7 ບ້ານເມືອງໄຊບູລີສຳເລັດສ້າງທາງພາຍໃນບ້ານ

ຂ່າວ: ເມືອງໄຊບູລີ

  ທ້າຍອາທິດຜ່ານມາທີ່ຫ້ອງການບ້ານຫາດຊາຍສູງ ເມືອງໄຊບູລີ ແຂວງສະຫວັນນະເຂດ ໄດ້ຈັດກອງປະຊຸມສະຫຼຸບວຽກງານການຈັດຕັ້ງປະຕິບັດໂຄງການກໍ່ສ້າງທາງເບຕົງຂອງບັນດາບ້ານພາຍໃນເມືອງ, ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ສີວິໄລ ອິນທະລືໄຊ ຮອງເຈົ້າເມືອງໄຊບູລີ, ມີຫົວໜ້າຫ້ອງການຕ່າງໆທີ່ກ່ຽວ ຂ້ອງ, ພະນັກງານວິຊາການຕະຫຼອດຮອດອໍານາດການປົກຄອງບ້ານເຂົ້າຮ່ວມ.

  ທ່ານ ຄໍາໝັ້ນ ສຸພິຫາລາດ ຫົວໜ້າຫ້ອງວ່າການປົກຄອງເມືອງກໍ່ໄດ້ຜ່ານບົດສະຫຼຸບໃນການຈັດຕັ້ງປະຕິບັດໂຄງການກໍ່ສ້າງເສັ້ນທາງເບຕົງຂອງບັນດາບ້ານພາຍໃນເມືອງຊຶ່ງໄດ້ຮູ້ວ່າ: ມາຮອດປະຈຸບັນແມ່ນໄດ້ຈັດຕັ້ງປະຕິບັດການກໍ່ສ້າງສຳເລັດແລ້ວຈໍານວນ 7 ບ້ານ ໃນນີ້ມີບ້ານເວີນເໜືອໄດ້ກໍ່ສ້າງເສັ້ນທາງເບຕົງມີຄວາມຍາວ 1.500 ແມັດ, ກວ້າງ 4,5 ແມັດ, ໜາ 10 ຊັງຕິແມັດ, ມູນຄ່າ  85 ລ້ານກີບ, ບ້ານເວີນໃຕ້ ຍາວ 257 ແມັດ, ກວ້າງ 5 ແມັດ, ໜາ 13 ຊັງຕີ ແມັດ, ມູນຄ່າ 46,6 ລ້ານກີບ, ບ້ານຕົ້ນແຫນ ຍາວ 250 ແມັດ, ກວ້າງ 5 ແມັດ, ໜາ 10 ຊັງຕິແມັດ,ມູນຄ່າ 70 ລ້ານກີບ, ບ້ານບຶງເຊ ຍາວ 2.258 ແມັດ, ກວ້າງ5 ແມັດ, ໜາ 10 ຊັງຕີແມັດ, ມູນຄ່າ 380 ລ້ານກີບ, ບ້ານຫາດຊາຍສູງຍາວ 1.350 ແມັດ, ກວ້າງ 6 ແມັດ, ໜາ 15 ຊັງແມັດ, ມູນຄ່າ 530 ລ້ານກວ່າກີບ, ບ້ານບົວໄຂຍາວ 50 ແມັດ, ກວ້າງ 5 ແມັດ, ໜາ 10 ຊັງຕີແມັດ, ມູນຄ່າ 25 ລ້ານກີບ ແລະບ້ານປາກເຊບັ້ງໄຟ ຍາວ 50 ແມັດ, ກວ້າງ 5 ແມັດ, ໜາ 10 ຊັງຕີແມັດ, ມູນຄ່າ 25 ລ້ານກີບ.

  ຊຶ່ງໂຄງການກໍ່ສ້າງເສັ້ນທາງດັ່ງກ່າວນີ້, ແມ່ນການສົມທົບທຶນລະຫວ່າງລັດ ແລະປະຊາຊົນພາຍໃນບ້ານ ແລະບໍລິສັດຫ້າງຮ້ານຕ່າງໆ ທັງນີ້ກໍ່ເພື່ອເຮັດໃຫ້ລະບົບພື້ນ ຖານໂຄງລ່າງພາຍໃນເມືອງກໍ່ຄືບ້ານມີຄວາມຮັບປະກັນແໜ້ນໜາຖາວອນ, ສະອາດງາມຕາ ແລະສະດວກສະບາຍໃນການສັນຈອນໄປ-ມາຫາ ສູ່ຂອງພໍ່ແມ່ປະຊາຊົນ.

 ໂອກາດດຽວກັນນີ້,ທ່ານ ສີວິໄລ ອິນທະລືໄຊ ກໍ່ໄດ້ສະແດງຄວາມຊົມເຊີຍຍ້ອງຍໍມາຍັງອໍານາດການປົກຄອງບ້ານກໍ່ຄືການນໍາຂັ້ນບ້ານແລະປະຊາຊົນທີ່ໄດ້ພາກັນທຸ້ມເຫື່ອເທແຮງ ແລະໄດ້ລະດົມທຶນຮອນໃນການກໍ່ສ້າງເສັ້ນທາງເບຕົງໃຫ້ສໍາເລັດພ້ອມນີ້, ກໍ່ໃຫ້ສືບຕໍ່ຈັດຕັ້ງປະຕິບັດບ່ອນທີ່ຍັງບໍ່ສໍາເລັດຈາກນີ້, ທ່ານຮອງເຈົ້າເມືອງຍັງໄດ້ມອບເງິນຈໍານວນໜຶ່ງເພື່ອເປັນທຶນປະກອບສ່ວນໃນການສືບຕໍ່ຊຸກຍູ້ສ້າງເສັ້ນທາງທີ່ເຫັນວ່າບໍ່ທັນໄດ້ສໍາເລັດອີກດ້ວຍ.

แชร์