ໄຊເສດຖາ ເອັບຊີ ກຽມຈັດແຂ່ງຂັນເຕະບານ 2 ຮຸ່ນ ຊີງຂັນປະທານສະຫະພັນບານເຕະນະຄອນຫຼວງ

  ສະໂມສອນ ໄຊເສດຖາ ເອັບຊີ ກຽມຈັດການແຂ່ງຂັນກິລາເຕະບານເຍົາວະຊົນຊາຍ 2 ຮຸ່ນ ຄື: ຮຸ່ນອາຍຸບໍ່ເກີນ 9 ປີ ແລະຮຸ່ນອາຍຸບໍ່ເກີນ 12 ປີ ຊີງຂັນທ່ານປະທານສະຫະພັນບານເຕະນະຄອນຫຼວງວຽງຈັນ ປະຈຳປີ 2021 ເພື່ອເປັນເປີດໂອກາດໃຫ້ນັກກິລາເຍົາວະຊົນພາຍໃນເມືອງສີສັດຕະນາກໄດ້ມີເວທີສະແດງອອກແນໃສ່ພັດ ທະນາເຂົາເຈົ້າໃຫ້ກາຍເປັນນັກກິລາຂອງເມືອງກໍຄືຂອງນະຄອນຫຼວງວຽງຈັນໃນອະນາຄົດ.

  ທ່ານ ໄຊເສດຖາ ຄຳວຽງງາມ ປະທານສະໂມສອນໄຊເສດຖາ ເອັບຊີ ໃຫ້ສຳພາດຕໍ່ນັກຂ່າວໜັງສືພິມສຶກສາ-ກິລາ ລາຍວັນເມື່ອຕອນເຊົ້າວັນທີ 30 ມີນາ ຜ່ານມາ ວ່າ: ເພື່ອເປັນການໂອກາດ ແລະພັດທະນາທັກສະໃຫ້ກັບນ້ອງໆນັກກິລາພາຍໃນສະໂມສອນກໍຄືພາຍໃນເມືອງສີສັດຕະນາ ແລະນະຄອນຫຼວງວຽງຈັນໄດ້ມີເວທີສະແດງອອກພາຍຫຼັງມີການຝຶກຊ້ອມຢ່າງເປັນປະຈຳທັງເປັນການສ້າງສະມັດຖະພາບທາງດ້ານຮ່າງກາຍແລະມັນສະໝອງລວມເຖິງໃຫ້ເຂົາເຈົ້າໃຊ້ເວລາວ່າງໃຫ້ເກີດປະໂຫຍດແນໃສ່ຕ້ານປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມປັດຈຸບັນໂດຍສະເພາະແມ່ນບັນຫາສິ່ງເສບຕິດ. ສະນັ້ນ, ສະໂມສອນ ໄຊເສດຖາ ເອັບຊີ ຂອງພວກເຮົາກຽມເປີດການແຂ່ງຂັນກິລາເຕະບານຮຸ່ນເຍົາວະຊົນຊາຍ 2 ຮຸ່ນຄື: ຮຸ່ນອາຍຸບໍ່ເກີນ 9 ປີ ແລະຮຸ່ນອາຍຸບໍ່ເກີນ 12 ປີ ຊີງຂັນທ່ານປະທານສະຫະພັນບານເຕະນະຄອນຫຼວງວຽງ ຈັນ ປະຈຳປີ 2021. ໃນນີ້ຮຸ່ນອາຍຸບໍ່ເກີນ 9 ປີ ມີ 4 ທີມເຂົ້າຮ່ວມຄື: ສະໂມສອນ ຄຳເຄນ, ສະໂມສອນ ໄຊເສດຖາ ເອັບຊີ ເຈົ້າພາບ, ສະໂມສອນ ດີເຄ ເອັບຊີ ແລະ ສະໂມສອນ ຮາກແກ້ວ. ຊຶ່ງຈັດເປັນກຸ່ມດຽວແຂ່ງຂັນແບບພົບກັນກັນໝົດຄັດເອົາທີມທີ່ມີຄະແນນດີສຸດເປັນທີມຊະນະເລີດ. ສ່ວນຮຸ່ນອາຍຸບໍ່ເກີນ 12 ປີ ມີທັງໝົດ 8 ທີມ ແບ່ງອອກເປັນ 2 ກຸ່ມ ຄື: ກຸ່ມ A ປະກອບມີ: ສະໂມສອນ ເຄດີດີ, ສະໂມສອນ ໄຊເສດຖາ ເອັບຊີ 1, ສະໂມສອນ ດີເຄ ເອັບຊີ ແລະ ສະໂມສອນ ແສງສະໄໝ; ກຸ່ມ B ປະກອບມີສະໂມສອນ ເຄນຄຳ, ສະໂມສອນ ພີເອັມເອັກ 88, ສະໂມສອນ ຮາກແກ້ວ ແລະສະໂມສອນ ໄຊເສດຖາ ເອັບຊີ 2. ໂດຍຮູບແບບການແຂ່ງຂັນໃນແຕ່ ລະກຸ່ມແມ່ນແຂ່ງຂັນຄົບກັບໝົດຄັດເອົາທີມອັນດັບ 1 ຂອງແຕ່ລະກຸ່ມຜ່ານເຂົ້າໄປຊີງຊະນະເລີດ ແລະຄັດເອົາອັນດັບທີ 2 ຂອງແຕ່ລະກຸ່ມໄປຊີງອັນດັບທີ 3.

  ສຳລັບການແຂ່ງຂັນກິລາເຕະບານເຍົາວະຊົນຊາຍ 2 ຮຸ່ນ ຄື: ຮຸ່ນອາຍຸບໍ່ເກີນ 9 ປີ ແລະຮຸ່ນອາຍຸບໍ່ເກີນ 12 ປີ ຊີງຂັນທ່ານປະທານສະຫະພັນບານເຕະນະຄອນຫຼວງວຽງຈັນ ປະຈຳປີ 2021 ຈະຈັດຂຶ້ນໃນລະຫວ່າງວັນທີ 4 ເມສາ ຫາວັນທີ 9 ພຶດສະພາ 2021 ທີ່ສະໜາມກິລາຫຍ້າທຽມ ນິວອາຣີນາ ເມືອງສີສັດຕະນາກ ນະຄອນຫຼວງວຽງຈັນ. ໂດຍເງື່ອນໄຂນັກກິລາຮຸ່ນອາຍຸບໍ່ເກີນ 9 ປີ ຕ້ອງເກີດແຕ່ປີ 2012 ລົງມາ ແລະຮຸ່ນອາຍຸບໍ່ເກີນ 12 ປີ ຕ້ອງເກີດແຕ່ປີ 2009 ລົງມາ. ຊຶ່ງທີມທີ່ເຂົ້າຮ່ວມຕ້ອງເສຍຄ່າລົງທະບຽນ 4 ແສນກີບຕໍ່ທີມ. ສ່ວນປະເພດຂອງລາງວັນທີມຊະນະເລີດຈະໄດ້ຮັບຂັນ 1 ໜ່ວຍ ພ້ອມຫຼຽນທີ່ລະນຶກ, ຮອງຊະນະເລີດຈະໄດ້ຮັບຫຼຽນທີ່ລະນຶກ ແລະອັນດັບທີ 3 ຈະໄດ້ຮັບຫຼຽນທີ່ລະນຶກທັງ 2 ຮຸ່ນ.

แชร์