ຄືບໜ້າໂຄງການພັດທະນາ 2 ຕົວເມືອງແລວນໍ້າຂອງ

ຂ່າວ: ມຸນຕີ

  ໂຄງການພັດທະນາຕົວເມືອງຕາມແລວທາງອານຸພາກພື້ນແມ່ນໍ້າຂອງ 2 ເມືອງຫຼວງນໍ້າທາ, ໂດຍໄດ້ຮັບທຶນກູ້ຢືມຈາກທະນາຄານພັດທະນາອາຊີ (ADB)  ມູນຄ່າ 52 ລ້ານໂດລາສະຫະລັດ, ມີໄລຍະຈັດຕັ້ງປະຕິບັດປີ 2016-2021, ຊຶ່ງໂຄງການພັດທະນາຕົວເມືອງຕາມແລວທາງອານຸພາກພື້ນແມ່ນໍ້າຂອງ 2 ຕົວເມືອງຫຼວງນໍ້າທາ ລວມມີ 7 ໂຄງການຍ່ອຍການຈັດຕັ້ງປະຕິບັດຜ່ານມາເຫັນວ່າມີ 1 ໂຄງການສຳເລັດ 100% ຄືໂຄງການຈັດຊື້ພາຫະນະ ແລະອຸປະກອນກໍາຈັດຂີ້ເຫຍື້ອແລະອີກ 6 ໂຄງການແມ່ນພວມເລັ່ງໃສ່ຈັດຕັ້ງປະຕິບັດໃຫ້ສຳເລັດຕາມຄາດໝາຍໃນປີ 2021, ມາໃນວັນທີ 26 ມີນາ 2021 ການນຳຂອງແຂວງພ້ອມດ້ວຍຄະນະກໍາມະ ການ, ຊຶ່ງນຳໂດຍທ່ານ ຄຳໄຫຼ ສີປະເສີດ ກໍາມະການສູນກາງພັກເລຂາພັກແຂວງເຈົ້າແຂວງໆຫຼວງນໍ້າທາພ້ອມດ້ວຍຄະນະ ແລະບັນດາພະແນກການທີ່ກ່ຽວຂ້ອງຂອງແຂວງ, ເມືອງໄດ້ລົງກວດກາຄວາມຄືບໜ້າຂອງໂຄງການດັ່ງກ່າວ.

  ທ່ານ ເຈີຣີ ມານູເອວ ຫົວໜ້າທີມທີ່ປຶກສາຈີເອັມເອັດ 2 ແລະທ່ານ ທະນູສີນ ອີນດາວົງ ຫົວໜ້າທີມທີ່ປຶກສາແຂວງຫຼວງນໍ້າທາໄດ້ລາຍງານຄວາມຄືບໜ້າຂອງໂຄງ ການພັດທະນາຕົວເມືອງຕາມ ແລວທາງອານຸພາກພື້ນແມ່ນໍ້າຂອງ 2 ເມືອງຫຼວງນໍ້າທາ, ແຂວງຫຼວງນໍ້າທາວ່າ: ໂຄງການປັບປຸງເສັ້ນທາງ ແລະຮ່ອງລະບາຍນໍ້າແຄມທາງໂດຍແມ່ນບໍລິສັດຄຳຟອງກຸບກໍ່ສ້າງເປັນຜູ້ຮັບເໝົາໃນໄລຍະເວລາ 18 ເດືອນ,ມາເຖິງປະຈຸບັນຄວາມຄືບໜ້າຂອງວຽກສໍາເລັດ 54,2%, ໂຄງການກໍ່ສ້າງຂົວຂ້າມນໍ້າທາ ແລະທາງເຂົ້າຂົວສຳເລັດ 78,70%, ໂຄງການປັບປຸງສວນສາທາລະນະ, ຕະຫຼາດກາງຄືນ ແລະເດີ່ນກີລາໃນຮົ່ມສໍາເລັດ 61,9%, ໂຄງການປັບປຸງຮ່ອງລະ ບາຍນໍ້າ ແລະກໍ່ສ້າງອ່າງບຳບັດນໍ້າເປື້ອນສຳເລັດ 30,46%, ໂຄງການກໍ່ສ້າງສະໜາມຂີ້ເຫື້ຍອແຂວງຫຼວງນໍ້າທາສຳເລັດ 74,8%, ໂຄງການປັບປຸງເສັ້ນທາງ, ຮ່ອງລະບາຍນໍ້າ ແລະຂົວ 2 ແຫ່ງຄື: ຂົວຂ້າມນໍ້າທາບ້ານທົ່ງໄຈໃຕ້ ແລະຂົວຂ້າມນໍ້າດີບ້ານນໍ້າດີມີຄວາມຄືບໜ້າ 1,61%.

  ຈາກນັ້ນຜູ້ຕາງໜ້າບໍລິສັດ, ຂະແໜງການກ່ຽວຂ້ອງຂອງແຂວງ, ເມືອງຍັງໄດ້ປະກອບຄຳເຫັນເພື່ອເປັນການປັບປຸງແກ້ໄຂບັນຫາຕ່າງໆໃນການຈັດຕັ້ງປະຕິບັດແຕ່ລະໂຄງການທີ່ໄດ້ປະຕິບັດໃນໄລຍະຜ່ານມາເພື່ອໃຫ້ບັນດາໂຄງການທີ່ກຳລັງຈັດຕັ້ງປະຕິບັດໃຫ້ສຳເລັດຕາມແຜນການທີ່ວາງໄວ້.

 ໂອກາດນີ້ທ່ານເຈົ້າແຂວງໆຫຼວງນໍ້າທາຍັງໄດ້ເນັ້ນໜັກໃຫ້ພາກສ່ວນທີ່ກ່ຽວຂ້ອງ ແລະບັນດາບໍລິສັດຮັບເໝົາກໍ່ສ້າງຈົ່ງພ້ອມກັນເປັນເຈົ້າການຈັດຕັ້ງປະຕິບັດໃຫ້ສຳເລັດຕາມຄາດໝາຍ ແລະໄດ້ຕາມມາດຕະຖານຕື່ມອີກ.

แชร์