ລາວຮັບເຄື່ອງປ້ອງກັນໂຄວິດຈາກອາເມລິກາ

  ທ່ານ ປອ. ປີເຕີເຮມ໋ອນ, ເອກອັກຄະລັດຖະທູດສະຫະລັດອາເມລິກາປະຈຳ ສປປ ລາວ ໄດ້ມອບອຸປະກອນການແພດມູນຄ່າ 6 ແສນໂດລາ ໃຫ້ແກ່ກະຊວງສາທາລະ ນະສຸກໂດຍການກ່າວຮັບຂອງທ່ານ ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກຊຶ່ງພິທີມອບ-ຮັບໄດ້ຈັດຂຶ້ນທີ່ກະຊວງສາທາລະນະສຸກ,ນະຄອນ ຫຼວງວຽງຈັນ ໃນວັນທີ 30 ມີນາ ການຊ່ວຍເຫຼືອຄັ້ງນີ້ແມ່ນນອນຢູ່ໃນບ້ວງທີ່ລັດຖະບານສະຫະລັດອາເມລິກາໄດ້ປະກາດໃຫ້ການຊ່ວຍເຫຼືອຕ້ານໂຄວິດ-19 ແກ່ ສປປ ລາວ ໄປກ່ອນໜ້ານັ້ນລວມທັງໝົດ 8 ລ້ານໂດລາສະຫະລັດ.

  ອຸປະກອນເຫຼົ່ານີ້ປະກອບມີຕຽງສຳລັບຄົນເຈັບຢູ່ຫ້ອງໄອຊີຢູ, ຖົງສຳລັບໃສ່ສີ່ງທີ່ເປີະເປື້ອນເພື່ອໄປທຳລາຍຖິ້ມ, ເຄື່ອງຕິດຕາມການເຕັ້ນຂອງຫົວໃຈ, ເຄື່ອງວັດແທກອົກຊີເຈັນ, ເຄື່ອງຊ່ວຍເພີ່ມອົກຊີເຈນແລະອຸປະກອນປ້ອງກັນຕົນເອງເຊັ່ນ: ຊຸດຜ່າຕັດ, ຖົງປົກເກີບ, ໝວກ, ຜ້າປິດປາກທາງການແພດ, ທັງໝົດນີ້ແມ່ນໄດ້ຮັບການຊ່ວຍເຫຼືອລ້າຈາກປະຊາຊົນອາເມລິກາໂດຍຜ່ານອົງການພັດທະນາສາກົນປະເທດສະຫະລັດອາເມລິກາ USAID ຊຶ່ງຈະຖືກນຳໄປໃຊ້ໂດຍກະຊວງສາທາລະນະສຸກໃນການປ້ອງກັນ ແລະຮັບມືກັບການລະບາດຂອງພະຍາດໂຄວິດ-19 ທີ່ອາດຈະເກີດຂຶ້ນໃນ ສປປ ລາວ.

  ທ່ານ ເອກອັກ ຄະລັດຖະທູດເຮມ໋ອນ ໄດ້ໃຫ້ຄຳເຫັນວ່າ: ການມອບເຄື່ອງອຸປະກອນການແພດໃນມື້ນີ້ສະແດງໃຫ້ເຫັນເຖິງຄວາມເຂັ້ມແຂງ ແລະ ຄວາມສຳຄັນຂອງການຮ່ວມມືຂອງສະຫະລັດອາເມລິກາ ແລະ ສປປ ລາວ. ໃນໄລຍະພວກເຮົາພ້ອມກັນການສະເຫຼີມສະຫຼອງຄົບຮອບ 5 ປີ ຂອງການ ຮ່ວມມືແບບກວມລວມ, ພວກເຮົາຈະສືບຕໍ່ເຮັດວຽກກັບສປປລາວເພື່ອຫຼຸດຜ່ອນຜົນກະທົບຂອງພະຍາດໂຄວິດ-19, ບໍ່ພຽງແຕ່ກ່ຽວກັບສຸຂະພາບເທົ່ານັ້ນແຕ່ຍັງລວມທັງຜົນກະທົບທາງເສດຖະກິດນຳອີກ.

  ໃນປີ 2020 ທີ່ຜ່ານມາລັດຖະບານສະຫະລັດອາເມລິກາໄດ້ປະກາດການຊ່ວຍເຫຼືອຕ້ານໂຄວິດ-19 ໃຫ້ແກ່ປະເທດຕ່າງໆ ໃນທົ່ວໂລກຈຳນວນ 100 ລ້ານໂດລາສະ ຫະລັດ, ໃນເດືອນກູມພາປີ 2020 ສ.ອາເມລິກາ ເປັນປະເທດທຳອິດທີ່ໄດ້ໃຫ້ການຊ່ວຍເຫຼືອ ສປປ ລາວ ໃນວຽກງານໂຄວິດ-19. ມາຮອດປະຈຸບັນ, ສ.ອາເມລິກາ ໂດຍຜ່ານອົງການ USAID ແລະສູນຄວບຄຸມພະຍາດ ແລະປ້ອງກັນພະຍາດຂອງອາເມລິກາ ຫຼື CDC ໄດ້ປະກອບສ່ວນຊ່ວຍເຫຼືອ ສປປ ລາວ ເປັນມູນຄ່າເກືອບ 8 ລ້ານໂດລາໃນການຄວບຄຸມການລະບາດຂອງພະຍາດໂຄວິດ-19 ໂດຍການມອບອຸປະກອນການແພດ, ຝຶກອົບຮົມ ແລະການໃຫ້ຂໍ້ມູນຂ່າວສານ.

  ນອກຈາກນີ້, ສ.ອາເມລິກາເຮັດວຽກຢ່າງໃກ້ຊິດກັບລັດຖະບານ ແລະປະຊາຊົນລາວໃນຫຼາຍໂຄງການເພື່ອປັບປຸງວຽກງານສາທາລະນະສຸກໃນ ສປປ ລາວ,ການຊ່ວຍ ເຫຼືອລວມມີໂຄງການໄລຍະຍາວເພື່ອປັງປຸງໂພສະນາການໂດຍຜ່ານໂຄງການອາຫານທ່ຽງ,ແມ່ ແລະເດັກ, ຄົນທີ່ມີຄວາມພິການ ແລະວຽກງານພະຍາດລະບາດຕ່າງໆ.

แชร์