ເມືອງງອຍ ສະຖານທີ່ທ່ອງທ່ຽວໄດ້ຮັບຄວາມນິຍົມ

 ແຂວງຫຼວງພະບາງ ນອກຈາກເມືອງຫຼວງພະບາງເມືອງມໍລະດົກໂລກແລ້ວກໍຍັງມີສະຖານທີ່ທ່ອງທ່ຽວຫຼາຍແຫ່ງທີ່ພວມໄດ້ຮັບຄວາມນິຍົມຊົມຊອບຈາກນັກທ່ອງທ່ຽວເປັນຕົ້ນແມ່ນເມືອງງອຍຊຶ່ງເປັນເມືອງທີ່ອ້ອມດ້ວຍພູຜາປ່າໄມ້ອັນຂຽວງາມ ແລະ ມີອາກາດທີ່ສົດຊື່ນສິ່ງນີ້ກາຍເປັນສິ່ງດຶງດູດນັກທ່ອງທ່ຽວໃຫ້ເຂົ້າມາທ່ຽວຊົມເປັນອັນ ດັບສອງຮອງຈາກເມືອງຫຼວງພະບາງ.

  ເມືອງງອຍ ຕັ້ງຫ່າງຈາກເທສະບານແຂວງຫຼວງພະບາງໄປທາງທິດເໜືອປະມານ 142 ກິໂລແມັດ, ປະຊາຊົນສ່ວນໃຫຍ່ແມ່ນຢຶດຖືອາຊີປະມົງ, ປູກຝັງ, ລ້ຽງສັດ,  ຄ້າຂາຍ ແລະການບໍລິການຈຳນວນໜຶ່ງດ້ານພື້ນຖານໂຄງລ່າງຂອງເມືອງໄດ້ມີການພັດທະນາດີຂຶ້ນເປັນກ້າວໆມາ, ປະຈຸບັນທົ່ວເມືອງມີສະຖານທີ່ທ່ອງທ່ຽວ 30 ກວ່າແຫ່ງໃນນີ້ມີສະຖານທີ່ທ່ອງທ່ຽວທາງດ້ານປະຫວັດສາດ, ທຳມະຊາດ ແລະວັດທະນະທຳ, ນອກນີ້ພາຍໃນເມືອງງອຍຍັງມີລີສອດ, ເຮືອນພັກ, ຮ້ານອາຫານ ແລະບໍລິ ສັດທ່ອງທ່ຽວນໍາອີກ. 

  ເພື່ອຮອງຮັບນັກທ່ອງທ່ຽວທີ່ນັບມື້ເພີ່ມຂຶ້ນທາງເມືອງຍັງໄດ້ພັດທະນາໃຫ້ມີການລ່ອງເຮືອທີ່ນໍ້າອູ, ມີການຂີ່ສະລິງ, ຍ່າງປ່າ ແລະປັບປຸງແຫຼ່ງທ່ອງທ່ຽວຖໍ້າຜາກວາງຕື່ມອີກ, ສະນັ້ນຫາກໃຜຍັງບໍ່ໄດ້ທ່ອງທ່ຽວເມືອງງອຍເມື່ອໄປຮອດເມືອງຫຼວງພະບາງແລ້ວກໍຢ່າລືມແບ່ງເວລາໄດ້ທ່ຽວຊົມ ເມືອງງອຍ (ໜອງຂຽວ, ພູຜາແດງ, ຖໍ້າຜາທອກ, ຜານາງນອນ, ຖໍ້າແກ້ວ ແລະ ຂີ່ເຮືອຂຶ້ນໄປຊົມທຳມະຊາດ ແລະແຫຼ່ງທ່ອງທ່ຽວຂອງເມືອງເກົ່າຮັບຮອງວ່າທ່ານຈະປະທັບໃຈ ແລະໄດ້ພາບງາມຕິດກ້ອງກັບບ້ານຢ່າງແນ່ນອນ. 

• 26/03/2021