ສູ້ຊົນສ້າງເສດຖະກິດຄອບຄົວດ້ວຍການເຮັດກະສິກຳແບບປະສົມປະສານ

  ການພັດທະນາເສດຖະກິດຄອບຄົວບໍ່ວ່າຈະເຮັດອາຊີບໃດກໍຕາມແມ່ນອີງໃສ່ຄວາມມັກຮັກ, ທ່າແຮງບົ່ມຊ້ອນຂອງແຕ່ລະຄົນ ແລະແຕ່ລະຄອບຄົວເພື່ອໃຫ້ມີລາຍຮັບທີ່ໝັ້ນຄົງໂດຍຈະເລີ່ມຈາກສູນຫາຮ້ອຍກໍມີຄວາມສຳເລັດໄດ້ຖ້າຫາກວ່າມີຄວາມດຸໝັ່ນ, ມີຫົວຄິດປະດິດສ້າງຫັນປ່ຽນຮູບແບບການຜະລິດຈາກຄອງເດີມພໍແຕ່ກຸ້ມກຸ້ມກິນໄປສູ່ການຜະລິດໃຫ້ໄດ້ຫຼາຍຂາຍເປັນສິນຄ້າດ້ວຍຮູບແບບການເຮັດກະເສດສຸມ ຫຼື ແບບປະສົມປະສານ, ແຕ່ສິ່ງສຳຄັນແມ່ນຜະລິດເພື່ອຂາຍໂດຍນຳໃຊ້ເຕັກນິກວິທະຍາ ສາດວິທະຍາການເຂົ້າຊ່ວຍຜົນຜະລິດໄດ້ຮັບປະກັນດ້າປະລິມານ ແລະຄຸນນະພາບຈຶ່ງມີຄວາມເຕີບໃຫຍ່ຂະຫຍາຍຕົວທັງຮັບປະກັນຄວາມຢືນຍົງຄືດັ່ງຄອບຄົວທ່ານໃນຟີນຕົວແບບຜະລິດກະສິກຳປະສົມປະສານ.

  ທ່ານ ໃນຟິນ ອາຍຸ 41 ປີ, ປະຈຸບັນຢູ່ບ້ານຜາຫຼວງ ເມືອງເຟືອງແຂວງວຽງຈັນ ໃນຄອບຄົວສະມາຊິກມີທັງໝົດ 11 ຄົນ, ແຮງງານ ມີ 6 ຄົນ ອາຊີບຕົ້ນຕໍແມ່ນເຮັດກະສິກຳ,ໃຫ້ຮູ້ວ່າ: ແຕ່ກ່ອນຄອບຄົວເຄີຍຖາງປາເຮັດໄຮ່ເລື່ອນລອຍ ແລະປູກໝາກເດື່ອອາໄສດິນຟ້າອາກາດຕາມລະດູການ,ເສດຖະກິດຄອບຄົວບໍ່ມີການຂະຫຍາຍຕົວຊີວິດການເປັນຢູ່ຂາດໆເຂີນໆ, ລາຍຮັບບໍ່ສົມດູນກັບລາຍຈ່າຍຄອບຄົວທຸກຍາກຫຼາຍ ແລະບໍ່ມີການພັດທະນາຈຶ່ງເຮັດຊີວິດການເປັນຢູ່ພົບຄວາມຫຍຸ້ງຍາກຫຼາຍສົມ ຄວນ;ມາຮອດປີ 2008 ຈຶ່ງໄດ້ເລີ່ມຫັນປ່ຽນແບບວິຖີການທຳມາຫາກິນຈາກທີ່ເຄີຍຖາງປ່າເຮັດໄຮ່ແບບອາໄສທຳມະຊາດເປັນຫຼັກມາລ້ຽງສັດຂາຍເປັນສິນຄ້າຕາມແນວທາງໂຍບາຍຂອງພັກ-ລັດວາງອອກ ກ່ຽວກັບການຍຸດຕິການຖາງປ່າເຮັດໄຮ່ຫັນມາເຮັດອາຊີບທີ່ໝັ້ນຄົງ, ຈາກນັ້ນ, ຂ້າພະເຈົ້າຈຶ່ງຕັດສິນໃຈຫັນມາເຮັດກະສິກຳໂດຍສະ ເພາະແມ່ນລ້ຽງສັດໂດຍໃຊ້ເນື້ອທີ່ດິນ 3 ເຮັກຕາ ເລີ່ມຕົ້ນທຳອິດແມ່ນໄດ້ຈົກໜອງປາ 1 ໜອງ,ຊື້ປາມານປະມານ 4 ໝື່ນໂຕ,ລ້ຽງໄກ່ລາດ 3.000 ໂຕ, ລົງທຶນ 30 ລ້ານກີບ, ມາຮອດປີ 2016 ເລີ່ມລ້ຽງໄກ່ພັນໄຂ່ຕື່ມໂດຍໄດ້ຊື້ນໍາບໍລິສັດ 99 ຢູ່ເມືອງໂພນໂຮງປະມານ 500 ໂຕ ໃນລາຄາໂຕລະ 25.000 ກີບເປັນ ເງິນທັງໝົດ 12.500.000 ກີບ ແລະໄດ້ຂະຫຍາຍໜອງປາຕື່ມອີກ 2 ໜອງ ຊຶ່ງພາຍຫຼັງລ້ຽງມາໄລຍະໜຶ່ງກໍເຫັນໄດ້ວ່າຊີວິດຄອບຄົວດີຂຶ້ນພໍ່ມີໃຊ້ມີຈ່າຍຈາກການຂາຍໄຂ່, ຂາຍໄກ່ ແລະປາ, ຈົນມາຮອດ ປີ 2019 ທາງອຳນາດ ການປົກຄອງເມືອງ ແລະບ້ານໄດ້ລົງມາໃຫ້ທິດຊີ້ນໍາໃຫ້ຂະຫຍາຍຟາມຕື່ມສະນັ້ນ,ຂ້າພະເຈົ້າໄດ້ຕັດສິນໃຈຂະຫຍາຍຟາມໄກ່ພັນເປັນ 3 ຫຼັງ, ຟາມໄກ່ລາດ 1 ຫຼັງ, ແຕ່ລະຟາມບັນຈຸໄກ່ ໄດ້ 250 ໂຕ; ລົງທຶນເຮັດຟາມ 50 ລ້ານກີບ ແລະໄດ້ຊື້ໄກ່ 1.000 ໂຕໆລະ 30.000 ກີບ, ເປັນເງິນ 30 ລ້ານກີບ, ໂດຍລົງທຶນທັງໝົດ 80 ລ້ານກີບ ປະຈຸບັນມີໄກ່ພັນໄຂ່ 3.300 ໂຕ, ແຕ່ລະມື້ເກັບໄຂ່ໄດ້ 93 ແຕະຂາຍລາຄາ 20.000 ກີບຕໍ່ແຕະຖ້າເຮົາເລາະສົ່ງຂາຍ 23.000 ກີບຕໍ່ແຕະ, ຈະມີໄຂ່ຢູ່ 3 ລຸ້ນ,ສະເລ່ຍແລ້ວຂາຍໄຂ່ແຕະໜຶ່ງ 20.000 ກີບ,ໄດ້ເງິນ 600.000 ກີບ ຕໍ່ມື້. ໂດຍໄດ້ສົ່ງໃຫ້ຂາປະຈໍາສະເລ່ຍ ລາຍໄດ້ຈາກການຂາຍໄຂ່ໄກ່ໄດ້ 2,5 ລ້ານກີບຕໍ່ເດືອນ,ຄິດເປັນປີໄດ້ 30 ລ້ານກີບຕໍ່ປີ, ສຳລັບກໍາໄລທີ່ໄດ້ດີແມ່ນຂາຍປາ ແຕ່ລະປີຂາຍປາໄດ້ 5-6 ໂຕນໆໜຶ່ງ 12 ລ້ານກີບ, ໄດ້ເງິນປະມານ 50-60 ລ້ານກີບຕໍ່ປີ, ເຮັດໃຫ້ຊີວິດການເປັນຢູ່ຂອງຄອບຄົວຫຼຸດພົ້ນອອກຈາກຄວາມທຸກຍາກ, ມີຢູ່ມີກິນ. ສ່ວນວິທີການບົວລະບັດຮັກສາແມ່ນ ບໍ່ມີຫຍັງຍາກຫຼາຍເພາະບໍ່ແມ່ນວຽກໜັກທີ່ບໍ່ສາມາດເຮັດໄດ້ພຽງແຕ່ເຮົາຕ້ອງໄດ້ໃກ້ຊິດຕິດແທດດູແລເບິ່ງແຍງ ແລະ ຕິດຕາມເບິ່ງແຕ່ລະມື້ເປັນຕົ້ນເວລາມັນຂີ້ບາງທີ່ເປັນຂີ້ຂາວ, ຂີ້ຂຽວ, ຖ້າວ່າມັນຂີ້ຜິດປົກກະຕິ, ບົວລະບັດ ຮັກສາໂດຍເອົາຢາມາປະສົມກັບນໍ້າໃຫ້ກິນຊຶ່ງພະຍາດທີມັກເກີດມີພະຍາດໜ້າບວມ, ໄກ່ເປັນໄອ; ສິ່ງສຳຄັນແມ່ນຕ້ອງຮູ້ວ່າໄກ່ແມ່ໄຂ່ສ່ວນຫຼາຍຈະສຸດໄຂ່ໃນໄລຍະ 18 ເດືອນ ສະນັ້ນ, ຕ້ອງຂາຍໄກ່ແມ່ໄຂ່ອອກແລ້ວຊຶ່ງຈະເອົາໄກ່ແມ່ໄຂ່ໄປສົ່ງຢູ່ຕະຫຼາດຢູ່ບ້ານຜາສັງສອງອາທິດປະມານ 1.000 ກວ່າໂຕ, ມື້ 100 ໂຕ ພໍ່ຄ້າແມ່ຄ້າຈະຮັບ ຊື້ຢູ່ຕະຫຼາດ ຊຶ່ງການຂາຍແມ່ນຂຶ້ນກັບໄລຍະຄື: ໄລຍະທີ່ປະຊາຊົນລົງນາຈະຂາຍໂຕລະ 30.000 ກີບ, ຄືໄລຍະທີ່ມີງານບຸນຕ່າງໆເປັນຕົ້ນງານບຸນກິນຈຽງຂາຍໂຕ 33.000 ກີບໂຕ, ໄລຍະຖືກສຸດແມ່ນລາຄາ 24.000 ກີບຕໍ່ໂຕ ສະເລ່ຍແລ້ວແມ່ນ 25.000 ກີບຕໍ່ໂຕ ພາຍຫຼັງຂາຍແລ້ວໄດ້ເງິນຢູ່ 25 ລ້ານກີບຕໍ່ງວດ. ສຳລັບໄກ່ລາດແມ່ນຂາຍເປັນກິໂລໆລະ 35.0000 ກີບ ໝົດປີໄດ້ເງິນປະມານ 40 ລ້ານກີບ, ນອກຈາກນັ້ນ, ຍັງໄດ້ລ້ຽງໝູລາດຕື່ມອີກ ແລະໄດ້ເງິນຈາກການຂາຍໝູລາດ 40 ລ້ານກີບຕໍ່ປີ ລວມທັງໝົດສາມາດສ້າງລາຍຮັບເຂົ້າຄອບຄົວ 180 ລ້ານກີບ,ເມື່ອຫັກຕົ້ນທຶນ,ຄ່າແຮງ ງານອອກຍັງມີກຳໄລ 95 ລ້ານກີບຕໍ່ປີ.

  ທ່ານ ໃນຟີນ ຍັງໄດ້ເວົ້າໃຫ້ຟັງຕື່ມອີກວ່າຜ່ານການສ້າງເສດຖະກິດຄອບຄົວຕາມແນວທາງນະໂຍບາຍຂອງພັກ-ລັດ, ຕາມທ່າແຮງ ແລະຄວາມສາມາດຂອງຕົນດ້ວຍການເຮັດ ກະສິກຳແບບປະສົມປະສານເປັນສິນ ຄ້າ ແມ່ນເຮັດໃຫ້ຄອບຄົວຂ້າພະເຈົ້າ ໄດ້ກາຍເປັນຄອບຄົວພັດທະນາຂອງບ້ານຜາຫຼວງ, ປະຈຸບັນມີເຮືອນວິນລາ 1 ຫຼັງ ແລະມີເຄື່ງໃຊ້ໄຟຟ້າຄົບຊຸດ ພາຍໃນເຮືອນ, ຊື້ລົດຈັກຮອນດາເວບ 100 ຈຳນວນ 6 ຄັນ, ມີເງິນໃຊ້ຈ່າຍ ພາຍໃນຄອບຄົວ, ມີເງິນປິ່ນປົວສຸຂະ ພາບໃນເວລາເຈັບເປັນ, ມີເງິນຝາກທະ ນາຄານ ແລະມີເງິນທຶນການສຶກສາໃຫ້ ລູກທັງໝົດນັ້ນແມ່ນຜົນສຳເລັດໃນ ການສ້າງເສດຖະກິດຄອບຄົວຂອງຂ້າ ພະເຈົ້າດ້ວຍເຮື່ອແຮງທີ່ບໍລິສຸດເຮັດ ໃຫ້ເຮົາຮູ້ຄຸນຄ່າຂອງເງິນກໍຈະຮູ້ໃຊ້ ຈ່າຍຢ່າງມີເຫດມີຜົນ, ສໍາລັບແຜນ ການຕໍ່ໜ້າຂ້າພະເຈົ້າຈະສືບຕໍ່ຂະ ຫຍາຍຟາມ ແລະໄກ່ຕື່ມອີກຖ້າຫາກວ່າສະພາບແວດລ້ອມອໍານວຍຄວາມສະດວກຈະດໍາກິດຈະການໄປເລື້ອຍໆ ເພື່ອຕອບສະໜອງກັບຄວາມຕ້ອງການຂອງຜູ່ບໍລິໂພກ ແລະຈະສູ້ຊົນໃຫ້ເປັນທີ່ຍອມຮັບຂອງຜູ້ບໍລິໂພກເພື່ອແນໃສ່ສ້າງລາຍຮັບເຂົ້າຄອບຄົວໃຫ້ຫຼາຍ ຂຶ້ນ.

  ທ່ານ ກິ່ງມະໂນ ສິນໂສດາ ປະຈຸບັນຮອງຫ້ອງການ-ການເງິນເມືອງເພືອງ ໄດ້ກ່າວຢັ້ງຢືນຕື່ມອີກວ່າ: ປະຈຸບັນຮັບຜິດຊອບພັດທະນາເຂດຈຸດສຸມຜາສັງລົງຊີ້ນໍາ 2 ບ້ານຄື: ບ້ານໂນນຫີນແຮ່ ແລະ ບ້ານຜາຫຼວງໜ້າທີ່ຫຼັກໆແມ່ນການແກ້ໄຂຄວາມທຸກຍາກຂອງປະຊາຊົນເພື່ອສ້າງເສດຖະກິດຄອບຄົວຕາມແນວທາງນະໂຍບາຍຂອງພັກ-ລັດວາງອອກ, ໃນນັ້ນບ້ານຜາຫຼວງແມ່ນບ້ານໜຶ່ງທີ່ນອນຢູ່ໃນ 10 ບ້ານຂອງເມືອງເຟືອງ, ປະຊາຊົນສ່ວນຫຼາຍໄດຢຶດຖືອາຊີບປູກຝັງ-ລ້ຽງສັດໂດຍສະເພາະຢູ່ບ້ານຜາຫຼວງ ມີຕົວແບບ 7 ຄອບຄົວ, ຄືຕົວແບບປູກ ຝັງ 3 ຄອບຄົວ ແລະຕົວແບບລ້ຽງ ສັດ 4 ຄອບຄົວ; ສຳລັບຄອບຄົວຂອງທ່ານ ໄນຟິນ ແມ່ນໜຶ່ງໃນຄອບຄົວຕົວ ແບບທີ່ໄດ້ຍຶດອາຊີບການລ້ຽງສັດແບບປະສົມປະສານ, ຂ້າພະເຈົ້າໃນນາມຕ່າງໜ້າອໍານາດການປົກຄອງຂອງບ້ານກໍຄືຂອງເມືອງຂໍຢັ້ງຢືນວ່າຄອບຄົວຜູ່ກ່ຽວເປັນຄອບຄົວດຸໝັ້ນກ້າເຮັດກ້າຕັດສິນໃຈ, ກ້າລົງທຶນ ແລະເປັນເຈົ້າການໃນການຮຽນຮູ້ເອົາສິ່ງ ໃໝ່ໆ ແລະຮູ້ໝູນໃຊ້ທ່າແຮງບົ່ມຊ້ອນທີ່ຕົນເອງມີວາງແຜນຊີວິດຄອບຄົວຢ່າງແທ້ຈິງ, ມີຄວາມຕັດສິນໃຈສູງຕໍ່ການສ້າງເສດຖະກິດຄອບຄົວທາງອຳນາດການປົກຄອງຂັ້ນເມືອງກໍໄດ້ລົງມາໃກ້ຊິດຕິດແທດ ແລະ ສາມາດຢັ້ງຢືນວ່າຄອບຄົວຂອງທ່ານໃນຟິນເປັນຄອບຄົວຕົວແບບທີ່ໄດ້ສູ້ຊົນທຳມາຫາກິນຕາມແນວທາງນະໂຍບາຍຈົນສາມາດຫຼຸດພົ້ນອອກຈາກຄວາມທຸກຍາກໄດ້ຢ່າງຊິ້ນເຊິງຢາກຮຽກຮ້ອງມາຍັງພໍ່ແມ່ປະຊາຊົນຢູ່ພາຍໃນບ້ານ, ໂດຍສະເພາະພາຍໃນເມືອງຖ້າວ່າທ່ານໃດຍັງບໍ່ມີທາງອອກ, ຍັງບໍ່ມີອາຊີບສາມາດມາແລກປ່ຽນບົດຮຽນນໍາຄອບຄົວຂອງຜູ່ກ່ຽວໄດ້ ຫຼືຈະຍຶດຖືອາຊີບໃດໜຶ່ງກໍຕ້ອງເຮັດແທ້ທໍາຈິງຮູ້ຈັກໝູນໃຊ້ເວລາໃຫ້ເກີດມີຄຸນຄ່າເພື່ອແກ້ໄຂຄວາມທຸກຍາກດ້ວຍຄວາມຕັດສິນໃຈສູງຕ້ອງເປັນເຈົ້າການແກ້ໄຂຄວາມທຸກຍາກຂອງຄອບຄົວຕົນເອງ.

ໂດຍ: ສິນທະວົງ ນາກກາລະສິນ

แชร์