ກຽມຈ່າຍເງິນອຸດໜູນປະກັນສັງຄົມຜ່ານກະເປົ໋າເງິນເທິງມືຖື

  ພິທີເຊັນສັນຍາວ່າດ້ວຍການສະໜອງບໍລິການເງິນອຸດໜູນປະກັນສັງຄົມຜ່ານບໍລິການການເງິນດີຈີຕອລ MMoney (ກະເປົ໋າເງິນເທິງມືຖື) ລະຫວ່າງອົງການປະ ກັນສັງຄົມແຫ່ງຊາດ ແລະບໍລິສັດ ລາວໂມບາຍມັນນີ ຈຳກັດ ຜູ້ດຽວໄດ້ຈັດຂຶ້ນໃນວັນທີ 31 ມີນາ2021 ທີ່ນະຄອນຫຼວງວຽງຈັນ ເປັນກຽດລົງນາມໂດຍ ທ່ານ ນາງ ແກ້ວຈັນ ທະວິໄຊ ຫົວຫນ້າອົງການປະກັນສັງຄົມແຫ່ງຊາດ ແລະທ່ານ ທັນສະໄໝ ຊາມຸນຕີ ຜູ້ອຳນວຍການບໍລິສັດລາວ ໂມບາຍມັນນີ ຈຳກັດຜູ້ດຽວ ໂດຍມີ ທ່ານ ລີປ່າວຢ່າງ ຫົວໜ້າຫ້ອງການກະຊວງແຮງງານແລະສະຫວັດດີການສັງຄົມ ແລະທ່ານ ສຸພົນ ຈັນທະວິໄຊ ຜູ້ອຳນວຍການໃຫຍ່ບໍລິສັດລາວໂທລະຄົມມະນາຄົມມະຫາຊົນພ້ອມດ້ວຍຄະນະຂອງສອງຝ່າຍເຂົ້າຮ່ວມເປັນສັກຂີພິຍານ.

  ທ່ານ ທັນສະໄໝ ຊາມຸນຕີ ຜູ້ອຳນວຍການບໍລິສັດ ລາວໂມບາຍມັນນີ ຈຳກັດຜູ້ດຽວ ກ່າວວ່າ: ຈຸດປະສົງຂອງການຈັດພິທີເຊັນສັນຍາຮ່ວມມືໃນຄັ້ງນີ້ເພື່ອເປັນການເປີດໂຕຄູ່ຮ່ວມທຸລະກິດກັບອົງການປະກັນສັງຄົມແຫ່ງຊາດຢ່າງເປັນທາງການໃນການສະໜອງບໍລິການເງິນອຸດໜູນປະກັນສັງຄົມຜ່ານບໍລິການໆເງິນດີຈີຕອລ M Money ເພື່ອແນໃສ່ຕອບສະໜອງຄວາມຕ້ອງການຂອງລູກຄ້າ ແລະເຮັດໃຫ້ການບໍລິການມີຄວາມສະດວກສະບາຍປອດໄພ ວ່ອງໄວໄດ້ມາດຕະຖານສາກົນພາຍໃຕ້ຄຳຂວັນໃຫ້ຊີວິດງ່າຍຂຶ້ນຕາມຍຸກດີຈີຕອລ, ບໍລິການອົງການປະກັນສັງຄົມແຫ່ງຊາດເປັນຄູ່ຮ່ວມທຸລະກິດໃນການເປັນຜູ້ສະໜອງບໍລິການປະກັນສັງຄົມປະເພດຕ່າງໆ ໃຫ້ຜູ້ປະກັນຕົນໂດຍສະເພາະແມ່ນການຈ່າຍເງິນອຸດໜູນຕ່າງໆ ຜ່ານ M Money ກະເປົ໋າເງິນເທິງມືຖື.

  ການຮ່ວມມືທາງທຸລະກິດໃນຄັ້ງນີ້ເປັນບາດກ້າວໜຶ່ງທີ່ສຳຄັນ ແລະເປັນບາດກ້າວທຳອິດໃນການຫັນການຊໍາລະເງິນຮູບແບບໃໝ່ຜ່ານ M Money ກະເປົ໋າເງິນເທິງມືຖືເຂົ້າໃນຫົວໜ່ວຍທຸລະ ກິດທີ່ທັນສະໄໝ ແລະມີຄວາມຈຳເປັນ ໃນການດໍາລົງຊີວິດປະຈຳວັນຂອງຜູ້ຄົນໃນທົ່ວປະເທດເປັນສ່ວນໜຶ່ງໃນການສ້າງທ່າແຮງ, ຊຸກຍູ້, ເສີມສ້າງ ແລະຜັນຂະຫຍາຍເສດຖະກິດດີຈີຕອລ, ຫຼຸດຜ່ອນການນຳໃຊ້ເງິນສົດຕາມແຜນພັດທະນາເສດຖະກິດດີຈີຕອລຂອງພັກ-ລັດ ໃຫ້ປາກົດຜົນເປັນຈິງຕາມວິໄສທັດຂອງບໍລິສັດ ລາວໂມບາຍມັນນີ ຈຳກັດຜູ້ດຽວ ເປັນຜູ້ນໍາດ້ານການບໍລິການໆເງິນດີຈີຕອລ ໃນ ສປປ ລາວ.

แชร์