ສິນຄ້າເກືອບ 150 ບູດ ຮ່ວມວາງສະແດງຕະຫລາດນັດໂອດ໋ອບສັນຈອນ

  ງານຕະຫລາດນັດໂອດ໋ອບສັນຈອນ (ODOP Lao Carnival) ໄດ້ເປີດຂຶ້ນໃນວັນທີ 1 ເມສາ 2021 ທີ່ສູນການຄ້າພາກຊັນນະຄອນຫລວງວຽງຈັນ ໂດຍກົມສົ່ງເສີມການຄ້າກະຊວງອຸດສາຫະກຳ ແລະການຄ້າຮ່ວມກັບວິສາຫະກິດສ່ວນບຸກຄົນວາລະສານໄປໃສຊຶ່ງໃຫ້ກຽດເຂົ້າຮ່ວມຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະການຄ້າ(ອຄ), ທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າ, ມີຫົວໜ້າກົມ, ຮອງຫົວໜ້າກົມອ້ອມຂ້າງກະຊວງອຄ, ພະແນກ ອຄ ນະຄອນຫລວງ, ຜູ້ຕາງໜ້າສະຖານທູດປະຈຳລາວ, ຜູ້ຕາງໜ້າອົງການຈັດຕັ້ງສາກົນປະຈຳລາວ, ບໍລິສັດທີ່ໃຫ້ການສະໜັບສະໜູນ ແລະ ເຈົ້າຂອງທຸລະກິດທີ່ເຂົ້າ ຮ່ວມ.

 ທ່ານ ຄໍາພະມິດ ໄຊຍະສົມບັດ ທີ່ປຶກາວິສາຫະກິດສ່ວນບຸກຄົນວາລະສານໄປໃສລາຍງານວ່າ: ຕໍ່ກັບສະພາບເສດຖະກິດໃນຍຸດການແຜ່ລະບາດຂອງພະຍາດໂຄວິດ-19 ໃນໄລຍະແຕ່ທ້າຍປີ 2019 ຈົນມາເຖິງປະຈຸບັນເຮັດໃຫ້ກະທົບຕໍ່ສະພາບເສດຖະກິດຂອງບັນດາປະເທດໃນທົ່ວໂລກ ແລະປະເທດລາວເຮົາກໍ່ເຊັ່ນດຽວກັນ, ຕໍ່ກັບສະພາບດັ່ງກ່າວນີ້ວິສາຫະກິດສ່ວນບຸກຄົນວາລະສານໄປໃສຈຶ່ງປຶກສາຫາລືກັບກົມສົ່ງເສີມການຄ້າກະຊວງ ອຄ ເພື່ອຫາວິທີທາງຊ່ວຍເຫຼືອຜູ້ປະກອບການຂອງລາວໂດຍສະເພາະ

ແມ່ນຫົວໜ່ວຍທຸລະກິດຂະໜາດນ້ອຍ ແລະກາງໄດ້ສາມາດຜ່ານຜ່າວິກິດການແຜ່ລະບາດຂອງພະຍາດໂຄວິດ-19 ນີ້ໄດ້ ຫຼືອີກດ້ານໜຶ່ງກໍ່ແມ່ນການຫັນວິກິດໃຫ້ເປັນໂອກາດໃນການປັບປຸງຕົວເອງຂອງຜູ້ປະກອບການຂະໜາດນ້ອຍ ແລະກາງໃຫ້ມີຄວາມເຂັ້ມແຂງໃນຊ່ວງນີ້ ແລະຍ້ອນການເຄື່ອນຍ້າຍສິນຄ້າ ຫຼືການນຳເຂົ້າສິນຄ້າຂອງຕ່າງປະເທດມີຄວາມຫຍຸ້ງຍາກຕົ້ນທຶນເພີ່ມຂຶ້ນ ແລະບັນຫາອື່ນໆອີກ...ດັ່ງນັ້ນຫົວໜ່ວຍທຸລະກິດຂະໜາດນ້ອຍ ແລະກາງຂອງລາວຄວນຫັນມາປັບໂຕເພື່ອຍາດເອົາ

ລູກຄ້າ ຫຼືຕີຕະລາດພາຍໃນຂອງເຮົາໃຫ້ໄດ້. ດ້ວຍເຫດຜົນທີ່ກ່າວມານີ້ວິສາຫະກິດສ່ວນບຸກຄົນວາລະສານໄປໃສຈຶ່ງໄດ້ຮ່ວມກັບກົມສົ່ງເສີມການຄ້າຈັດງານຕະຫລາດນັດໂອດ໋ອບສັນຈອນ ຫຼື (ODOP Lao Carnival) ຂຶ້ນໃນຂອບເຂດທົ່ວປະເທດ,ເພື່ອເປັນເວທີ່ໃຫ້ຜູ້ປະກອບການຂອງລາວໄດ້ປຶກສາຫາລືຊຶ່ງກັນ ແລະກັນໃນການປັບ ປຸງສິນຄ້າຂອງຕົນໃຫ້ສາມາດແຂ່ງຂັ້ນ ແລະຊື້ຂາຍໄດ້ໃນທ້ອງຕະລາດ ແລະກ້າວໄປເຖິງການສົ່ງອອກໄປຕ່າງປະເທດ.

  ສໍາລັບງານຄັ້ງນີ້ແມ່ນຈັດຂຶ້ນເປັນເວລາ 4 ວັນ ເລີ່ມແຕ່ວັນທີ 1-4 ເມສາ 2021 ທີ່ສູນການຄ້າພາກຊັນຊຶ່ງແບ່ງອອກເປັນ 3 ໂຊນຄື: ໂຊນວາງສະແດງສິນຄ້າໂອດ໋ອບ, ສິນຄ້າຄອບຄົວຕົວແບບ ແລະສິນຄ້າທ່າແຮງຈຳນວນ 50 ບູດ, ໂຊນວາງສະແດງສິນຄ້າກ່ຽວກັບການສຶກສາ ແລະເຄຶ່ອງນຸ່ງຮົມ ຈຳນວນ 42 ບູດ, ໂຊນອາຫານ, ເຄື່ອງດື່ມ ແລະພືດຜັກຈຳນວນ 55 ບູດ.

  ນອກຈາກນີ້ຍັງມີກິດຈະກຳຕ່າງໆເພື່ອສົ່ງເສີມຫົວຄິດປະດິດສ້າງ ແລະສົ່ງເສີມການນຳໃຊ້ສິນຄ້າລາວ ແລະກະຕ່າອວຍພອນ (ກະຕ່າຂອງຂັວນສິນຄ້າລາວ) ແລະ ກິດຈະກຳອື່ນໆເຊັ່ນ: ການປະກວດສິນຄ້າໂອດ໋ອບດີເດັ່ນ, ການປະກວດຈັດກະຕ່າອວຍພອນສິນຄ້າໂອດ໋ອບ ແລະ ສິນຄ້າລາວ, ເວທີສົນທະນາການລິເລີ່ມທຸລະກິດ Startup ແລະທຸລະກິດຊຸມຊົນ, ເວທີສົນທະນາການເຂົ້າຫາແຫລ່ງທຶນດອກເບັ້ຍຕໍ່າ SME,ກິດຈະກຳຊວນຊີມອາຫານ ແລະກິດຈະກຳຂອງນ້ອງນັກສຶກສາກ່ຽວກັບການສຶກສາຕ່າງໆ, ການສະແດງສິນລະປະວັດທະນາທຳລາວ ແລະອື່ນໆ.

แชร์