ລັດຮັດສາຍແອວ ເພື່ອລາຍຈ່າຍບໍລິຫານຈາກ 14% ເຫຼືອ 11%

  ເພື່ອເປັນການແກ້ໄຂບັນຫາທີ່ສະສົມແຜນງົບປະມານ 5 ປີ ຄັ້ງທີ VIII ຜ່ານມາທີ່ຍັງມີບາງຄາດໝາຍຫຼຸດລົງ ແລະບາງຄາດໝາຍຍັງປະຄັບປະຄອງໃນຈັງຫວະທີ່ເສດຖະກິດມີຄວາມຫຍຸ້ງຍາກ ແລະ ເປັນການແກ້ໄຂຫຼຸດຜ່ອນອີກ 5 ປີຕໍ່ໜ້າກະຊວງການເງິນຈະປະຕິບັດມາດຕະການຮັດສາຍແອວ ຫຼືຫຼຸດລາຍຈ່າຍທີ່ບໍ່ຈຳເປັນລົງ ຊຶ່ງມັນຈະເຮັດໃຫ້ລາຍຈ່າຍບໍລິຫານຫຼຸດລົງຈາກ 14% ໃຫ້ເຫຼືອ 11%.

  ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນໄດ້ຊີ້ແຈງຕໍ່ກອງປະຊຸມສະພາວ່າ: ການຈັດຕັ້ງປະຕິບັດກະຊວງສຳລັບການສ້າງແຜນງົບປະມານແຫ່ງລັດ 5 ປີ ຄັ້ງທີ IX ແມ່ນເປັນແຜນສືບຕໍ່ແກ້ໄຂຄວາມຫຍຸ້ງຍາກເພື່ອປະຄັບປະຄອງ ແລະແກ້ໄຂບັນຫາທີ່ສະສົມທີ່ຜ່ານມາ,  ມັນມີຫຼາຍຕົວເລກຄາດໝາຍຖ້າທຽບໃສ່ແຜນງົບປະມານ 5 ປີ ຄັ້ງທີ VIII ຜ່ານມາແມ່ນຍັງມີບາງຄາດໝາຍຫຼຸດລົງ ແລະບາງຄາດໝາຍຍັງປະຄັບປະຄອງໃນຈັງຫວະທີ່ເສດຖະກິດຂອງພວກເຮົາມີຄວາມຫຍຸ້ງ ຍາກ.

  ໂດຍສະເພາະການສ້າງແຜນງົບປະມານ 5 ປີ (2021-2025) ນີ້, ທາງດ້ານລາຍຮັບ ແລະດ້ານລາຍຈ່າຍອີງໃສ່ຄຳຄິດເຫັນຂອງບັນດາ ສສຊ ທີ່ໄດ້ຕັ້ງບັນຫາວ່າການຂາດດູນງົບປະມານຂອງພວກເຮົາຄວນຢູ່ໃນລະດັບ 2% ແລະບໍ່ໃຫ້ເກີນ 3% ໃນຕະຫຼອດ 5 ປີ,ແຕ່ເງື່ອນໄຂຂອງພວກເຮົາມີການຂາດດູນ ແລະມີລາຍຈ່າຍເກີນດູນ, ດັ່ງນັ້ນ, ທາງກະຊວງການເງິນກໍຄືລັດຖະບານຈຶ່ງໄດ້ຕັດສິນໃຈສ້າງແຜນງົບປະມານຂຶ້ນເພື່ອໃຫ້ສົມດູນເທື່ອລະກ້າວ.

  ໃນປີ 2023 ເປັນຕົ້ນໄປ, ພວກເຮົາຈະພະຍາຍາມເຮັດໃຫ້ການສ້າງແຜນງົບປະມານສົມດູນເທື່ອລະກ້າວຊຶ່ງເຮັດໃຫ້ລາຍຈ່າຍສົມດູນກັບລາຍຮັບໝາຍຄວາມວ່າລາຍຮັບພາຍໃນໃຫ້ກຸ້ມຢູ່ພາຍໃນ, ສ່ວນຂໍ້ຄົງຄ້າງຜ່ານມາກໍແມ່ນລາຍຈ່າຍບໍລິຫານລັດຂອງພວກເຮົາແມ່ນຟຸມເຟືອຍທີ່ສຸດໂດຍສະເພາະແມ່ນຄ່ານໍ້າ,  ຄ່າໄຟຟ້າ, ຄ່າປະຊຸມສຳມະນາວຽກໂຄງການຕ່າງໆ ແລະ ຍັງຫຼາຍປັດໄຈທີ່ເຫັນວ່າບໍ່ຈຳເປັນ, ສະນັ້ນ, ພວກເຮົາຈຶ່ງຕ້ອງໄດ້ພ້ອມກັນປະຢັດດ້ວຍການປະຕິບັດມາດຕະການຮັດສາຍແອວຫຼື ຫຼຸດລາຍຈ່າຍທີ່ບໍ່ຈຳເປັນລົງຊຶ່ງຈະເຮັດໃຫ້ລາຍຈ່າຍບໍລິຫານຫຼຸດລົງຈາກ 14% ໃຫ້ ເຫຼືອ 11%.

   ສຳລັບດ້ານການເງິນແມ່ນຈະດຳເນີນການປະຕິຮູບຂະແໜງການເງິນຢ່າງຄົບຊຸດເຂົ້າສູ່ລວງເລິກຮອບດ້ານໂດຍສະເພາະປະຕິຮູບໂຄງສ້າງກົງຈັກການເກັບລາຍຮັບ-ລາຍຈ່າຍງົບປະມານແຕ່ສູນກາງຮອດທ້ອງຖິ່ນໃຫ້ມີປະສິດທິພາບເພື່ອແກ້ໄຂຈຸດອ່ອນຂໍ້ຄົງຄ້າງຜ່ານມາໃຫ້ເບົາບາງລົງ, ປະເມີນຜົນການຈັດຕັ້ງປະຕິບັດກົດໝາຍຂອງຂະແໜງການເງິນຄືນໃໝ່ເພື່ອຊອກໃຫ້ເຫັນອັນໃດຍັງເປັນຊ່ອງຫວ່າງໃນການຄຸ້ມຄອງລາຍຮັບ-ລາຍຈ່າຍງົບປະມານແລ້ວຮີບຮ້ອນປັບປຸງ ຫຼື ຍົກເວັ້ນປະຕິບັດບາງມາດ ຕາຂອງກົດໝາຍແນ່ໃສ່ຊຸກຍູ້-ສົ່ງເສີມການຜະລິດທຸລະກິດ ແລະສ້າງຖານລາຍຮັບໃໝ່ໃຫ້ໝັ້ນທ່ຽງ ແລະຍືນຍົງ, ປັບປຸງກົນໄກການຄຸ້ມຄອງລາຍຮັບ-ລາຍຈ່າຍງົບປະມານລະຫວ່າງສູນກາງ ແລະທ້ອງຖິ່ນເພື່ອຮັບປະກັນການປະຕິບັດວິໄນແຜນການ-ການເງິນໃຫ້ເຂັ້ມງວດ, ກຳນົດກົນໄກການຄຸ້ມຄອງເກັບລາຍຮັບ ແລະ ປະຕິບັດລາຍຈ່າຍງົບປະມານດ້ວຍການເພີ່ມທະວີວຽກງານກວດກາກວດກາຢ່າງເປັນປົກກະຕິເພື່ອແກ້ໄຂປາກົດການຫຍໍ້ທໍ້ໃຫ້ທັນກັບສະພາບການ.

แชร์