອການປ້ອງກັນຊາດ, ປ້ອງກັນຄວາມສະຫງົບທົ່ວປວງຊົນຮອບດ້ານ, ກໍາລັງປະກອບອາວຸດປ້ອງກັນຄວາມສະຫງົບຕ້ອງສືບຕໍ່ລົງສ້າງຮາກຖານຢູ່ທ້ອງຖິ່ນໃຫ້ມີຕາໜ່າງການປ້ອງກັນຄວາມສະຫງົບໃຫ້ໜັກແໜ້ນເຂັ້ມແຂງ, ດຶງເອົາປະຊາຊົນເຂົ້າຮ່ວມ ແລະເຂົ້າຮ່ວມດ້ວຍຄວາມຈິງໃຈ ແລະຈິງ ຈັງ, ດ້ວຍຄວາມຕື່ນຕົວຂອງເຂົາເຈົ້າ, ຢາກໃຫ້ປະຊາຊົນເຂົ້າຮ່ວມ, ພະນັກງານ, ນັກຮົບປ້ອງກັນຄວາມສະຫງົບຕ້ອງເປັນແບບຢ່າງ,ສ້າງຄວາມເຊື່ອໝັ້ນໃຫ້ປະຊາຊົນ, ເປັນທີ່ເພິ່ງຂອງປະຊາຊົນ, ຮ່ວມທຸກຮ່ວມສຸກກັບປະຊາຊົນ, ປະຕິບັດຄໍາຂວັນທີ່ວ່າ “ຕໍາຫຼວດ ແລະປະຊາຊົນຄືໃຫ້ເປັນຄືປາກັບນໍ້າ”.

4) ຕໍາຫຼວດປະຊາຊົນຕ້ອງມີນໍ້າໃຈປົກປ້ອງຊັບສິນສ່ວນລວມ, ຊັບສິນ ແລະຜົນປະໂຫຍດຂອງລັດ, ຊັບສິນ ແລະຜົນປະໂຫຍດຂອງປະຊາຊົນຢ່າງຖືກຕ້ອງ ແລະເປັນທໍາແທ້, ໃຫ້ປະຊາຊົນມີສ່ວນຮ່ວມ, ປະຊາຊົນຮ່ວມມື ແລະປະຊາຊົນກ້າລາຍງານບ໊ອກແສເມື່ອເຫັນສິ່ງທີ່ເກີດຂຶ້ນທີ່ບໍ່ຊອບມາພາກົນທີ່ເປັນອັນຕະລາຍຕໍ່ສັງຄົມ ແລະຕໍ່ພົນລະເມືອງໃນທ້ອງຖິ່ນຂອງເຂົາ ( ຫຼີກທີ່ສຸດການກະທໍາໃດໆທີ່ເຮັດໃຫ້ປະຊາຊົນຢ້ານ,ປະຊາຊົນບໍ່ກ້າເວົ້າ,ປະຊາຊົນບໍ່ກ້າລາຍງານ ແລະບໍ່ກ້າເຂົ້າເຖິງເຈົ້າໜ້າທີ...).

5) ກໍາລັງປ້ອງກັນຄວາມສະຫງົບໃນຍຸກໃໝ່ຕ້ອງພະຍາຍາມກ້າວສູ່ຄວາມທັນສະໄໝ, ກ້າວສູ່ການນໍາໃຊ້ເຕັກໂນໂລຊີໃໝ່,ວິທະຍາສາດໃໝ່ທີ່ສາມາດເຊື່ອມສານໄດ້ຢ່າງວ່ອງໄວທັນການ ແລະຊັດເຈນທັງຢູ່ພາຍໃນ ແລະຕໍ່ຕ່າງປະເທດ.

6) ໃນຍຸກແຫ່ງສັງຄົມຂໍ້ມູນຂ່າວສານທີ່ທັນສະໄໝ ຫຼືຍຸກຂ່າວສັງຄົມທາງອອນລາຍທີ່ແຜ່ຂະຫຍາຍນີ້,ກໍາລັງປ້ອງກັນຄວາມສະຫງົບຕ້ອງມີຕາໜ່າງເກັບກໍາຂ່າວ ແລະຕາໜ່າງຕໍ່ຕ້ານ, ປ້ອງກັນ ແລະສະກັດກັ້ນໃຫ້ທັນການ ແລະ ໄດ້ຜົນ, ບໍ່ປະປ່ອຍໃຫ້ສື່ອອນລາຍກາຍເປັນອາດສະຍາກໍາທະລຸເຂົ້າທໍາລາຍປະເທດຊາດ ຫຼືການໃຊ້ສືອອນ ລາຍສ້າງຄວາມອົນລະເວງໃນສັງຄົມດ້ວຍການມ້າງຄວາມສາມັກຄີສ້າງຄວາມເຂົ້າໃຈຜິດ ແລະສ້າງຄວາມເປັນປໍລະປັກຕໍ່ກັນໃນສັງຄົມ.

7) ກໍາລັງປ້ອງກັນຄວາມສະຫງົບຂອງພວກເຮົາຍັງຕ້ອງໄດ້ສືບຕໍ່ປະຕິບັດແນວທາງການຕ່າງປະເທດໂດຍການສືບຕໍ່ຮ່ວມມືແລະຍາດແຍ່ງການສະໜັບສະໜູນຈາກເພື່ອນມິດເປັນຕົ້ນແມ່ນຕໍ່ກັບ ສສ ຫວຽດນາມ, ສປ ຈີນ ແລະສະຫະພັນລັດເຊຍ ແລະປະເທດເພື່ອນມິດອື່ນໆ ເພື່ອປະຕິບັດພັນທະຂອງຕົນໃນຖານະເປັນພາຄີ ແລະເປັນສະມາຊິກຂອງອີນເຕີໂປນ, ອາຊຽນໂປນແລະອົງການຈັດຕັ້ງສາກົນອື່ນໆ.

แชร์