ມອບ-ຮັບໂຄງການກໍ່ສ້າງຫ້ອງການກະສິກໍາ ແລະປ່າໄມ້ເມືອງຫ້ວຍຊາຍ

ຂ່າວ: ບຸນຈັນ ບຸນປັນຍາ

  ພິທີມອບ-ຮັບໂຄງການກໍ່ສ້າງຫ້ອງການກະສິກໍາ ແລະປ່າໄມ້ ເມືອງຫ້ວຍຊາຍ ຫຼັງໃໝ່ໄດ້ຈັດຂຶ້ນໃນວັນທີ 31 ມີນາຜ່ານມາລະຫວ່າງພະແນກກະສິກໍາ ແລະປ່າໄມ້ແຂວງບໍ່ແກ້ວ  ກັບຫ້ອງການກະສິກໍາ ແລະປ່າໄມ້ເມືອງຫ້ວຍຊາຍ, ໃຫ້ກຽດເຂົ້າຮ່ວມໂດຍທ່ານ ທິບພະກອນ ມະນີຄໍາ ຮອງເຈົ້າເມືອງໆຫ້ວຍຊາຍ, ມີບັນດາຫົວໜ້າ-ຮອງຫົວໜ້າຫ້ອງການ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ອຽມສັກ ຫົວໜ້າຂະແໜງຊົນລະປະທານພະແນກກະສິກໍາ-ປ່າໄມ້ ໄດ້ຂຶ້ນຜ່ານບົດລາຍງານການຈັດຕັ້ງປະຕິບັດໂດຍແມ່ນບໍລິສັດຮວຍຢຶນກໍ່ສ້າງເຄຫາສະຖານ ຈໍາກັດຜູ້ດຽວໄດ້ເລີ່ມລົງມືໃນກໍ່ສ້າງມາແຕ່ວັນທີ 5 ພຶດສະພາ 2020 ຫາວັນທີ 16 ກຸມພາ 2021 ໂດຍໄດ້ຜ່ານການກວດກາຈາກຄະນະຮັບຜິດຊອບການປະມູນ ແລະຄຸ້ມຄອງໂຄງການແມ່ນສໍາເລັດ 100% ໄລຍະເວລາໃນການກໍ່ສ້າງທັງໝົດ 18 ເດືອນ ມູນຄ່າໃນການກໍ່ສ້າງທັງໝົດ 5.244 ລ້ານກວ່າກີບ, ຈາກນັ້ນໄດ້ເຊັນ ບົດບັນທຶກມອບ-ຮັບຫ້ອງການກະສິກໍາ ແລະປ່າໄມ້ ເມືອງຫ້ວຍຊາຍລະຫວ່າງທ່ານ ປາລະມີ ສົມບຸດທະເສນ ຮອງຫົວໜ້າພະແນກກະສິກໍາແລະປ່າໄມ້ແຂວງບໍ່ແກ້ວ ກັບທ່ານ ອະນຸສັກ ສີລິວົງ ຫົວໜ້າຫ້ອງການກະສິກໍາ ແລະປ່າໄມ້ ເມືອງຫ້ວຍຊາຍ.

 ໂອກາດນີ້, ທ່ານ ທິບພະກອນ ມະນີຄໍາ ໄດ້ມີຄໍາເຫັນຍ້ອງຍໍຊົມເຊີຍຕໍ່ຜົນງານ ແລະຜົນສໍາເລັດໃນຄັ້ງນີ້ ແລະໄດ້ເນັ້ນໜັກໃຫ້ພະນັກງານທຸກຄົນຈົ່ງພ້ອມກັນສືບຕໍ່ຕັ້ງໜ້າປະຕິບັດວຽກງານວິຊາສະເພາະຂອງຕົນໃຫ້ຖືກຕ້ອງ ແລະຕິດພັນກັບການປົກປັກຮັກສາຄຸ້ມຄອງ ແລະນໍາໃຊ້ຫ້ອງການຫຼັງໃໝ່ນີ້ໃຫ້ໄດ້ຮັບຜົນດີ ແລະນໍາໃຊ້ໄດ້ຍາວນານ.

แชร์