ປີໜຶ່ງ ເສດຖະກິດລາວເສຍຫາຍຈາກອຸບັດເຫດ 4,7 ພັນຕື້ກີບ

  ວັນທີ 31 ມີນາ 2021 ທີ່ນະຄອນຫຼວງວຽງຈັນ ກະຊວງໂຍທາທິການ ແລະຂົນສົ່ງໄດ້ຈັດພິທີຖະແຫຼງຂ່າວການຈັດງານສັບປະດາແຫ່ງຊາດດ້ານຄວາມປອດໄປທາງຫຼວງປີ 2021 ຄັ້ງທີ 6 ພາຍໃຕ້ຫົວຂໍ້ “ຂັບຂີ່ປອດໄພຕ້ອງໃສ່ສາຍຣັດນິລະໄພ” ໂດຍເປັນກຽດຖະແຫຼງໂດຍທ່ານ ບຸນຕາ ອ່ອນນາວົງ ຫົວໜ້າກົມຂົນສົ່ງ, ກະ ຊວງໂຍທາທິການ ແລະ ຂົນສົ່ງທັງເປັນຫົວໜ້າກອງເລຂາຄະນະກໍາມະການແຫ່ງຊາດດ້ານຄວາມປອດໄພທາງຫຼວງ (ຄຊປທ), ມີທ່ານ ພັອ ກົງສີ ສຸວັນນະຕຸ້ມຫົວ ໜ້າກົມຕໍາຫຼວດຈະລາຈອນ, ກະຊວງປ້ອງກັນຄວາມສະຫງົບ, ທ່ານ ບຸນຫາບ ສຸລິໂຍ ຮອງຫົວໜ້າກົມສື່ມ່ວນຊົນກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວພ້ອມດ້ວຍສື່ມ່ວນຊົນເຂົ້າຮ່ວມ.

ທ່ານ ບຸນຕາ ອ່ອນນາວົງ ໃຫ້ຮູ້ວ່າ:  ການເກີດອຸບັດເຫດທາງຫຼວງໃນທົ່ວໂລກໄດ້ມີອັດຕາການເພີ່ມຂຶ້ນຢ່າງໄວວາໂດຍສະເພາະໃນປະເທດທີ່ກໍາບັງພັດທະນາສ້າງຄວາມສູນເສຍຕໍ່ຊີວິດ ແລະຊັບສິນລວມທັງຄວາມເສຍຫາຍດ້ານເສດຖະກິດ ແລະການພັດທະນາຂອງຫຼາຍໆ ປະເທດ, ອີງຕາມການສະຫຼຸບລາຍງານຂອງອົງການອະນາໄມໂລກໃຫ້ຮູ້ວ່າໃນແຕ່ລະປີທົ່ວໂລກມີຜູ້ເສຍຊີວິດຈາກການເກີດອຸບັດເຫດທາງຖະໜົນສະເລ່ຍ 1,3 ລ້ານຄົນ, ບາດເຈັບຫຼາຍກວ່າ 23 ລ້ານຄົນ ລວມມູນຄ່າເສຍຫາຍກວມ 3% ຂອງ GDP ຫຼື ປະມານ 2.5 ພັນຕື້ໂດລາ, ສໍາລັບ ສປປ ລາວ ການເກີດອຸບັດເຫດທາງຫຼວງໄດ້ສ້າງຄວາມສູນເສຍທາງດ້ານຊີວິດ ແລະຊັບສິນຂອງປະ ຊາຊົນລາວໃນແຕ່ລະປີຄິດເປັນມູນຄ່າມະຫາສານຖ້າຄິດໄລ່ຕາມກໍານົດຂອງອົງການອະນາໄມໂລກຜູ້ເສຍຊີວິດໜຶ່ງຄົນຈະມີມູນຄ່າເທົ່າກັບ 70 ເທື່ອ ຂອງ GDP ແລະຜູ້ບາດເຈັບເທົ່າກັບ 17 ເທື່ອຂອງ GDP ປະຈຸບັນລາຍຮັບຄົນຕໍ່ປີຂອງ ສປປ ລາວ ສະເລ່ຍເທົ່າກັບ 2.500 ໂດລາຕໍ່ຫົວຄົນ, ສະຖິຕິການເກີດອຸບັດເຫດຕາມການ ລາຍງານຂອງຕໍາຫຼວດຈະລາຈອນແຕ່ລະປີມີຜູ້ເສຍຊີວິດປະມານ 1.000 ຄົນ ແລະບາດເຈັບຫຼາຍກວ່າ 8.000 ຄົນ, ສະນັ້ນມູນຄ່າການສູນເສຍທາງເສດຖະກິດຈາກການເກີດອຸບັດເຫດຈະມີຫຼາຍກວ່າ 500 ລ້ານໂດລາຕໍ່ປີ ຫຼືປະມານ 4,6 ພັນຕື້ກີບຕໍ່ປີ.

  ການຈັດງານສໍາປະດາດ້ານຄວາມປອດໄພທາງຫຼວງໃນແຕ່ລະປີເປັນສິ່ງຈໍາເປັນ ແລະມີຄວາມໝາຍຄວາມສໍາຄັນແນໃສປຸກລະດົມໃຫ້ທຸກພາກສ່ວນ ແລະທຸກຊັ້ນຄົນໃນສັງຄົມໃຫ້ເຫັນໄດ້ເຖິງໄພອັນຕະລາຍຈາກການເກີດອຸບັດເຫດທາງຫຼວງແລ້ວພ້ອມກັນໃນກັນປົກປ້ອງຊີວິດແລະຊັບສິນຂອງຕົນໄວ້ພ້ອມທັງເປັນການປະຕິບັດພັນທະຂອງຕົນຕໍ່ສາກົນ, ຊຶ່ງການດັ່ງກ່າວແມ່ນຈະຈັດຂຶ້ນໃນວັນທີ 3 ເມສາ 2021 ນີ້ ໃນເວລາ 5:30 ທີ່ເດີນພະທາດຫຼວງວຽງຈັນ.

แชร์