ອາກອນຄຳມ່ວນສະຫຼຸບວຽກປະຈຳປີ

  ກອງປະຊຸມສະຫຼຸບວຽກງານອາກອນປະຈຳປີ 2020 ແລະວາງທິດທາງແຜນການປີ 2021 ຈັດຂຶ້ນໃນວັນທີ 26 ມີນາ 2021 ໂດຍການເປັນກຽດເຂົ້າຮ່ວມຂອງ ທ່ານ ສົມສະອາດ ອຸ່ນສີດາ ຫົວໜ້າພະແນກການເງິນແຂວງຄໍາມ່ວນ, ທ່ານ ບຸນທະນິດ ວົງມະນີວັນ ຫົວໜ້າສ່ວຍສາອາກອນແຂວງ, ມີຄະນະດ່ານພາສີສາກົນປະຈໍາແຂວງ, ຜູ້ຕາງໜ້າຈາກສາຂາທະນາຄານຕ່າງໆ, ຫ້ອງການໆເງິນ 10 ຕົວເມືອງຕະຫຼອດເຖິງພະນັກງານວິຊາການອ້ອມຂ້າງພະແນກເຂົ້າຮ່ວມ.

 ທ່ານ ບຸນທະນິດ ວົງມະນີວັນ ຫົວໜ້າສ່ວຍສາອາກອນແຂວງໄດ້ສະຫຼຸບການເຄື່ອນໄຫວວຽກງານຈັດເກັບລາຍຮັບສ່ວຍສາອາກອນປະຈຳປີ 2020 ພ້ອມວາງທິດທາງແຜນການ ປີ 2021 ວ່າ: ສ່ວຍສາອາກອນແຂວງໄດ້ສົມທົບກັບພາກສ່ວນກ່ຽວຂ້ອງລົງເດີນສຳຫຼວດຫົວໜ່ວຍທຸລະກິດໃນທົ່ວແຂວງຊຶ່ງປະກອບມີຫົວໜ່ວຍທຸລະກິດທັງໝົດ 3.065 ຫົວໜ່ວຍຫຼຸດລົງຈາກປີກ່ອນ 30,98% ໃນນັ້ນຂັ້ນແຂວງຄຸ້ມຄອງ 799 ຫົວໜ່ວຍ, ຂັ້ນເມືອງຄຸ້ມຄອງ 2.266 ຫົວໜ່ວຍ,ທາງດ້ານການຈັດເກັບ ລາຍຮັບໃນປີ 2020 ສ່ວຍສາອາ ກອນແຂວງແມ່ນໄດ້ຮັບການມອບ ໝາຍຈັດເກັບລາຍຮັບທັງໝົດຈຳ ນວນ234,80 ຕື້ກີບ, ຜ່ານການເຄື່ອນໄຫວຈັດເກັບຕົວຈິງປະຕິບັດໄດ້ 240,38 ຕື້ກີບ ເທົ່າກັບ 102,38%. ໃນນັ້ນຂັ້ນແຂວງປະຕິບັດໄດ້ 181 ຕື້ກວ່າກີບ, ບັນດາເມືອງປະຕິບັດໄດ້ 53 ຕື້ກວ່າກີບ, ລາຍຮັບຈາກທີ່ດິນ 6 ຕື້ກີບ.

  ສ່ວນທາງດ້ານແຜນການປີ 2021 ໄດ້ຮັບຕົວເລກແຜນການເກັບລາຍຮັບທັງໝົດ 280,6 ຕື້ກີບ ທຽບໃສ່ປີ 2020 ເພີ່ມຂຶ້ນ 19,50% ເພື່ອເຮັດໃຫ້ແຜນການຈັດເກັບລາຍຮັບໃນປີ 2021ປະຕິບັດບັນລຸຕາມແຜນການສ່ວຍສາອາກອນແຂວງແມ່ນໄດ້ວາງມາດຕະການຈັດຕັ້ງປະຕິບັດຄື: ເພີ່ມທະວີສຶກສາອົບຮົມການເມືອງ-ແນວຄິດ, ຄຸນສົມບັດສິນທຳປະຕິວັດ,ຈັນຍາບັນ, ນໍ້າໃຈຮັບຜິດຊອບຕໍ່ໜ້າທີ່ວຽກງານ, ທັດສະນະຮັບໃຊ້ປະຊາຊົນພ້ອມທັງຕ້ານແນວຄິດ ແລະການກະທຳທີ່ເຫັນແກ່ຜົນປະ ໂຫຍດສ່ວນຕົວໃຫ້ແກ່ພະນັກງານ-ລັດຖະກອນ, ໂຄສະນາເຜີຍແຜ່ລະບຽບກົດໝາຍ ແລະນິຕິກຳຕ່າງໆທີ່ກ່ຽວຂ້ອງໃຫ້ແກ່ຜູ້ປະກອບການໃນຫຼາຍຮູບການໃຫ້ເຂົ້າໃຈໃນມາດຕະການ ແລະວິທີການຈັດຕັ້ງປະຕິບັດຢ່າງເລິກເຊິ່ງ, ປະສານສົມທົບກັບສ່ວຍສາອາກອນປະຈຳເມືອງລົງສຳຫຼວດຫ້າງຮ້ານທີ່ນຳໃຊ້ເຄື່ອງບັນທຶກການຂາຍສິນຄ້າຜ່ານ ລະບົບເອເລັກໂທຣນິກເພື່ອອອກໃບອະນຸຍາດ ແລະຄຸ້ມຄອງຕິດຕາມລາຍຮັບຂອງທຸລະກິດ, ສືບຕໍ່ຫັນເອົາຫົວໜ່ວຍທຸລະກິດຄ່າເຊົ່າທັງໝົດພາຍໃນແຂວງໃຫ້ມາແຈ້ງມອບອາກອນຜ່ານລະບົບທະນາຄານ, ປະສານສົມທົບກັບກົມສ່ວຍ ສາອາກອນສະເໜີຂະຫຍາຍລະບົບ TaxRis ລົງສູ່ເມືອງທີ່ມີຖານລາຍຮັບຂະຫຍາຍຕົວ ແລະອື່ນໆ.

 ໃນວາລະກອງປະຊຸມຍັງໄດ້ຜ່ານຄຳແນະນຳວ່າດ້ວຍການຈັດຕັ້ງປະຕິບັດເກັບລາຍຮັບສ່ວຍສາອາກອນປະຈຳປີ 2021, ການຈັດຕັ້ງປະຕິບັດວຽກງານຄຸ້ມຄອງຕິດຕາມການກວດກາສາງ ແລະການເຄື່ອນຍ້າຍສິນຄ້າ, ນໍ້າມັນ ແລະອາຍແກັດພ້ອມທັງໄດ້ຮັບຟັງການປະກອບຄຳຄິດຄຳເຫັນຈາກບັນດາສ່ວຍສາອາກອນ 10 ຕົວເມືອງຕາມຄຳຖາມເຈາະຈິ້ມເພື່ອເຮັດໃຫ້ຮ່າງບົດສະຫຼຸບຂອງສ່ວຍສາອາກອນແຂວງມີເນື້ອໃນຄົບຖ້ວນ, ຖືກຕ້ອງ, ສົມບູນ ແລະເພື່ອແນໃສ່ຮັບປະກັນການຈັດຕັ້ງປະຕິບັດຈັດເກັບລາຍຮັບວຽກງານອາກອນປະຈຳປີ 2021 ໃຫ້ບັນລຸຕາມແຜນການທີ່ວາງໄວ້. 

ໂດຍ: ກອງຄໍາ

แชร์