142 ຄອບຄົວ ອາຊີບໝັ້ນຄົງຍ້ອນຮ່ວມໃຈສາຍໃຍໂລມາຄຳ

ໂດຍ: ຂ່າວສະຫວັນ

  ວັນທີ 26 ມີນາ 2021 ທີ່ຫ້ອງວ່າການປົກຄອງແຂວງສະຫວັນນະເຂດໄດ້ຈັດກອງປະຊຸມສະຫຼຸບການຈັດຕັ້ງປະຕິບັດໂຄງການຮ່ວມໃຈສາຍໃຍໂລມາຄຳຢູ່ບ້ານຕະຢົງ ແລະບ້ານປະແນະຈຸດສຸມຕັງອາໄລເມືອງນອງຊຶ່ງເປັນໂຄງການຮ່ວມມືລະຫວ່າງ ທ່ານ ເກຍ ອູ໊ສິດທິເດດ ນັກພັດທະນາດີເດັ່ນແຫ່ງຊາດເຈົ້າຂອງໂຮງງານຜະລິດນໍ້າ ກ້ອນ-ນໍ້າດື່ມໂລມາຄຳ ແລະທ່ານ ສາຍສະໝອນ ກວານເມືອງຈັນ ຜູ້ອຳນວນການສະຖາບັນການເງິນຈຸລະພາກທີ່ຮັບເງິນຝາກສາຍໃຍສຳພັນເຂົ້າໄປຊ່ວຍເຫຼືອເພື່ອລຶບ ລ້າງຄວາມທຸກຍາກຂອງປະຊາຊົນ ແລະສ້າງເງື່ອນໄຂໃຫ້ເມືອງນອງພົ້ນທຸກ.

  ກອງປະຊຸມຄັ້ນນີ້ດຳເນີນພາຍໃຕ້ການເປັນປະທານຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ມີທ່ານ ນາງ ຫຼິງທອງແສງຕາວັນ ຮອງເຈົ້າແຂວງພ້ອມດ້ວຍຄະນະການນຳຂັ້ນແຂວງ, ເມືອງ, ບັນດານັກທຸລະກິດ, ແຂກຖືກເຊີນ, ຈາກນີ້ກໍ່ມີທ່ານ ສາຍສະໝອນ ກວານເມືອງຈັນ, ທ່ານ ເກຍ ອູ໊ສິດທິເດດ ພິເສດມີ ການນຳອາວຸໂສບຳນານຂອງແຂວງ ແລະພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມນຳ.

  ທ່ານ ສັນຕິພາບ ພົມວິຫານ ໄດ້ກ່າວມີຄຳເຫັນພ້ອມທັງໂອ້ລົມຕໍ່ພິທີຄັ້ງນີ້ວ່າ: ພວກເຮົາຕ້ອງໄດ້ພາກັນສືບຕໍ່ສຸມໃສ່ວຽກງານລຶບລ້າງຄວາມທຸກຍາກຢູ່ບັນດາຈຸດສຸມບູລິມະສິດຂອງແຂວງ, ໂດຍການປຸກລະດົມທຸກພາກສ່ວນເຂົ້າມາມີສ່ວນຮ່ວມຢ່າງກວ້າງຂວາງພາຍໃຕ້ຂະບວນການແຂ່ງຮັກຊາດ ແລະພັດທະນາຢ່າງແຂງແຮງ, ເພື່ອແນໃສ່ບັນລຸຄາດໝາຍສູ້ຊົນໃນການລຶບລ້າງຄວາມທຸກຍາກທີ່ວາງໄວ້, ໃຫ້ການນໍາເມືອງນອງ ແລະ ພະແນກການຕ່າງໆສືບຕໍ່ຊຸກຍູ້ຕິດຕາມບັນດາກິດຈະກໍາຂອງໂຄງການຮ່ວມໃຈສາຍໄຍໂລມາຄໍາທີ່ໄດ້ຊ່ວຍເຫຼືອຜ່ານມານັ້ນໃຫ້ໄດ້ຮັບຜົນຫຼາຍຂຶ້ນເລື້ອຍໆ, ເພື່ອສ້າງເງື່ອນໄຂໃຫ້ປະຊາຊົນບ້ານດັ່ງກ່າວມີອາຊີບ ແລະລາຍ ຮັບທີ່ໝັ້ນຄົງ, ຫຼຸດພົ້ນຈາກຄວາມທຸກຍາກເທື່ອລະກ້າວ, ສືບຕໍ່ເສີມຂະຫຍາຍບົດຮຽນທີ່ໄດ້ຮັບຈາກກິດຈະກໍາຂອງໂຄງການອອກສູ່ບ້ານອື່ນໆ ທີ່ເປັນເປົ້າໝາຍໃນການລຶບລ້າງຄວາມທຸກ ຍາກຢ່າງກວ້າງຂວາງ, ໂດຍອີງໃສ່ທ່າແຮງ ແລະ ເງື່ອນໄຂຕົວຈິງຂອງທ້ອງຖິ່ນ, ເອົາໃຈໃສ່ການປຸກລະດົມປະຊາຊົນໃຫ້ມີຄວາມເປັນເຈົ້າການ, ມີແນວຄິດກຸ້ມຕົນເອງ, ເພິ່ງຕົນເອງ ແລະສ້າງຄວາມເຂັ້ມແຂງດ້ວຍຕົນເອງເປັນຕົ້ນຕໍ, ການຈັດສັນອາຊີບໃຫ້ແກ່ປະຊາຊົນຜູ້ທຸກຍາກນັ້ນ, ຢາກໃຫ້ເລີ່ມຈາກການຊຸກຍູ້ສົ່ງເສີມປະເພດການຜະລິດໄລຍະສັ້ນທີ່ໄດ້ຮັບຜົນຜະລິດໄວ,ໃຊ້ເຕັກນິກທີ່ງ່າຍດາຍ, ມີຕະຫຼາດຮອງຮັບທີ່ແນ່ນອນ, ມີຄວາມສ່ຽງຕໍ່າ ແລະປະຊາຊົນເຄີຍມີມູນເຊື້ອມາກ່ອນຈາກນັ້ນຈຶ່ງຄ່ອຍຫັນສູ່ການສົ່ງເສີມການຜະລິດປະເພດໄລຍະຍາວ ແລະມີຄວາມໝັ້ນຄົງເທື່ອລະກ້າວ,ສໍາລັບຈຸດສຸມຈຽງຕູບກໍ່ເຫັນວ່າມີທ່າແຮງຫຼາຍດ້ານ,ຈຶ່ງຂໍໃຫ້ການນໍາເມືອງ ແລະພະແນກການກ່ຽວຂ້ອງເອົາໃຈໃສ່ສ້າງເງື່ອນໄຂໃຫ້ປະຊາຊົນໄດ້ທໍາການຜະລິດຫຼາຍຂຶ້ນ, ສ່ວນຈຸດສຸມຄໍາປ່າແໜກໍ່ເຫັນວ່າມີເງື່ອນສະດວກຫຼາຍຢ່າງ,ສະນັ້ນຈຶ່ງໃຫ້ການນໍາເມືອງ ແລະພະແນກການກ່ຽວຂ້ອງຮ່ວມກັນແກ້ໄຂບັນຫາທີ່ເລັ່ງດ່ວນພ້ອມດຽວກັນນີ້, ກໍ່ມອບໃຫ້ພະແນກພາຍໃນ ແລະພະແນກການກ່ຽວຂ້ອງຄົ້ນຄວ້າຍ້ອງຍໍສັນ ລະເສີນກົມກອງ ແລະບຸກຄົນທີ່ມີຜົນງານດີເດັ່ນໃນຂະບວນການລຶບລ້າງຄວາມທຸກຍາກໃນປີຜ່ານມາຢ່າງສົມກຽດ.

 ທ່ານ ເກຍ ອູ໊ສິດທິເດດ ໄດ້ລາຍໃຫ້ຮູ້ວ່າ: ໃນການຈັດຕັ້ງປະຕິບັດຊ່ວຍເຫຼືອຄັ້ງນີ້ຂອງໂຄງການພວກເຮົາໄດ້ຖືເອົາຕາມທິດນຳທີ່ວ່າເພິ່ງຕົນເອງ, ກຸ້ມຕົນເອງ ແລະສ້າງຄວາມເຂັ້ມແຂງດ້ວຍຕົນເອງເທື່ອລະກ້າວຈຶ່ງໄດ້ອີງໃສ່ພື້ນຖານທ່າແຮງໃນການດຳລົງຊີວິດຂອງປະຊາຊົນຢູ່ທ້ອງຖິ່ນເປັນຫຼັກ, ໃນ 1 ປີຜ່ານມາ, ໂຄງການໄດ້ກຳນົດຮູບ ແບບການຈັດຕັ້ງປະຕິບັດໂດຍການຊຸກຍູ້ສົ່ງເສີມອາຊີບໝັ້ນຄົງໃຫ້ປະຊາຊົນ ແລະ ໃຊ້ງົບປະມານ 2,3 ຕື້ກວ່າກີບ ຊື້ເຄື່ອງມືການຜະລິດທີ່ຈຳເປັນໃຫ້ປະຊາຊົນທັງໃນ   ແລະນອກເປົ້າໝາຍ 142 ຄອບຄົວຢູ່ 2 ບ້ານດັ່ງກ່າວ, ຂະນະດຽວກັນ, ກໍ່ໄດ້ເຈາະສ້າງບາດານ 10 ບໍ່ໃຫ້ 5 ບ້ານ ເຊັ່ນ: ບ້ານຕະຢົງ 4 ບໍ່, ບ້ານປະແນະ 3 ບໍ່, ບ້ານລະແບງນໍ້າ, ບ້ານຕັງອາໄລກາງ ແລະບ້ານຕັງອາໄລເກົ່າບ້ານລະ 1 ບໍ່ລວມທັງໄດ້ກໍ່ສ້າງຝາຍເບຕົງເກັບນໍ້າ 2 ແຫ່ງຢູ່ບ້ານຕະຢົງ 1 ແຫ່ງ ໂດຍສາມາດເກັບນໍ້າໄດ້ 10.000 ແມັດກ້ອນ ແລະບ້ານປະແນະ 1 ແຫ່ງ ເກັບນໍ້າໄດ້ 22.000 ແມັດກ້ອນ, ນອກນີ້ຍັງໄດ້ປູທາງຍ່າງເບຕົງ, ຈົກໜອງສະໃຫຍ່ 1 ໜອງຢູ່ບ້ານຕະຢົງເກັບນໍ້າໄດ້ 20.000 ແມັດກ້ອນ, ສະໜອງປຸ໋ຍ 150 ສອບໃຫ້ປະຊາຊົນ 136 ຄອບຄົວ ແລະສະໜອງດິນດໍາ 720 ແມັດກ້ອນ ໃຫ້ປະ ຊາຊົນໄດ້ໃສ່ຜົນລະປູກພ້ອມຍົກຄວາມຮູ້ການກ້າເບ້ຍໄມ້ທີ່ຖືກວິທີໃຫ້ແກ່ປະຊາຊົນ, ພ້ອມນີ້ກໍ່ໄດ້ຊຸກຍູ້, ແນະນຳປະຊາຊົນ 2 ບ້ານປູກພືດປະສົມປະສານທັງໄລຍະສັ້ນ, ກາງ ແລະໄລຍະຍາວຢູ່ດິນສວນປູກເຂົ້າຕອນດຽວກັນໂດຍການປູກໝາກເຜັດ, ສາລີ, ໝາກນັດ, ກ້ວຍ, ແຂມ, ຫວາຍ ແລະອື່ນໆ, ຊຸກຍູ້ສົ່ງເສີມ, ແນະນຳປະຊາຊົນ 49 ຄອບຄົວ ຕໍ່າຫູກ ກີ່ແອວ, ສະໜອງເປັດ, ໄກ່ ແລະ ພໍ່ພັນແມ່ພັນໝູຈຳນວນໜຶ່ງ,ປັບປຸງເດີ່ນໂຮງຮຽນປະຖົມບ້ານຕະຢົງ ແລະ ຕິດຕັ້ງຈັກສູບນໍ້າໄຟຟ້າເພື່ອຫົດສວນຂອງໂຮງຮຽນທັງສອນນັກ ຮຽນຮູ້ວິທີປູກ ແລະການລ້ຽງ.

แชร์