5 ປີ ຄະດີເຂົ້າສານທຸກຂັ້ນ 44.521 ເລື່ອງ

  ໃນໄລຍະ 5 ປີ ຜ່ານມາສານປະຊາຊົນສູງສຸດໄດ້ຕິດຕາມກວດກາການປະຕິບັດການຕັດສິນຄະດີຕາມຂະບວນການຍຸຕິທຳໂດຍມີຄະດີເຂົ້າສານປະຊາຊົນ ແລະສານທະ ຫານທຸກຂັ້ນທັງໝົດ 44.521 ເລື່ອງ,ໃນນີ້,ມີຄະດີທີ່ຄ້າງມາ 1.606 ເລື່ອງ,ຊຶ່ງລວມທັງໝົດ46.127 ເລື່ອງ,ສາມາດແກ້ໄຂໄດ້ແລ້ວ 43.559 ເລື່ອງ, ເທົ່າກັບ 94.43%, ຍັງຄ້າງ 2.568 ເລື່ອງຖ້າທຽບໃສ່ 5 ປີກ່ອນເຫັນວ່າຄະດີເພີ່ມຂຶ້ນ.

  ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດກ່າວຕໍ່ກອງປະຊຸມສະພາວ່າ: ໃນຄະດີທັງໝົດສາມາດແຍກຄະດີເຂົ້າສານຂັ້ນຕົ້ນຢູ່ສານເຂດ, ແຂວງນະຄອນຫຼວງ ແລະສານທະຫານມີຈຳນວນ 37.454 ເລື່ອງ, ໃນນັ້ນ, ຄະດີຄ້າງ 1.177 ເລື່ອງ, ສາມາດແກ້ໄຂແລ້ວ36.599 ເລື່ອງເທົ່າ ກັບ 34,73% ຜ່ານການຕັດສິນຄະດີຂອງສານຂັ້ນຕົ້ນແລ້ວຄູ່ຄວາມບໍ່ພໍໃຈອຸທອນຂຶ້ນມາມີ 4.932 ເລື່ອງກວມເອົາ 13,47% ປະເພດຄະດີທີ່ເຂົ້າສານຫຼາຍ ແລະ ພົ້ນເດັ່ນແມ່ນຄະດີອາຍາ,ສານຂັ້ນຕົ້ນແມ່ນການລັກຊັບພົນລະເມືອງມີ 2.348 ເລື່ອງ ແລະຄະດີຄ້າຂາຍຢາເສບຕິດ 10.864 ເລື່ອງຖ້າທຽບໃສ່ 5 ປີກ່ອນເຫັນວ່າຄະດີແມ່ນເພີ່ມຂຶ້ນ.

  ສຳລັບທິດທາງລວມ, ຄາດໝາຍແຜນພັດທະນາວຽກງານຂອງສານປະຊາຊົນສູງສຸດ 5 ປີຕໍ່ໜ້າ (2021-2025) ແມ່ນເພີ່ມທະວີວຽກງານສຶກສາອົບຮົມການເມືອງແນວຄິດໃຫ້ພະນັກງານ-ລັດຖະກອນສານປະຊາຊົນສູງສຸດມີຄວາມເຊື່ອໝັ້ນຕໍ່ອຸດົມການຂອງພັກປະຕິບັດນະໂຍບາຍຂອງລັດແຕ່ລະໄລຍະ; ພັດທະນາກົງຈັກການຈັດຕັ້ງຂອງສານໃຫ້ມີຄວາມເຂັ້ມແຂງໜັກແໜ້ນຍົກລະດັບຄວາມຮູ້ຄວາມສາມາດທາງດ້ານເຕັກນິກວິຊາສະເພາະໃຫ້ຜູ້ພິພາກສາ ແລະ ພະນັກງານສານ; ຍົກລະດັບການພັດທະນາພື້ນຖານໂຄງລ່າງວັດຖຸເຕັກນິກເພື່ອຮັບປະກັນໃຫ້ແກ່ການຫັນເປັນທັນສະໄໝ; ສ້າງເງື່ອນໄຂອຳນວຍໃຫ້ປະຊາຊົນມີສ່ວນຮ່ວມໃນການດຳເນີນຄະດີ ແລະເຂົ້າເຖິງຂະບວນຍຸຕິທຳ, ບໍລິການຮັບໃຊ້ປະຊາຊົນເປັນທີ່ເພິ່ງທີ່ໄວ້ເນື້ອເຊື່ອໃຈຂອງປະຊາຊົນ; ສ້າງກົນໄກ ແລະປະສານສົມທົບຕິດຕາມກວດກາປະເມີນການປະຕິບັດໜ້າທີ່ຂອງພະນັກງານສານປະຊົນແຕ່ລະຂັ້ນໃຫ້ມີຄວາມຮັບຜິດຊອບຕໍ່ວຽກງານທີ່ໄດ້ຮັບມອບໝາຍເພື່ອຫັນເປັນຜູ້ພິພາກສາມີຄຸນນະພາບ,ພ້ອມທັງຍົກລະດັບຂອງຜູ້ພິພາກສາໃນແຕ່ລະຂັ້ນໃຫ້ມີຄຸນນະພາບສູງຫັນເປັນມືອາຊີບ ແລະມີຄຸນນະທຳປະຕິວັດທີ່ໜັກແໜ້ນ.

แชร์