ມອບ-ຮັບໜ້າທີ່ລັດຖະມົນຕີກະຊວງ ຮສສ

  ວັນທີ 24 ມີນາ ທີ່ເຮືອນຮັບແຂກກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ຈັດພິທີມອບ-ຮັບໜ້າທີ່ເລຂາຄະນະພັກ, ລັດຖະມົນຕີກະຊວງ ຮສສ ຜູ້ເກົ່າ ແລະຜູ້ໃໝ່ລະຫວ່າງທ່ານ ຄຳແພງ ໄຊສົມແພງ ເລຂາຄະນະພັກ,ລັດຖະມົນຕີກະຊວງ ຮສສ ຜູ້ເກົ່າ ແລະທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງ ຮສສ ຜູ້ໃໝ່ເຂົ້າຮ່ວມຂອງທ່ານ ນາງ ສີໃສ ລືເດດມູນສອນ ຫົວໜ້າຄະນະຈັດຕັ້ງສູນກາງພັກ, ພ້ອມດ້ວຍພະນັກງານຫຼັກແຫຼ່ງກ່ຽວຂ້ອງເຂົ້າຮ່ວມ.

  ທ່ານ ວຽນທອງ ສິງຄຳພັນ ຮອງຫົວໜ້າກົມຄຸ້ມຄອງພະນັກງານຄະນະຈັດຕັ້ງສູນກາງພັກໄດ້ຂຶ້ນຜ່ານເອກະສານຄຳສັ່ງຂອງກົມການເມືອງສູນກາງພັກວ່າດ້ວຍການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່ສະບັບເລກທີ 6 ລົງວັນທີ 24 ມີນາ 2021, ອີງຕາມມະຕິຕົກລົງຂອງກົມການເມືອງສູນກາງພັກສະບັບ ເລກທີ 031/ກມສພ, ລົງວັນທີ 20 ມັງກອນ 2018 ວ່າດ້ວຍວຽກງານຄຸ້ມຄອງພະນັກງານ, ອີງຕາມການຕົກລົງໃນກອງປະຊຸມຂອງກົມການເມືອງສູນກາງພັກ ແລະ ຄະ ນະເລຂາທິການສູນກາງພັກຄັ້ງວັນທີ 24-25 ກຸມພາ 2021, ອີງຕາມການເຫັນດີຮັບຮອງໃນກອງປະຊຸມຄົບຄະນະບໍລິຫານງານສູນກາງພັກຄັ້ງທີ II, ສະໃໝທີ XI ອີງຕາມໜັງສືສະເໜີຂອງຄະນະຈັດຕັ້ງສູນກາງພັກສະບັບ ເລກທີ 87/ຄຈສພ, ລົງວັນທີ 23 ມີນາ 2021 ກົມການເມືອງສູນກາງພັກອອກຄຳສັ່ງຍົກຍ້າຍ ສະຫາຍ ຄຳແພງ ໄຊສົມແພງ ເລຂາຄະນະພັກ, ລັດຖະມົນຕີກະຊວງ ຮສສ ໄປຮັບໜ້າທີ່ໃໝ່ຢູ່ກະຊວງອຸດສາຫະກຳ ແລະການຄ້າ, ຈາກນັ້ນກົມການເມືອງສູນກາງພັກຈຶ່ງໄດ້ຕົກລົງແຕ່ງຕັ້ງທ່ານ ນາງ ໃບຄຳ ຂັດທິຍະ ເປັນເລຂາຄະນະພັກລັດຖະມົນຕີກະຊວງ ຮສສ.

  ທ່ານ ນາງ ສີໃສ ລືເດດມູນສອນ ກ່າວວ່າ: ການຈັດພິທີມອບ-ຮັບໜ້າທີ່ຄັ້ງນີ້ມີຄວາມໝາຍສຳຄັນເພື່ອເປັນການຊັບຊ້ອນພະນັກງານການນຳຂັ້ນສູງໄປຮັບໜ້າທີ່ໃໝ່ເພື່ອໃຫ້ເໝາະສົມກັບສະພາບໃນປະຈຸບັນເພື່ອເປັນການບັນຊາວຽກໃຫ້ມີໝາກຜົນດີກວ່າເກົ່າ, ທັງນັ້ນເຊື່ອໝັ້ນວ່າການໄປຮັບໜ້າທີ່ໃໝ່ຂອງທ່ານ ຄຳແພງ ໄຊສົມແພງມີຄວາມເໝາະສົມເພື່ອເສີມຂະຫຍາຍບົດຮຽນໃນການບັນຊາວຽກງານໃນກະຊວງອຸດສາຫະກຳ ແລະການຄ້າໃຫ້ມີຜົນສຳເລັດ, ສຳລັບທ່ານ ນາງ ໃບຄຳ ຂັດທິຍະ ທີ່ໄດ້ຖືກມອບໝາຍໃຫ້ມາຮັບໜ້າທີ່ໃໝ່ໃນມື້ນີ້ເຫັນວ່າມີຄວາມສອດຄ່ອງເປັນພະນັກງານທີ່ໜຸ່ມແໜ້ນເປັນຜູ້ທີ່ມີຄວາມຮູ້-ຄວາມສາມາດ, ມີບົດຮຽນ, ປະສົບການເຊື່ອໝັ້ນວ່າເໝາະສົມໃນການບັນຊາເຮັດວຽກຮ່ວມກັບໝູ່ຄະນະເພື່ອສືບຕໍ່ເສີມຂະຫຍາຍເຮັດໃຫ້ວຽກງານແຮງງານມີຜົນສຳເລັດເປັນກ້າວໆ.

แชร์