ມອບ-ຮັບ ໜ້າທີ່ລັດຖະມົນຕີກະຊວງ ຍທຂ

  ພິທີມອບ-ຮັບ ໜ້າທີ່ລັດຖະມົນຕີກະຊວງໂຍທາທິການ ແລະຂົນສົ່ງ (ຍທຂ) ຜູ້ເກົ່າ ແລະຜູ້ໃໝ່ລະຫວ່າງທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະຂົນສົ່ງ (ຜູ້ເກົ່າ) ແລະທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການແລະຂົນສົ່ງ (ຜູ້ໃໝ່) ໄດ້ຈັດຂຶ້ນໃນວັນທີ 29 ມີນາ 2021 ທີ່ນະຄອນ ຫຼວງວຽງຈັນ, ໂດຍການເຂົ້າຮ່ວມຂອງທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ມີຜູ້ຕາງໜ້າຈາກຄະນະຈັດຕັ້ງສູນກາງພັກ, ພະນັກງານຫຼັກແຫຼ່ງ ຍທຂພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

  ທ່ານ ນາງ ວົງຄຳ ສຸທຳມະວົງ ຕາງໜ້າຈາກຄະນະຈັດຕັ້ງສູນກາງພັກໄດ້ຂຶ້ນຜ່ານບັນດານິກຳຕ່າງໆ ກ່ຽວກັບການຊັບຊ້ອນແລະແຕ່ງຕັ້ງລັດຖະມົນຕີ ຍທຂ ເປັນຕົ້ນແມ່ນມະຕິຂອງກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ IX ສະບັບເລກທີ 9/ສພຊລົງວັນທີ 22 ມີນາ 2021 ວ່າດ້ວຍການຮັບຮອງເອົາໂຄງປະກອບກົງຈັກລັດຖະບານ ແລະສະມາຊິກລັດຖະບານໂດຍໄດ້ແຕ່ງຕັ້ງໃຫ້ທ່ານ ວຽງສະຫວັດ ສີພັນດອນ ມາເປັນລັດຖະມົນຕີກະຊວງໂຍທາທິການ ແລະຂົນສົ່ງຜູ້ໃໝ່ ແລະດຳ ລັດຂອງປະທານປະເທດ ສປປ ລາວ ເລກທີ 116/ປປທ ລົງວັນທີ 24 ມີນາ 2021 ວ່າດ້ວຍການພັກການ-ຮັບອຸດໜູນບຳນານໂດຍໄດ້ອະນຸມັດໃຫ້ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະຂົນສົ່ງ (ຜູ້ເກົ່າ) ອອກພັກການ-ຮັບອຸດໜູນບຳນານ.

 ພ້ອມນີ້, ທ່ານ ກິແກ້ວ ໄຂຄຳພິທູນ ໄດ້ໃຫ້ກຽດໂອ້ລົມຊຶ່ງມີເນື້ອໃນບາງຕອນສຳຄັນວ່າ: ມອບໃຫ້ບັນດາສະຫາຍຄະນະພັກ, ການນໍາທຸກຂັ້ນເປັນເອກະພາບນໍາສູນກາງພັກ, ລັດຖະບານຕໍ່ການຊັບປ່ຽນໜ້າທີ່ຄວາມຮັບຜິດຊອບຂອງພະນັກງານການນໍາຂັ້ນສູງໃນຄັ້ງນີ້; ບົນພື້ນຖານນັ້ນ, ໃຫ້ບັນດາສະຫາຍສືບຕໍ່ນໍາພາແນວຄິດຂອງພະ ນັກງານ-ສະມາຊິກພັກຢູ່ແຕ່ລະພະແນກການໃຫ້ເຂົ້າໃຈ ແລະຮັບຮູ້ຢ່າງທົ່ວເຖິງຕໍ່ການຊັບປ່ຽນພະນັກງານການນໍາໃນເທື່ອນີ້, ເພື່ອໃຫ້ການສະໜັບສະໜູນທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະຂົນສົ່ງ (ຜູ້ໃໝ່) ເພື່ອພ້ອມກັນຜ່ານຜ່າທຸກອຸປະສັກນາໆປະການໃຫ້ໄດ້ຮັບຜົນດີຂຶ້ນເລື້ອຍໆສືບຕໍ່ມີສະຖຽນລະພາບດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ, ປະຊາຊົນມີຄວາມສາມັກຄີເປັນປຶກແຜ່ນແໜ້ນໜາ; ສ້າງຄວາມເປັນເອກະພາບພາຍໃນເພື່ອສືບຕໍ່ປົກປັກຮັກສາມູນເຊື້ອອັນດີງາມ, ເຕົ້າໂຮມຄວາມສາມັກຄີໃນຖັນແຖວພະນັກງານ; ສະໜັບສະໜູນລັດຖະມົນຕີຄົນໃໝ່ເພື່ອຮ່ວມມືໃນການພັດທະນາວຽກງານໃຫ້ມີຄວາມໜັກແໜ້ນ, ປະຕິບັດແບບແຜນວິຖີການເຮັດວຽກງານ ຍທຂ ໃຫ້ແຂງແຮງຂຶ້ນເປັນກ້າວໆ.

แชร์