ເຜີຍແຜ່ຂໍ້ມູນແກ່ສື່ມວນຊົນກ່ຽວກັບວັກແຊງໂຄວິດ

 ວັນທີ 31 ຜ່ານມາທີ່ໂຮງແຮມລາວພຣາຊາ ນະຄອນຫຼວງວຽງຈັນ ສູນສື່ສານເພື່ອສຸຂະພາບ ແລະສຸຂະສຶກສາກະຊວງສາທາລະນະສຸກໄດ້ຈັດກອງປະຊຸມເຜີຍແຜ່ຂໍ້ມູນແກ່ສື່ມວນຊົນກ່ຽວກັບວັກແຊງໂຄວິດ-19 ເພື່ອແຈ້ງໃຫ້ສື່ມວນຊົນຮູ້ກ່ຽວກັບການຈັດຕັ້ງປະຕິບັດການສັກຢາປ້ອງກັນພະຍາດໂຄວິດ-19 ໂດຍສຸມໃສ່ວັກແຊງທີ່ໄດ້ຮັບການສະໜັບສະໜູນຈາກໂຄງການຮ່ວມມືເພື່ອວັກແຊງປ້ອງກັນພະຍາດໂຄວິດ-19 ຫຼື COVAX; ເພື່ອສ້າງຄວາມໄວ້ວາງໃຈກ່ຽວກັບຄວາມປອດໄພ ແລະ ປະສິດທິ ພາບຂອງວັກແຊງໂຄວິດ-19 ໃນບັນດາຜູ້ຄົນ ແລະກະຕຸ້ນໃຫ້ເຂົາເຈົ້າມາຮັບການສັກວັກແຊງໂດຍການເຂົ້າຮ່ວມຂອງທ່ານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ມີຜູ້ຕາງໜ້າຈາກອົງການອຸຍນີເຊບປະຈຳລາວ, ອົງການອະນາໄມໂລກປະຈຳລາວ ແລະບັນດາສື່ມວນຊົນລາວເຂົ້າຮ່ວມ.

 ໃນໂອກາດດັ່ງກ່າວ, ທ່ານ ດຣ. ພູທອນ ເມືອງປາກ ໄດ້ມີຄຳເຫັນວ່າ: ກອງປະຊຸມໃນຄັ້ງນີ້,ເປັນການແລກປ່ຽນຄວາມຄິດເຫັນຮ່ວມກັນສຳຄັນແມ່ນໃຫ້ເນັ້ນລະຫວ່າງຜູ້ໃຫ້ຂໍ້ມູນ ແລະ ຜູ້ທີ່ຈະນຳຂໍ້ມູນໄປເຜີຍແຜ່ອອກຂ່າວເພື່ອເຮັດໃຫ້ການແຈກຢາຍວັກແຊງບັນລຸຕາມລະດັບຄາດໝາຍທີ່ວາງໄວ້ວຽກງານສື່ສານແມ່ນມີຄວາມສຳຄັນຫຼາຍໃນວຽກງານສັກຢາວັກແຊງເພາະຈະຊ່ວຍໃຫ້ປະຊາຊົນຮັບຮູ້ ແລະເຂົ້າໃຈຖືກຕ້ອງກ່ຽວກັບຢາວັກແຊງໂຄວິດ-19 ຜ່ານສື່ຕ່າງໆໄດ້ຫຼາຍຂຶ້ນ.

 ທ່ານ ນາງ ເພຍ ເຣເບລໂລ ບຣິດໂຕ ຜູ້ຕາງໜ້າຈາກອົງການອຸຍນີເຊບປະຈຳລາວ ກໍໄດ້ມີຄຳເຫັນວ່າ: ວັກແຊງທີ່ເຂົ້າມາໃນ ສປປ ລາວ ແມ່ນໄດ້ຮັບສິດສະເໝີພາບກັບປະເທດອື່ນເພື່ອສັກໃຫ້ກັບກຸ່ມສ່ຽງທີ່ເປັນບູລິມະສິດເປັນຕົ້ນແມ່ນກຸ່ມທີ່ເຮັດວຽກຢູ່ໂຮງໝໍ,ກຸ່ມທີ່ເຮັດວຽກຢູ່ດ່ານ ແລະກຸ່ມທີ່ເຮັດວຽກຢູ່ສະຖານທີ່ຈຳກັດບໍລິເວນທັງຂອງພາກລັດ ແລະເອກະຊົນ.

แชร์