ທົ່ວປະເທດປັກດຳເຂົ້ານາແຊງສຳເລັດ 90%

  ຕາມການລາຍງານຂອງກະຊວງກະສິກໍາ ແລະ ປ່າໄມ້ໃຫ້ຮູ້ວ່າ: ທົ່ວປະເທດສາມາດປັກດໍານາແຊງທົ່ວສຳເລັດແລ້ວ 82.743 ເຮັກຕາເທົ່າກັບ 90% ຂອງເນື້ອທີ່ແຜນການ 91.500 ເຮັກຕາ, ຖ້າສົມທຽບໃສ່ເດືອນຜ່ານມາເພີ້ມຂຶ້ນ 32%. ໃນນັ້ນ: ແຂວງພາກໃຕ້ປະຕິບັດ ໄດ້103%, ພາກກາງ 90% ແລະ ພາກເໜືອ 69% ສາເຫດຂອງການປັກດໍາຊັກຊ້າເປັນຍ້ອນສະພາບອາກາດມີການປ່ຽນແປງໂດຍສະເພາະແຂວງພາກເໜືອໃນຊ່ວງເດືອນມັງກອນມີອາກາດໜາວເຢັນຢູ່ພາກກາງ ແລະພາກໃຕ້ແມ່ນໍ້າຂອງ, ແມ່ນໍ້າສາຂາ ແລະອ່າງເກັບນໍ້າຕ່າງໆແມ່ນຢູ່ລະດັບຕໍ່າມີຜົນກະທົບຕໍ່ການຜະລິດໃນຊ່ວງໄລຍະນີ້ຈະສຸມໃສ່ການບົວລະບັດຮັກສາ, ການໃສ່ຝຸ່ນ ແລະເຝົ້າລະວັງສັດຕູພືດອື່ນໆ.

 ການປູກພືດ: ຄຽງຄູ່ກັບການປັກດຳເຂົ້ານາແຊງເຈົ້າໜ້າທີ່ກະສິກຳຍັງໄດ້ສຸມໃສ່ຊຸກຍູ້ຊາວກະສິກອນປູກພືດລະດູແລ້ງຢ່າງເປັນຂະບວນກວ້າງຂວາງ,ໂດຍສະເພາະແມ່ນພືດໄລຍະສັ້ນ,ປູກໄດ້ຫຼາຍຮອບວຽນ,ເພື່ອຕອບສະໜອງຄວາມຕ້ອງການຂອງຕະຫຼາດ,ກົມປູກຝັ່ງຍັງໃຫ້ຮູ້ອີກວ່າປະຈຸບັນຂະແໜງການຂອງຕົນໄດ້ຊຸກຍູ້ທ້ອງຖິ່ນຕ່າງໆ ໃຫ້ເອົາໃຈໃສ່ບົວລະບັດຮັກສາ ແລະປົວແປງລະບົບຊົນລະປະທານ, ເພື່ອຮັບປະກັນໃຫ້ແກ່ການສະໜອງນໍ້າຮັບໃຊ້ການຜະລິດລະດູແລ້ງໃຫ້ພຽງພໍ.

   ຮອດປະຈຸບັນຊາວກະສິກອນສາມາດໄດ້ປູກພືດຜັກຊະນິດຕ່າງໆໄດ້ແລ້ວ 91.052 ເຮັກຕາ ເທົ່າກັບ 60% ຂອງແຜນການ 152.000 ເຮັກຕາ, ພືດທີ່ປູກຫຼາຍກວ່າໝູ່ແມ່ນໝາກໄມ້ 31.874 ເຮັກຕາ, ພືດຜັກ 26.201 ເຮັກຕາ, ອ້ອຍ 11.206 ເຮັກຕາ, ມັນຕົ້ນ 5.244 ເຮັກຕາສາລີແຂງ 2.366 ເຮັກຕາ ແລະ ສາ ລີຫວານ 1.748 ເຮັກຕາ ໃນນັ້ນ, ແຂວງທີ່ປູກພືດຫຼາຍກວ່າໝູ່ແມ່ນພາກກາງປະຕິບັດໄດ້ 39.829 ເຮັກຕາ, ພາກເໜືອ 30. 199 ເຮັກຕາ ແລະພາກໃຕ້ 21. 024 ເຮັກຕາ. ສໍາລັບພືດຜັກແມ່ນເກັບກູ້ໄດ້ຫຼາຍຮອບແລ້ວເປັນຕົ້ນ: ໝາກຖົ່ວ, ຜັກສະລັດ, ຜັກຫອມ, ຜັກບົ່ວ, ຜັກກາດ, ຫອມລາບ..

แชร์