ຫຼວງພະບາງ ເສີມວຽກບັນຊີໃຫ້ວິສາຫະກິດ

ຂ່າວ: ສີສຸວັນ

   ຊຸດຝຶກອົບຮົມສໍາລັບວຽກງານບັນຊີແກ່ບັນດາຫົວໜ່ວຍທຸລະກິດອ້ອມຂ້າງແຂວງຫຼວງພະບາງຫຼັງທີ່ໄດ້ດໍາເນີນມາເປັນເວລາ 5 ວັນເລີ່ມແຕ່ວັນທີ 22-26 ມີນາ 2021 ນີ້ກໍໄດ້ສໍາເລັດລົງ ແລະໄດ້ຈັດພິທີມອບ-ຮັບໃບຢັ້ງຢືນໂດຍເປັນກຽດມອບຂອງທ່ານ ວັນໄຊ ທອງສີທາວົງ ຮອງຫົວໜ້າກົມບັນຊີກະຊວງການເງິນ, ມີຮອງຫົວໜ້າພະແນກການເງິນ, ວິທະຍາກອນຈາກກົມບັນຊີ, ຄະນະຮັບຜິດຊອບຝຶກອົບຮົມພ້ອມດ້ວຍສໍາມະນາກອນຈາກວິສາຫະກິດອ້ອມຂ້າງແຂວງເຂົ້າຮ່ວມທັງໝົດ 90 ທ່ານ, ຍິງ 57 ທ່ານ.

  ບັນດານັກສໍາມະນາກອນທີ່ໄດ້ຮັບໃບຢັ້ງຢືນຄັ້ງນີ້ແມ່ນໄດ້ຜ່ານການຮັບຟັງການນໍາສະເໜີຮູບແບບເອກະສານລາຍງານການເງິນ, ຜັງບັນຊີ, ແນະນໍາວິທີການບັນທຶກບັນຊີຕາມວິທີການແບບໃໝ່ ແລະການສ້າງເອກະສານລາຍງານການເງິນສໍາລັບວິສາຫະກິດທີ່ບໍ່ຮັບໃຊ້ຜົນປະໂຫຍດສາທາລະນະທີ່ໄດ້ຜ່ານການຮັບຮອງຕາມຂໍ້ຕົກລົງຂອງທ່ານນາຍົກລັດຖະມົນຕີກະຊວງການເງິນ, ສະບັບເລກທີ 0369/ກງ ລົງວັນທີ 4 ກຸມພາ 2020 ໂດຍໄດ້ລົງເລິກແນະນໍາກ່ຽວກັບຄວາມສໍານຶກທາງດ້ານເສດຖະກິດຂອງບັນດາລາຍການເຄື່ອນໄຫວ, ຮູບແບບລາຍການເຄື່ອນໄຫວ 5 ໝວດບັນຊີ, ການຈັດວາງລະບົບບັນຊີວິຊາຫະກິດ,ຕົວຢ່າງປະກອບໃນການສ້າງເອກະ ສານລາຍງານການເງິນຕາມຮູບແບບໃໝ່ ແລະການສ້າງໃບລາຍງານສົມທຽບຜົນໄດ້ຮັບດ້ານບັນຊີ ແລະດ້ານອາກອນ, ການທົດລອງນໍາເອົາຕົວຢ່າງປະກອບບັນທຶກເຂົ້າໃນໂປຣແກຣມບັນຊີສໍາເລັດຮູບທີ່ຜ່ານການຮັບຮອງຈາກລັດຖະມົນຕີກະຊວງການເງິນ.

ຕອນທ້າຍພິທີທ່ານຮອງຫົວໜ້າກົມບັນຊີກະຊວງການເງິນກໍໄດ້ໃຫ້ກຽດໂອ້ລົມ ແລະຊົມເຊີຍຕໍ່ຜົນສໍາເລັດທີ່ທາງຄະນະຮັບຜິດຊອບຊຸດຝຶກອົບຮົມການບັນຊີວິສາຫະກິດທີ່ບໍ່ຮັບໃຊ້ຜົນປະໂຫຍດສາທາລະນະໄດ້ເອົາໃຈໃສ່ຄັ້ງນີ້ຖືວ່າເປັນຊຸດຝຶກອົບຮົມຄັ້ງທໍາອິດທີ່ມີຄວາມໝາຍສໍາຄັນເພາະເປັນການຍົກລະດັບຄວາມຮູ້ດ້ານວຽກງານການບັນ ຊີວິສາຫະກິດທີ່ໄດ້ຮັບການປັບປຸງໃໝ່ໃຫ້ແກ່ພະນັກງານບັນຊີຂອງຫົວໜ່ວຍທຸລະກິດເພື່ອນໍາໄປຈັດຕັ້ງປະຕິບບັດຕົວຈິງໃຫ້ມີຄວາມເປັນເອກະພາບກັນໃນຂອບເຂດທົ່ວປະເທດ.

แชร์