ສຳມະນາວຽກຂໍ້ມູນຂ່າວສານສິນເຊື່ອຢູ່ລາວ

ວັນທີ 25 ມີນາ 2021 ທີ່ໂຮງແຮມຄຣາວພລາຊາໄດ້ຈັດກອງປະຊຸມສໍາມະນາກ່ຽວກັບວຽກງານຂໍ້ມູນຂ່າວສານສິນເຊື່ອຢູ່ ສປປ ລາວ ຈັດຂຶ້ນໂດຍສະພາການຄ້າ ແລະອຸດສາຫະກໍາເອີຣົບຮ່ວມກັບບໍລິສັດ ບີເອສເຄ ລົງທຶນ ແລະບໍລິການຈໍາກັດຜູ້ດຽວ (ກຸ່ມບໍລິສັດ AIF) ໂດຍມີບໍລິສັດຂໍ້ມູນຂ່າວສານສິນເຊື່ອ ແຫ່ງ ສປປ ລາວ ແລະ ຜູ້ທີ່ສົນໃຈວຽກງານດັ່ງກ່າວຈາກບັນດາທະນາຄານ, ສະຖາບັນການເງິນຈຸລະພາກ, ນັກທຸລະກິດ ແລະບັນດານັກລົງທຶນເຂົ້າຮ່ວມ.

  ຈຸດປະສົງຂອງກອງປະຊຸມສໍາມະນາຄັ້ງນີ້ແມ່ນເພື່ອນໍາສະເໜີຄວາມສໍາຄັນຂອງວຽກງານຂໍ້ມູນຂ່າວສານສິນເຊື່ອ, ປຶກສາຫາລື-ແລກປ່ຽນບົດຮຽນ ແລະແຜນການສ້າງຜະລິດຕະພັນໃໝ່ກໍຄືຜະລິດຕະພັນຂໍ້ມູນສາທາລະນຸປະໂພກ (ການຊຳລະຄ່າໄຟຟ້າຂອງພົນລະເມືອງລາວທີ່ເປັນບຸກຄົນ ແລະບໍລິສັດ) ແລະ ຜະລິດຕະພັນໃຫ້ຄະແນນສິນເຊື່ອຂອງບຸກຄົນ.

  ປະຈຸບັນບໍລິສັດຂໍ້ມູນຂ່າວສານສິນເຊື່ອແຫ່ງ ສປປ ລາວ ກໍາລັງຄົ້ນຄວ້າສ້າງທັງສອງຜະລິດຕະພັນຊຶ່ງນອນຢູ່ໃນແຜນພັດທະນາວຽກງານຂໍ້ມູນຂ່າວສານສິນເຊື່ອ ແລະກໍເພື່ອເປັນການປັບປຸງດັດຊະນີອໍານວຍຄວາມສະດວກໃນການດໍາເນີນທຸລະກິດຢູ່ ສປປ ລາວ ຊຶ່ງບໍລິສັດບີເອສເຄລົງທຶນ ແລະບໍລິການຈຳກັດຜູ້ດຽວໄດ້ໃຫ້ການຊ່ວຍເຫຼືອລ້າດ້ານວິຊາການໃຫ້ແກ່ບໍລິສັດຂໍ້ມູນຂ່າວສານສິນເຊື່ອແຫ່ງ ສປປ ລາວ ໃນການສ້າງຜະລິດຕະພັນການໃຫ້ຄະແນນສິນເຊື່ອບຸກຄົນ (Credit Sco ring) ໂດຍໄດ້ເຊັນບົດບັນທຶກການຊ່ວຍເຫຼືອລ້າຮ່ວມກັນໃນວັນທີ 4 ມີນາ 2021 ທີ່ຜ່ານມາເພື່ອຮ່ວມກັນຄົ້ນຄວ້າໃຫ້ສໍາເລັດພາຍໃນເດືອນມີນາ 2021 ນີ້.

  ພາຍຫຼັງ ທ່ານ ດິລິບ ເຈສຸທາສັນ ຜູ້ອໍານວຍການບໍລິສັດ ບີເອສເຄ ລົງທຶນ ແລະບໍລິການຈໍາກັດຜູ້ດຽວທັງເປັນຮອງປະທານກຸ່ມ AIF ໄດ້ກ່າວຈຸດປະສົງ ແລະໄດ້ເຊີນທ່ານ ນາງ ວິນຄໍາ ລຸນທອນ ຜູ້ອໍານວຍການໃຫຍ່ບໍລິສັດຂໍ້ມູນຂ່າວສານສິນເຊື່ອແຫ່ງ ສປປ ລາວ ຂຶ້ນນໍາສະເໜີຊຶ່ງກ່າວກ່ຽວກັບຄວາມເປັນມາຂອງວຽກງານຂໍ້ມູນຂ່າວ ສານສິນເຊື່ອໃນ ສປປ ລາວ, ພ້ອມທັງສະພາບການເຄື່ອນໄຫວ, ບັນດາຂໍ້ມູນ, ສະມາຊິກຂໍ້ມູນຂ່າວສານສິນເຊື່ອໃນແຕ່ລະໄລຍະ ແລະການເຮັດວຽກຂອງລະບົບໃນການເກັບກໍາຂໍ້ມູນ ແລະສະໜອງຂໍ້ມູນຂ່າວສານສິນເຊື່ອ, ນອກຈາກນັ້ນ, ກໍໄດ້ສະເໜີກ່ຽວກັບການເຮັດວຽກຮ່ວມກັນລະຫວ່າງບໍລິສັດ ຂໍ້ມູນຂ່າວສານສິນເຊື່ອແຫ່ງ ສປປ ລາວ ແລະ ບໍລິສັດ ບີເອສເຄ ລົງທຶນ ແລະ ບໍລິການຈຳກັດໃນການຄົ້ນຄວ້າສ້າງຜະລິດຕະພັນການໃຫ້ຄະແນນສິນເຊື່ອຂອງບຸກຄົນເພື່ອໃຫ້ສໍາເລັດພາຍໃນເດືອນມີນາ 2021 ນີ້.

  ພ້ອມນີ້, ທ່ານ ທິມ ເຊບແມນ ຜູ້ອໍານວຍການ ບໍລິສັດ ແອລທີເອສ, ຜູ້ຊ່ຽວຊານຊ່ວຍຄົ້ນຄວ້າຜະລິດຕະພັນໃຫ້ຄະແນນສິນເຊື່ອບຸກຄົນກໍໄດ້ນໍາສະເໜີໃຫ້ຮູ້ກ່ຽວກັບຄວາມສໍາຄັນຂອງວຽກງານຂໍ້ມູນຂ່າວສານສິນເຊື່ອທີ່ຈະຊ່ວຍໃຫ້ປະຊາຊົນ, ຜູ້ປະກອບການສາມາດເຂົ້າເຖິງສິນເຊື່ອໄດ້ງ່າຍຂຶ້ນ ແລະເຮັດໃຫ້ຫຼຸດຜ່ອນການເກີດໜີ້ທີ່ບໍ່ເກີດດອກອອກຜົນ (NPL) ໃນລະບົບເສດຖະກິດໃນ ສປປ ລາວ.

  ຈາກນັ້ນ, ກອງປະຊຸມສໍາມະນາກໍໄດ້ມີການຖາມ-ຕອບ ຮ່ວມກັນລະຫວ່າງຜູ້ເຂົ້າຮ່ວມ ແລະຜູ້ບັນຍາຍເພື່ອແລກປ່ຽນຄວາມຄິດເຫັນແບບສ້າງສັນ ແລະບັນຫາຕ່າງໆ ທີ່ຕິດພັນກັບວຽກງານຂໍ້ມູນຂ່າວສານສິນເຊື່ອຢ່າງມີບັນຍາກາດທີ່ຟົດຟື້ນ.

แชร์