ທຄຕລ ນຳສະເໜີຜະລິດຕະພັນໃໝ່

   ທະນາຄານການຄ້າຕ່າງປະເທດລາວມະຫາຊົນ (ທຄຕລ) ເປີດໂຕຜະລິດຕະພັນບັດຊິບ ATM  BCEL Union Pay ຢ່າງເປັນທາງການໃນວັນສຸກວັນທີ 26 ມີນາ 2021 ທີ່ໂຮງແຮມແລນມາກ ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງທ່ານ ນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ (ທຫລ), ທ່ານ ບຸນເຫຼືອ ສິນໄຊວໍລະວົງ ຮອງລັດຖະມົນຕີກະຊວງການເງິນ, ປະທານສະພາບໍລິຫານ ທຄຕລ; ມີບັນດາກົມຈາກ 8 ກະຊວງ ແລະ ທຫລ, ຄະ ນະອຳນວຍການ ທຄຕລ-ຄະນະອໍານວຍການທະນາຄານທຸລະກິດລັດ, ບໍລິສັດໃນເຄືອ ທຄຕລ ແລະພາກສ່ວນກ່ຽວຂ້ອງເຂົ້າຮ່ວມ.

  ການເປີດພິທີໃນຄັ້ງນີ້ໂດຍແມ່ນທ່ານ ພູຂົງ ຈັນທະຈັກ ຜູ້ອໍານວຍການໃຫຍ່ ທຄຕລ ແລະທ່ານ ຫວັງ ລີ້ສິນ ຮອງປະທານຢູນຽນເພ, ພ້ອມທັງການເຂົ້າຮ່ວມເປັນສັກຂີພະຍານຂອງບັນດາການນຳກະຊວງການເງິນ ແລະ ທຫລ ຊຶ່ງໃນປະຈຸບັນ ທຄຕລ ມີຕາໜ່າງບໍລິການທັງໝົດມີ 20 ສາຂາ, 94 ໜ່ວຍບໍລິການ, 15 ໜ່ວຍແລກ ປ່ຽນ ແລະຖານລູກຄ້າຜູ້ຊົມໃຊ້ Mobile Banking ກວມປະມານ 70%ຂອງທຸລະກໍາທັງໝົດໃນ ສປປ ລາວ, ໃນນີ້ການບໍລິການຜະລິດຕະພັນບັດ ATM BCEL UnionPay ເປັນອີກການບໍລິການໜຶ່ງຂອງ ທຄຕລ ທີ່ໄດ້ເລີ່ມໃຫ້ບໍລິການແຕ່ປີ 2011 ເປັນຕົ້ນມາໂດຍມີຈໍານວນບັດຫຼາຍກວ່າ 900.000 ບັດກວມເອົາສັດສ່ວນທາງການຕະຫຼາດ 85% ໃນຂອບເຂດທົ່ວປະເທດ.  

  ການເປີດໂຕນໍາໃຊ້ຜະລິດຕະພັນບັດຊິບ ATM BCEL UnionPay ໃນຄັ້ງນີ້ກໍ່ເປັນໜຶ່ງໃນການພັດທະນາດ້ວຍການນໍາໃຊ້ຄວາມກ້າວໜ້າຂອງເທັກໂນໂລຍີເຂົ້າໃນວຽກງານປັບປຸງການບໍລິການໃຫ້ມີຄວາມສະດວກ, ວ່ອງໄວ, ທັນສະໄໝບົນພື້ນຖານຄວາມປອດໄພ ແລະໄດ້ມາດຕະຖານສາກົນ, ໃນການປ່ຽນບັດເປັນບັດຊິບ ATM BCEL Union Pay ນີ້ນອກຈາກຂໍ້ມູນຈະຖືກເກັບໄວ້ໃນແຜ່ນຊິບຊຶ່ງຈະມີຄວາມປອດໄພສູງ, ປ້ອງກັນຄວາມສ່ຽງໃນການຖືກລັກຂໍ້ມູນເເລ້ວຍັງມີຄຸນລັກສະນະທີ່ໂດດເດັ່ນ ແລະພິເສດກວ່າເກົ່າຄື: ສາມາດຮອງຮັບການຊໍາລະລາຍການເຄື່ອງຮັບບັດ Contactless ຫຼືເອີ້ນວ່າຟັງຊັ້ນ Tap & Go ຊຶ່ງເປັນເທັກໂນໂລຢີທີ່ເພີ່ມເຂົ້າມາຊ່ວຍໃຫ້ມີຄວາມສະດວກສະບາຍໃນການຊໍາລະພຽງແຕ່ແຕະທີ່ເຄື່ອງຮັບບັດກໍ່ສາມາດຊໍາລະຄ່າສິນຄ້າ ແລະບໍລິການໄດ້ແລ້ວ.

 ນອກຈາກນັ້ນ, ຍັງອອກບັດເລີ່ມຄື: ບັດ MyWay (ບັດຊິບ ATM BCEL MyWay UnionPay) ຊຶ່ງລູກຄ້າສາມາດເລືອກ ຫຼືຕົບແຕ່ງຮູບພາບທີ່ປະທັບໃຈພິມໃສ່ບັດໄດ້ຕາມໃຈມັກອີກດ້ວຍ; ພິເສດໄປກວ່ານັ້ນແມ່ນໄດ້ພັດທະນານະວັດຕະກໍາໃໝ່ຊຶ່ງເປັນຄັ້ງທໍາອິດໃນ ສປປ ລາວ ທີ່ລູກຄ້າສາມາດປ່ຽນບັດໃໝ່ໄດ້ດ້ວຍໂຕເອງໂດຍຜ່ານແອັບ BCEL One ທີ່ສາມາດເລືອກສະຖານທີ່ຮັບບັດໃໝ່ໄດ້; ພ້ອມນັ້ນ, ກໍ່ຍັງສາມາດນໍາໃຊ້ຟັງຊັ້ນຕ່າງໆໃນແອັບ BCEL One ໄດ້ໃນລະຫວ່າງທີ່ລໍຖ້າຮັບບັດໃໝ່ອີກດ້ວຍພ້ອມນີ້ລູກຄ້າທີ່ນໍາໃຊ້ບັດ ATM BCEL  UnionPay ແບບເກົ່າສາມາດມາປ່ຽນ ເປັນບັດຮູບແບບໃໝ່ຕາມປະເພດບັດຂອງຕົນໄດ້ໂດຍບໍ່ມີຄ່າທໍານຽມໃນການການປ່ຽນບັດ (ຟຣີ) ຊຶ່ງສາມາດປ່ຽນໄດ້ຜ່ານ 2 ຊ່ອງທາງຄື: ຜ່ານເເອັບ BCEL One ແລະຜ່ານ Counter ບໍລິການທຸກສາຂາ ແລະໜ່ວຍບໍລິການຂອງ ທຄຕລ ທົ່ວປະເທດ.

 ສໍາລັບລູກຄ້າທີ່ນໍາໃຊ້ເເອັບ BCEL One ພາຍຫຼັງສໍາເລັດການປ່ຽນບັດຊິບຜ່ານແອັບ BCEL One ແລ້ວ, ລູກຄ້າຈະໄດ້ຮັບຂໍ້ມູນບັດໃໝ່ທັນທີໃນຮູບແບບ Virtual Card(ບັດສະເໝືອນຈິງ) ແລະສາມາດນໍາໃຊຟັງຊັ້ນຕ່າງໆ ໄດ້ເໝືອນເດີມຫຼັງຈາກນັ້ນລູກຄ້າຈະໄດ້ຮັບຂໍ້ຄວາມແຈ້ງເຕືອນຈາກທະນາຄານຜ່ານເເອັບ BCEL One ເພື່ອໃຫ້ລູກຄ້າເຂົ້າມາພົວພັນຮັບບັດໃໝ່ທີ່ຈຸດບໍລິການຂອງທະນາຄານຕາມລູກຄ້າໄດ້ເລືອກໄວ້ ແລະ ສໍາລັບລູກຄ້າທີ່ບໍ່ນໍາໃຊ້ແອັບ BCEL One ແມ່ນສາມາດມາປ່ຽນ ແລະຮັບບັດໄດ້ທີ່ເຄົ້າເຕີ້ບໍລິການໂດຍລະຫັດຮັບບັດຈະຖືກສົ່ງເຂົ້າເບີມືຖືຂອງລູກຄ້າ.

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์