ມອບ-ຮັບໜ້າທີ່ລັດຖະມົນກະຊວງ ສສກ

  ວັນທີ 1 ເມສາຜ່ານມາຢູ່ກະຊວງສຶກສາທິການ ແລະກີລາໄດ້ມີ ພິທີມອບ-ຮັບໜ້າທີ່ລັດຖະມົນກະຊວງສຶກສາທິການ ແລະກີລາລະຫວ່າງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ (ຜູ້ເກົ່າ) ແລະທ່ານ ພຸດ ສິມມາລາວົງ ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງສຶກສາທິການ ແລະກີລາ (ຜູ້ໃໝ່) ໂດຍການເຂົ້າຮ່ວມຂອງທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ມີບັນດາຄະນະພັກ-ຄະນະນໍາກະຊວງດັ່ງ ກ່າວເຂົ້າຮ່ວມ.

  ທ່ານນາງ ແສງເດືອນ ຫຼ້າຈັນທະບູນ ໄດ້ກ່າວວ່າ: ຕະຫຼອດໄລຍະ 5 ປີຜ່ານມາ, ຂ້າພະເຈົ້າພ້ອມດ້ວຍໝູ່ຄະນະຂັ້ນຕ່າງໆໄດ້ພ້ອມກັນຄົ້ນຄວ້າ ແລະເສີມຂະຫຍາຍແນວທາງນະໂຍບາຍຂອງພັກ, ໄດ້ຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ ແລະມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກກະຊວງກໍຄືແຜນພັດທະນາຂະແໜງການສຶກສາ ແລະກີລາຄັ້ງທີ VIII ຊຶ່ງມີຜົນສຳເລັດສູງພໍສົມຄວນ. ສຳລັບສິ່ງທີ່ຍັງຄົງຄ້າງ ແລະບໍ່ທັນສຳເລັດແມ່ນໄດ້ມີການຕີລາຄາ ແລະໄດ້ກຳ ນົດວິທີແກ້ໄຂໄວ້ຢູ່ໃນແຜນພັດທະນາຂະແໜງການສຶກສາ ແລະກີລາໃນ 5 ປີຄັ້ງທີ IX (2021-2025) ຂ້ອນຂ້າງຈະແຈ້ງຕາມມະຕິກອງປະຊຸມຜູ້ບໍລິຫານການສຶກສາ ແລະກີລາເພື່ອໃຫ້ຄະນະນຳຂອງກະຊວງຊຸດໃໝ່ໄດ້ນຳໄປຜັນຂະຫຍາຍເຂົ້າສູ່ ຕົວຈິງໃຫ້ມີຜົນສໍາເລັດເປັນກ້າວໆ.

  ໂອກາດນີ້, ທ່ານ ກິແກ້ວ ໄຂຄໍາພິທູນ ກໍໄດ້ໃຫ້ກຽດໂອ້ລົມຕໍ່ພິທີວ່າ: ການສັບປ່ຽນໜ້າທີ່ ຫຼືການສືບທອດປ່ຽນແທນຂອງພະນັກງານການນຳຂັ້ນສູງພັກ-ລັດ ບໍ່ວ່າຈະຢູ່ສູນກາງ ຫຼືທ້ອງຖິ່ນແມ່ນນະໂຍບາຍ,ຫຼັກການ ແລະເປັນລະບຽບການຂອງພັກ ແລະລັດທີ່ກຳນົດໄວ້ແນໃສ່ປັບປຸງການຈັດຕັ້ງ ແລະບຸກຄະລາກອນໃຫ້ສອດຄ່ອງ ແລະ ຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່, ພ້ອມທັງໄດ້ເນັ້ນໃຫ້ຄະນະພັກ, ຄະນະນໍາ ແລະພະນັກງານທົ່ວກະຊວງສຶກສາທິການ ແລະກີລາເພີ່ມທະວີຄວາມເອົາໃຈໃສ່ໃນບາງບັນຫາສໍາຄັນເປັນຕົ້ນຕ້ອງມີຄວາມເປັນເອກະພາບສູງນຳຂັ້ນເທິງໂດຍເປັນເຈົ້າການເຮັດວຽກງານສຶກສາອົບຮົມນຳພາແນວຄິດຂອງພະນັກງານ, ສະມາຊິກພັກຢູ່ແຕ່ລະຂັ້ນ, ຕ້ອງເດັດດ່ຽວສະກັດກັ້ນບໍ່ໃຫ້ມີການສວຍໂອກາດເພື່ອໃສ່ຮ້າຍປ້າຍສີທັບຖົມໂຈມຕີກັນໃນທາງບໍ່ດີ, ສຸມໃສ່ຈັດຕັ້ງປະຕິ ບັດວຽກງານວິຊາສະເພາະຕາມເປົ້າໝາຍທີ່ກອງປະຊຸມໃຫຍ່ກະຊວງໄດ້ວາງໄວ້ໃຫ້ປາກົດຜົນເປັນຈິງ, ບຳລຸງກໍ່ສ້າງ ແລະ ຍົກລະດັບຄວາມຮູ້ຄວາມສາມາດໃຫ້ພະນັກ ງານ, ປັບປຸງຄວາມຮູ້ທາງດ້ານວິຊາການ ແລະທັກສະດ້ານການສິດສອນຂອງຄູຊັ້ນປະຖົມສຶກສາໂດຍໃຫ້ບູລິມະສິດໃນການຈັດສັນຊັບພະຍາກອນທີ່ມີເຂົ້າໃນວຽກງານປະ ຖົມສຶກສາໃຫ້ພຽງພໍ, ສະໜອງການສຶກສາຂັ້ນພື້ນຖານທີ່ມີຄຸນນະພາບໂດຍສະເພາະຊັ້ນມັດທະຍົມສຶກສາຕອນປາຍ, ອາຊີວະສຶກສາ ແລະ ການສຶກສາຊັ້ນສູງເພື່ອປະ ກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດກໍຄືການສ້າງຄວາມເຂັ້ມແຂງໃຫ້ແກ່ຜູ້ບໍລິຫານການສຶກສາ ແລະກີລາ ໃນທຸກລະດັບເພື່ອປັບປຸງປະສິດທິພາບ, ປະສິດທິຜົນເພື່ອແກ້ໄຂຄວາມແຕກໂຕນໃນວຽກງານການສຶກສາ ແລະກີລາຢູ່ຕົວເມືອງ ແລະ ຊົນນະບົດ, ພ້ອມທັງສືບຕໍ່ກໍ່ສ້າງ ແລະ ພັດທະ ນາບຸກຄະລາກອນການກີລາ-ກາຍະກຳໃຫ້ມີຄຸນນະພາບ ແລະສາມາດແຂ່ງຂັນກັບພາກພື້ນ ແລະສາກົນໄດ້ເທື່ອລະກ້າວ.

แชร์