ສກຈຮ ທະວີຊັບ ເປີດກອງປະຊຸມ

  ວັນທີ 31 ມີນາ 2021 ນີ້ ສະຖາບັນການເງິນຈຸລະພາກທີ່ບໍ່ຮັບເງິນຝາກ ທະວີຊັບ ແຂວງອັດຕະປື ໄດ້ໄຂກອງປະຊຸມສະໄໝສາມັນປະຈຳປີ 2020 ຂຶ້ນທີ່ຫໍປະຊຸມໃຫ່ຍຂອງແຂວງ, ໂດຍການເຂົ້າຮ່ວມຂອງທ່ານ ສູນນະຄອນ ແກ້ວວຽງຄຳ ກຳມະການພັກແຂວງຫົວໜ້າ ພະແນກແຜນການ ແລະການລົງທຶນ ແຂວງອັດຕະປື, ມີທ່ານ ບົວຈັນ ແກ້ວມະນີ ຮອງຫົວໜ້າກົມຄຸ້ມຄອງສະຖາບັນການເງິນທະນາຄານ ແຫ່ງ ສປປ ລາວ,ມີອຳນາດການປົກຄອງເມືອງ ແລະທະນະຄານປະຈຳບ້ານພາຍໃນແຂວງເຂົ້າຮ່ວມ.

  ໃນວາລະສໍາຄັນຂອງກອງປະຊຸມ ທ່ານ ສີທັດ ນິນເພັດ ຜູ້ຈັດການສະຖາບັນການເງິນຈຸລະພາກທີ່ບໍ່ຮັບເງິນຝາກທະວີຊັບແຂວງອັດຕະປືໄດ້ສະຫຼຸບການຈັດຕັ້ງປະຕິບັດວຽກງານທະນາຄານບ້ານປະຈໍາປີ 2020 ຊຶ່ງເຫັນໄດ້ທວງທ່າຂະຫຍາຍຕົວສາມາດບັນລຸຕາມແຜນການທີ່ວາງໄວ້ເປັນຕົ້ນປີ 2020 ທົ່ວແຂວງມີທະນາຄານບ້ານ 85 ບ້ານ, ເທົ່າກັບ 99% ຂອງແຜນການປີ, ມີສະມາຊິກ 11.972 ຄົນ, ເທົ່າກັບ 99% ຂອງແຜນການປີ, ມີຍອດເງິນຝາກຂອງທະນາບ້ານ 31 ຕື້ກວ່າກີບ, ທຽບໃສ່ແຜນປະຕິບັດໄດ້ 121%,ມີຍອດເງິນກູ້ 25 ຕື້ກວ່າກີບ,ເທົ່າກັບ 105% ແລະເງິນກູ້ທັງໝົດຂອງສະຖາບັນ 920 ລ້ານກວ່າກີບ, ເງິນກູ້ມອບເໝົາ 500 ລ້ານກວ່າກີບ ແລະມີເງິນກູ້ລາຍຍ່ອຍ 410 ລ້ານກວ່າກີບ.

  ກອງປະຊຸມສະໄໝສາມັນປະຈຳປີ 2020 ຂອງສະຖາບັນການເງິນຈຸລະພາກທີ່ບໍ່ຮັບເງິນຝາກທະວີຊັບຍັງໄດ້ຮັບຟັງບົດລາຍງານໃນການດຳເນີນງານຂອງສະພາບໍລິ ຫານ, ບົດລາຍງານວຽກງານກວດສອບພາຍໃນ, ບົດລາຍງານວຽກງານສິນເຊື່ອສະຖາບັນການເງິນຈຸລະພາກທີ່ບໍ່ຮັບເງິນຝາກມາເປັນສະມາຄົມສະຖາບັນການເງິນ, ບົດລາຍງານກ່ຽວກັບການໃຫ້ຄວາມຮູ້ພື້ນຖານດ້ານການເງິນ, ບົດລາຍງານຜົນການດຳເນີນງານຂອງສະຖາບັນ ແລະ ຮັບຮອງການແບ່ງສັກສ່ວນເງິນປັນຜົນປະຈໍາປີ 2020 ແລະ ທິດທາງແຜນການ 2021 ເພື່ອຮັບຮອງການຫັນປ່ຽນຮູບແບບຈາກສະຖາບັນການເງິນຈຸລະພາກທີ່ບໍ່ຮັບເງິນຝາກທະວີຊັບມາເປັນສະມາຄົມສະຖາບັນການເງິນ, ພ້ອມນີ້ກອງປະຊຸມຍັງໄດ້ຄັດເລືອກສະມາຊິກສະພາບໍລິຫານສະມາຄົມການເງິນ ແລະໄດ້ຟັງການຜ່ານພາລະບົດບາດສະມາຄົມການເງິນ.

  ໃນໂອກາດດຽວກັນນີ້ທ່ານ ສູນນະຄອນ ແກ້ວວຽງຄຳ ແລະທ່ານ ບົວຈັນ ແກ້ວມະນີ ກໍ່ໄດ້ຜັດປ່ຽນກັນຂຶ້ນມອບໃບຍ້ອງຍໍຂອງທ່ານເຈົ້າແຂວງໃຫ້ແກ່ກົມກອງລວມໝູ່ຜູ້ທີ່ມີຜົນງານດີເດັ່ນ 29 ສະຫາຍ ແລະບຸກຄົນດີເດັ່ນທີ່ມີຜົນງານດີເດັ່ນໃນການຈັດຕັ້ງປະຕິບັດວຽກງານທະນາຄານບ້ານຈຳນວນ 5 ສະຫາຍ ຢ່າງສົມກຽດ.

ຂ່າວ: ໄຊຈະເລີນ

แชร์