ຫຼວງນໍ້າທາ ຢືດສັດປ່າ 2 ຮ້ອຍກວ່າກິໂລ

  ວັນທີ 22 ມີນາ 2021 ທີ່ຫ້ອງປະຊຸມພະແນກກະສິກຳ ແລະປ່າໄມ້ ແຂວງຫຼວງນໍ້າທາ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດຂອງຄະນະປະສານງານເຄືອຂ່າຍບັງຄັບໃຊ້ກົດໝາຍວ່າດ້ວຍສັດນໍ້າ-ສັດປ່າຂັ້ນແຂວງພີເວນປະຈຳປີ 2020  ແລະທິດທາງແຜນການ 2021 ໂດຍການເປັນປະທານຂອງ ທ່ານ ພີມແກ້ວ ທຳລະສີນ ຫົວໜ້າພະແນກກະສິກຳ ແລະປ່າໄມ້ແຂວງ, ໃຫ້ກຽດເຂົ້າຮ່ວມຂອງທ່ານ ນາງ ຫຼອມຄຳ ແສງຈັນອຸດົມ ຮອງຫົວໜ້າກົມກວດກາປ່າໄມ້, ກະຊວງກະສິກຳ ແລະປ່າໄມ້, ມີຮອງປະທານກວດກາພັກ-ລັດແຂວງ, ຫົວໜ້າ-ຮອງກອງກວດກາປ່າໄມ້, ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

  ທ່ານ ໂພທິສັກ ຫົວໜ້າກອງກວດກາປ່າໄມ້ແຂວງໄດ້ຜ່ານຂໍ້ຕົກລົງຂອງທ່ານເຈົ້າແຂວງວ່າດ້ວຍການແຕ່ງຕັ້ງຄະນະຊີ້ນຳ ແລະຄະນະປະສານງານເຄືອຂ່າຍບັງຄັບໃຊ້ກົດໝາຍວ່າດ້ວຍສັດນໍ້າ-ສັດປ່າ ແລະກົດໝາຍວ່າດ້ວຍປ່າໄມ້ຂັ້ນແຂວງ, ຈາກນັ້ນທ່ານ ສີງແກ້ວ ພົມມະຈັນ ຮອງຫົວໜ້າກອງກວດກາປ່າໄມ້ແຂວງໄດ້ຕີລາຄາການ ຈັດຕັ້ງປະຕິບັດຂອງຄະນະປະສານງານເຄືອຂ່າຍບັງຄັບໃຊ້ກົດໝາຍວ່າດ້ວຍສັດນໍ້າ-ສັດປ່າຂັ້ນແຂວງພີເວນປະຈຳປີ 2020 ແລະທິດທາງແຜນການ 2021 ຍາດໄດ້ຜົນງານຫຼາຍດ້ານ.

  1 ປີຜ່ານມາໄດ້ສົມທົບກັບກົມກວດກາປ່າໄມ້, ອົງການ WWF ພ້ອມກັນລົງໂຄສະນາເຜີຍແຜ່ລະບຽບກົດໝາຍ, ຕ້ານ ແລະສະກັດກັ້ນ, ຢຸດການລ່າ, ຊື້-ຂາຍສັດ ນໍ້າ-ສັດປ່າ ແລະຜະລິດຕະພັນສັດປ່າ, ພືດປ່າທີ່ຫວງຫ້າມຢູ່ບັນດາເມືອງ, ດ່ານສາກົນ ແລະດ່ານທ້ອງຖິ່ນໄດ້ 3 ຄັ້ງ, ແຈກຢາຍແຜ່ນພັບ 2.000 ແຜ່ນ, ຕິດໂປຣສະເຕີ 200 ແຜ່ນ, ຕິດຕັ້ງປ້າຍໂຄສະນາ 3  ປ້າຍ, ລົງເຄື່ອນໄຫວລາດຕະເວນການລັກລອບລ່າເນື້ອຢູ່ເຂດ 3 ປະເພດປ່າ ແລະຄ້າຂາຍສັດປ່າຢູ່ຕາມຕະຫຼາດ, ເສັ້ນ ທາງ, ຮ້ານອາຫານ ແລະຮ້ານຂາຍເຄື່ອງ174 ຄັ້ງ, ມີ 764 ເທືອຄົນ, ຢຶດສັດປ່າໄດ້ 225,6 ກິໂລກຣາມ,ຫົວກະທິງ 7 ຫົວ, ແຂ້ວຊ້າງ 3 ແຂ້ວ, ຕີນໝີ 8 ຕີນ, ຕີນເຍືອງ 4 ຕີນ, ຊິ້ນສ່ວນກວາງ, ຕີນ, ຫົວໃຈ, ຫາງ ແລະເຂົາມີນໍ້າໜັກ42,5 ກິໂລກຣາມ, ຢຶດປືນແກັບໄດ້ 36 ກະບອກ, ລະດົມບໍລິສັດ,ບຸກຄົນ ແລະນິຕິບຸກຄົນທີ່ມີສັດປ່າປະເພດຫວງຫ້າມໄວ້ຄອບຄອງໂດຍບໍ່ໄດ້ຮັບອະນຸຍາດມີ 7 ໂຕ ໃນນັ້ນເມືອງລອງ 5 ໂຕ, ເມືອງສີງ 2 ໂຕ, ລວມນໍ້າໜັກ 89 ກິໂລ, ມອບໃຫ້ລັດໄປບໍາບັດແລ້ວປ່ອຍລົງສູ່ທຳມະຊາດ, ຢຶດສັດປ່າທີ່ຍັງມີຊິວີດມີລິງ 5 ໂຕ, ເຕົ່າ 3 ໂຕ, ອົ້ນ 17 ໂຕ, ງູສີງ ທອງ 19 ໂຕ ນໍ້າປ້ອຍສູ່ທຳມະຊາດ, ທຳລາຍຊິ້ນສ່ວນສັດ 2 ຄັ້ງ ມີ 327,6 ກິໂລແລະສຶກສາອົບຮົມ ແລະແກ້ຄະດີຕໍ່ບຸກຄົນທີ່ກະທຳຜິດຕໍ່ລະບຽບກົດໝາຍ ແລະວຽກງານອື່ນໆ.

  ສຳລັບທິດທາງແຜນການແມ່ນສືບຕໍ່ເຜີຍແຜ່ບັນດາລະບຽບກົດໝາຍວ່າດ້ວຍສັດນໍ້າ-ສັດປ່າ ແລະນິຕິກຳອື່ນໆທີກ່ຽວຂ້ອງ,ໃຫ້ບັນດາເມືອງ,ກຸ່ມບ້ານ, ບ້ານ ແລະໂຮງ ຮຽນ, ປະສານສົມທົບກັບຄະນະຊີ້ນຳພີເວນຂັ້ນແຂວງ, ບັນດາພະແນກການທີ່ກ່ຽວຂ້ອງຢູ່ຂັ້ນເມືອງຊ່ວຍໃນການຕິດຕາມການກວດກາ,ສະກັດກັ້ນບັນຫາການລັກລອມບຸກລຸກທຳລາຍປ່າ, ທີ່ດີນປ່າໄມ້, ເຄື່ອງປ່າຂອງດົງ, ການລ່າສັດນໍ້າ-ສັດປ່າ ແລະການຄ້າ-ຂາຍສັດປ່າ, ຊິ້ນສ່ວນສັດປ່າທີ່ຜິດຕໍ່ລະບຽບກົດໝາຍ.

ຂ່າວ: ມຸນຕີ

แชร์