5 ປີ ສາລະວັນເສຍຫາຍໄພພິບັດ 1,06 ພັນຕື້ກີບ

ຂ່າວ: ສິດຕາ ເພັດວົງສາ

ຕະຫຼອດໄລຍະ 5 ປີ ຜ່ານມາ ປີ 2016-2020 ທົ່ວແຂວງສາລະວັນ ມີໄພພິບັດເກີດຂຶ້ນທັງໝົດ 136 ຄັ້ງ ແລະໄດ້ສົ່ງຜົນກະທົບໂດຍກົງຕໍ່ປະຊາຊົນມີ 1,7 ແສນຄົນ, ເສຍຊີວິດ 7 ຄົນ, ໄດ້ສ້າງຄວາມເສຍຫາຍຢ່າງຫຼວງຫຼາຍ.

   ໃນອັກຄີໄພທັງໝົດໃນນັ້ນນໍ້າຖ້ວມມີ 5 ຄັ້ງໄດ້ຮັບຜົນກະທົບ 1,3 ແສນຄົນ,ເສຍຊີວິດ 2 ຄົນ, ມີມູນຄ່າເສຍຫາຍ 730,7 ລ້ານກີບ, ໄຟໄໝ້ 81 ຄັ້ງ,ມີຈຳນວນຜົນໄດ້ຮັບຜົນກະທົບ 4.696 ຄົນ, ມີມູນຄ່າເສຍຫາຍ 6,97 ຕື້ກີບ, ລົມພາຍຸພັດມີ 47 ຄັ້ງໄດ້ຮັບຜົນກະທົບ ມີ 27,8 ພັນຄົນ, ເສຍຊີວິດ 1 ຄົນ, ມີມູນຄ່າເສຍ ຫາຍ 322,62 ຕື້ກີບ,ຟ້າຜ່າ 2 ຄັ້ງເສຍຊີວິດ 2 ຄົນ,ດິນເຈື່ອນ 1 ຄັ້ງ ເສຍຊີວິດ 2 ຄົນ ແລະໄຟແຫ້ງແລງ 1 ຄັ້ງ,ລວມມູນຄ່າເສຍຫາຍທັງໝົດຫຼາຍເຖິງ 1,06 ພັນຕື້ກີບ.

  ພ້ອມດຽວກັນນັ້ນອຳນາດການປົກຄອງແຕ່ລະຂັ້ນຕະຫຼອດຮອດພາກສ່ວນຕ່າງໆ, ບັນດາທ່ານຜູ້ປະກອບການຫົວໜ່ວຍທຸລະກິດ, ອົງການຈັດຕັ້ງຕ່າງໆ, ແຂວງໃກ້ ຄຽງ ແລະປະເທດເພື່ອນບ້ານກໍ່ໄດ້ເອົາໃຈໃສ່ຊ່ວຍເຫຼືອພໍ່ແມ່ປະຊາຊົນຜູ້ທີ່ໄດ້ຮັບຜົນກະທົບ, ກໍ່ໄດ້ເອົາໃຈໃສ່ໃນການຕິດຕາມກວດກາຜົນເສຍຫາຍ ແລະໄດ້ສ້າງແຜນໄລຍະສັນ, ໄລຍະກາງ ແລະໄລຍະຍາວເພື່ອເປັນການແກ້ໄຂສຸກເສີນ, ປັບປຸງຊີວິດການເປັນຢູ່ຂອງພໍ່ແມ່ປະຊາຊົນໃຫ້ດີຂຶ້ນເທື່ອລະກ້າວສຳລັບທິດທາງ 5 ປີຕໍ່ໜ້າໃນປີ 2021-2025 ທາງແຂວງຈະເພີ່ມທະວີວຽກງານປ້ອງກັນການຄວບຄຸ້ມ ແລະຟື້ນພູຫຼັງໄພພິບັດຕ່າງໆໃຫ້ມີຄວາມເຂັ້ມແຂງ, ມີປະສິດທິຜົນ, ຊຸກຍູ້ສ້າງປັບປຸງຄະນະກຳມະການຄຸ້ມຄອງໄພພິບັດຂັ້ນແຂວງ, ຂັ້ນເມືອງ ແລະ ຂັ້ນບ້ານທີ່ມີຄວາມສ່ຽງໃນ 8 ຕົວເມືອງ ແລະ 160 ບ້ານ, ພ້ອມທັງສ້າງຄວາມເຂັ້ມແຂງວຽກງານຄຸ້ມຄອງໄພພິບັດໃຫ້ຄະນະກໍາມະການທຸກຂັ້ນຈັດຝຶກອົບຮົມໃຫ້ຄວາມຮູ້ດ້ານວຽກງານຄຸ້ມຄອງ, ພ້ອມທັງເອົາໃຈໃສ່ຊ່ວຍເຫຼືອພໍ່ແມ່ປະຊາຊົນຜູ້ທີ່ໄດ້ຮັບຜົນກະທົບ, ຜູ້ທີ່ທຸກ ຍາກ,ຜູ້ທີ່ດ້ອຍໂອກາດ ແລະສ້າງທີມງານປະເມີນຊ່ວຍເຫຼືອສຸກເສີນຂັ້ນແຂວງມີ 11 ຄົນ, ຂັ້ນເມືອງມີ 88 ຄົນໃນ 8 ຕົວເມືອງ, ພ້ອມທັງສ້າງກອງທຶນຄຸ້ມຄອງໄພພິ ບັດຂັ້ນແຂວງ ແລະຂັ້ນເມືອງ

  ຂໍ້ມູນດັ່ງກ່າວມີການເປີດເຜີຍຕໍ່ກອງປະຊຸມຖອດຖອນບົດຮຽນວຽກງານຄຸ້ມຄອງໄພພິບັດທົ່ວແຂວງດັ່ງກ່າວຊຶ່ງຈັດຂຶ້ນໃນວັນທີ26 ມີນາ ຜ່ານມາທີ່ສະໂມສອນແຂວງ ໂດຍການເປັນປະທານຂອງທ່ານ ສົມໃຈ ອຸ່ນຈິກ ຮອງເຈົ້າແຂວງສາລະວັນຜູ້ຊີ້ນຳວຽກງານວັດທະນະທຳສັງຄົມ ແລະທ່ານ ບົວໄລ ແສງແກ້ວມີກໍ ຫົວໜ້າພະແນກແຮງ ງານ ແລະ ສະຫວັດດີການສັງຄົມແຂວງ, ມີບັນດາທ່ານຕາງໜ້າພະແນການຕ່າງໆອ້ອມຂ້າງແຂວງ, ທ່ານຮອງເຈົ້າເມືອງ ແລະຫົວໜ້າຫ້ອງການແຮງງານ ແລະສະຫວັດດີການສັງຄົມເມືອງໃນ 8 ຕົວເມືອງເຂົ້າຮ່ວມ.

แชร์