ອາຫານແຊບຫ້ວຍຕຸ່ນ ຊະນະໃຈກຳມະການໃນເທສະການອາຫານທ້ອງຖິ່ນ

  ເພື່ອເປັນການສົ່ງເສີມການທ່ອງທ່ຽວ “ລາວທ່ຽວລາວ” ແລະການພັດທະນາວັດທະນະທຳທາງດ້ານການກິນ, ການດື່ມມີສຸຂະອະນາໄມເຮັດໃຫ້ການບໍລິການມີຄຸນນະ ພາບດີຂຶ້ນທັງເປັນການສືບທອດອາຫານທີ່ເປັນເອກະລັກຂອງບັນດາເຜົ່າທີ່ສືບທອດກັນມາ, ໃນວັນທີ 23 ມີນາ 2021, ຢູ່ເມືອງຄຳເກີດ ແຂວງບໍລິຄຳໄຊ ໄດ້ຈັດເທສະອາຫານທ້ອງຖິ່ນຂຶ້ນເປັນກຽດເຂົ້າຮ່ວມໂດຍທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ,ທ່ານ ອຸດອນ ສອນສຸລິນ ຫົວໜ້າພະແນກຖະແຫຼງຂ່າວ, ວັດທະ ນະທຳ ແລະທ່ອງທ່ຽວແຂວງ, ຜູ້ປະກອບການທຸລະກິດ, ເຮືອນພັກ-ຮ້ານອາຫານຕະຫຼອດຮອດປະຊາຊົນບັນດາເຜົ່າພາຍໃນເມືອງຄຳເກີດເຂົ້າຮ່ວມ.

  ງານເທສະການອາຫານທ້ອງຖິ່ນໃນຄັ້ງນີ້, ເປັນເມືອງທີ່ 2 ຂອງແຂວງບໍລິຄຳໄຊ ຖັດຈາກເມືອງປາກຊັນອາຫານກໍແມ່ນສິ່ງທີ່ເຮົາກິນ, ດື່ມໃນແຕ່ລະວັນເພື່ອລ້ຽງຊີບ ໂດຍມີລັກສະນະສົດ, ສຸກ, ດິບ ແລະໄດ້ຜ່ານຂະບວນການປຸງແຕ່ງມາແລ້ວ, ອາຫານກໍຄືເອກະລັກຢ່າງໜຶ່ງທີ່ບົ່ງບອກເຖິງຄວາມເປັນທ້ອງຖິ່ນຊຶ່ງແມ່ນສິ່ງໜຶ່ງທີ່ສ້າງຄວາມໜ້າສົນໃຈ ແລະ ສາມາດດຶງດູດນັກທ່ອງທ່ຽວທີ່ມາຢ້ຽມຢາມໃຫ້ຢາກຊິມລົດຊາດຂອງອາຫານ ເເລະ ຢາກຮຽນຮູ້ຄວາມເປັນທ້ອງຖິ່ນໂດຍສະເພາະກໍແມ່ນອາ ຫານທີ່ປຸງແຕ່ງຕາມຕົ້ນສະບັບ ຫຼື ຕາມສູດການປຸງແຕ່ງແບບດັ້ງເດີມທີ່ສືບທອດກັນມາແຕ່ປູ່ຍ່າຕານາຍຊຶ່ງແຕ່ລະທ້ອງຖິ່ນກໍມີຄວາມແຕກຕ່າງກັນເປັນຕົ້ນແມ່ນການຕົບແຕ່ງໜ້າຕາຂອງອາຫານ, ວັດຖຸດິບ, ສ່ວນປະກອບຕ່າງໆ ທີ່ນໍາມາປຸງແຕ່ງລວມເຖິງການເອີ້ນຊື່ເມນູອາຫານ, ແຕ່ສິ່ງໜຶ່ງທີ່ສໍາຄັນຕ້ອງປະຕິບັດດ້ວຍຄວາມເອົາໃຈໃສ່ນັ້ນກໍຄືຄວາມສະອາດໃນການປຸງແຕ່ງອາຫານໃນທຸກໆຄັ້ງ ແລະ ບົ່ງບອກເຖິງຄວາມອຸດົມສົມບູນຂອງອາຫານລາວທີ່ຄຽງຄູ່ກັບການດໍາລົງຊີວິດຂອງປະຊາຊົນລາວບັນດາເຜົ່າໃນແຕ່ລະທ້ອງຖິ່ນ.

  ສະເພາະເມືອງຄຳເກີດມີ 6 ບ້ານ ເທສະບານເມືອງ ແລະມີ 10 ຫົວໜ່ວຍທຸລະກິດຮ້ານອາຫານພາຍໃນເມືອງເຂົ້າຮ່ວມທັງໝົດມີ67 ເມນູທີ່ນໍາມາແຂ່ງຂັນ,ໃນນັ້ນມີທັງອາຫານຫວານ ແລະອາຫານຄາວ, ທີ່ໄດ້ນໍາວັດຖຸດິບມາປຸງແຕ່ງເພື່ອໃຫ້ຄະນະກໍາມະການ ແລະມວນຊົນໄດ້ຊິມລົດຊາດອາຫານແບບພື້ນບ້ານ, ແຕ່ລະເມືອງກໍໄດ້ສົ່ງຕົວແທນນຳເອົາເມນູອາຫານເຂົ້າຮ່ວມແຂ່ງຂັນເຊັ່ນ: ເມືອງປາກຊັນມີ 3 ເມນູຄື: ເຂົ້າຕົ້ມ ແຊບເມືອງປາກຊັນ, ເຂົ້າໜົມແຊບເມືອງປາກຊັນ, ແຈ່ວໂອດບອນບ້ານທົ່ງ; ເມືອງວຽງທອງ ມີ 2 ເມນູ: ເອາະໄກ່ໃສ່ໜໍ່ສານ, ເອາະປາສ້ອນ; ເມືອງທ່າພະບາດມີ 4 ເມນູ: ທອດປາແຫ້ງ, ເຂົ້າຕົ້ມໝູ, ແກງໜໍ່ຫວາຍ, ຈີ່ໜັງເຄັມແກ້ມເຫຼົ້າຂາວ; ເມືອງບໍລິຄັນມີ 3 ເມນູ: ປີ້ງໄກ່ລາດທາປາແດກ, ແຈ່ວໜໍ່ຫວາຍ, ໝົກປາແດກເຄື່ອງ-ລວກຜັກ; ເມືອງປາກ ກະດິງ 3 ເມນູ: ກ້ອຍປາ, ແກງປາ, ທອດປາແດກ  ແລະເມືອງໄຊຈຳພອນມີ  7 ເມນູ: ໝົກປາສ້ອນ, ອອບແອບປາມ້ອມ, ຕົ້ມໄກ່ດູກດໍາໃສ່ຫົວໂສມ, ປີ້ງປາພັບໃສ່ໝາກແຂ່ນ, ເອາະໄກ່ໃສ່ເຂົ້າຂົ້ວ, ຜັກລວກ, ຕົ້ມໜໍ່ໄມ້ຂົມ, ຜ່ານການຊີມລົດຊາດຈາກຄະນະກຳມະການສາມາດສະຫຼຸບໄດ້ດັ່ງນີ້: ອາຫານແຊບຖືກໃຈຂອງຄະນະກຳມະການ ແລະໄດ້ຕາມມາດຖານເງື່ອນໄຂ ອັນ ດັບ 1 ໄດ້ແກ່: ຮ້ານອາຫານຫ້ວຍຕຸ່ນຈາກເມືອງຄຳເກີດ, ອັນດັບ 2 ໄດ້ແກ່ບ້ານສົມສະນຸກ ແລະອັນດັບ 3 ໄດ້ແກ່ເມືອງໄຊຈຳພອນ,ສຳລັບປະເພດລາງວັນ: ທີ 1 ໄດ້ຮັບເງິນສົດ 1 ລ້ານກີບ, ອັນດັບ 2 ໄດ້ຮັບເງິນສົດ 8 ແສນກີບ ແລະອັນດັບ 3 ໄດ້ຮັບເງິນສົດ 6 ແສນກີບ.

ຂ່າວ: ວຽງສະຫວັນ

แชร์