ຫຼວງນໍ້າທາມີເນື້ອທີ່ປູກຝິ່ນເພີ່ມເກືອບ 40 ເຮັກຕາ

ທ່ານ ພັທ ອາລຸນຍະເດດ ບົວສີສະຫວັດ ຫົວໜ້າພະແນກກວດກາ ແລະຄວບຄຸມຢາເສບຕິດ ປກສ ແຂວງຫຼວງນໍ້າທາໄດ້ໃຫ້ຮູ້ໃນວັນທີ 22 ມີນາ 2021 ນີ້ວ່າ: ເພື່ອປະຕິບັດຕາມຄຳສັ່ງຂອງທ່ານນາຍົກລັດຖະມົນຕີ ສະບັບເລກທີ 36/ນຍ ວ່າດ້ວຍການເພີ່ມທະວີການຄວບຄຸມ,ສະກັດກັ້ນ ແລະຕ້ານຢາເສບຕິດ ແລະການປູກຝິ່ນ-ກັນຊາ, ໃນໄລຍະຜ່ານມາການນໍາຂັ້ນແຂວງ, ເມືອງ ແລະອົງການຈັດຕັ້ງທຸກພາກສ່ວນທີ່ກ່ຽວຂ້ອງໄດ້ໃຫ້ຄວາມສຳຄັນຕໍ່ກັບວຽກງານດັ່ງກ່າວ, ລົງຊຸກຍູ້ລະດົມຕໍ່ປະຊາຊົນຢູ່ບັນດາບ້ານເປົ້າໝາຍເພື່ອເຮັດໃຫ້ເຂົາເຈົ້າເຂົ້າໃຈຕໍ່ກັບບັນຫາ ແລະ ມີສ່ວນຮ່ວມໃນການທຳລາຍສວນຝິ່ນ, ເຈົ້າໜ້າທີ່ທຸກພາກສ່ວນກໍໄດ້ເອົາໃຈໃສ່ລົງເຄື່ອນໄຫວສຳ ຫຼວດກວດກາ ແລະເກັບກຳຂໍ້ມູນບັນດາຈຸດພື້ນທີ່ເປົ້າໝາຍເພື່ອກະກຽມລົງທຳລາຍ ແລະພະນັກງານທຸກສະຫາຍທີ່ໄດ້ຮັບການມອບໝາຍ ແລະແຕ່ງຕັ້ງຈາກຂັ້ນເທິງໄດ້ພ້ອມກັນຕັດສີນໃຈສູງເພື່ອສຸມໃສ່ທຸກກຳລັງເຫື່ອແຮງຈຶ່ງສາມາດເຮັດສຳເລັດໜ້າທີ່ແຕ່ກໍ່ຍັງມີປະຊາຊົນບາງກຸ່ມຍັງສືບຕໍ່ເຄື່ອນໄຫວລັກລອບປູກຕົ້ນຝິ່ນຢູ່ບັນດາເຂດຫ່າງໄກຊອກຫຼີກທີ່ເຈົ້າໜ້າທີ່ເຂົ້າຫາໄດ້ຍາກ.

   ທ່ານ ພັທ ອາລຸນຍະເດດ ບົວສີສະຫວັດ ຫົວໜ້າພະແນກກວດກາ ແລະ ຄວບຄຸມຢາເສບຕິດ ປກສ ແຂວງຫຼວງນໍ້າທາໃຫ້ຮູ້ຕື່ມວ່າ: ພາຍຫຼັງໄດ້ຮັບແຈ້ງການຈາກກົມໃຫຍ່ຕຳຫຼວດກະຊວງປ້ອງກັນຄວາມສະຫງົບແມ່ນໄດ້ສະເໜີຂໍທິດຊີ້ນຳຈາກກອງບັນຊາການ ປກສ ແຂວງເພື່ອອອກແຈ້ງການ ແລະລົງສົມທົບກັບບັນດາພາກສ່ວນທີ່ກ່ຽວຂ້ອງຂອງເມືອງຄື: ຫ້ອງວ່າການເມືອງ, ກອງບັນຊາການ ປກສ-ປກຊ ເມືອງ,ກອງກໍ່ສ້າງຮາກຖານ 914 ປະຈໍາເມືອງລອງ ແລະຄະນະພັກເຂດລວມທັງໝົດ 194 ສະຫາຍ, ໄດ້ເຄື່ອນໄຫວກວດກາ ແລະທຳລາຍສ່ວນຝິ່ນແຕ່ເດືອນມັງກອນຫາເດືອນກຸມພາ ປີ 2021.

  ໃນນີ້, ເມືອງວຽງພູຄາ ມີປະຊາຊົນລັກປູກຝິ່ນ 5 ບ້ານ, 41 ຄອບຄົວ, ສ່ວນຝິ່ນຈຳນວນ 78 ຕອນ ມີເນື້ອທີ່ທັງໝົດ 43,39 ເຮັກຕາ; ເມືອງສີງ ມີປະຊາຊົນລັກປູກຝິ່ນ 2 ບ້ານ, ມີ 6 ຄອບຄົວ, ສ່ວນຝິ່ນຈຳນວນ 6 ຕອນ ເນື້ອທີ່ທັງ ໝົດ 2,52 ເຮັກຕາ; ເມືອງນາແລ ມີປະຊາຊົນລັກປູກຝິ່ນ ມີ 2 ບ້ານ, ມີ 24 ຕອນ ເນື້ອທີ່ທັງໝົດ 12,7 ເຮັກຕາ; ເມືອງລອງ ມີປະຊາຊົນລັກປູກຝິ່ນ16 ບ້ານ, ມີ 142 ຄອບຄົວ, ສ່ວນຝິ່ນຈຳນວນ 183 ຕອນ, ເມືອງຫຼວງນໍ້າທາ ມີປະຊາຊົນລັກປູກຝິ່ນມີ 3 ບ້ານ, ມີ 2 ຄອບຄົວ, ສ່ວນຝິ່ນຈຳນວນ 6 ຕອນ ເນື້ອທີ່ທັງໝົດ 0,2994 ເຮັກຕາ, ລວມທົ່ວແຂວງມີປະຊາຊົນລັກປູກຝິ່ນຈຳນວນ 11 ກຸ່ມບ້ານ, 28 ບ້ານ, 191 ຄອບຄົວ, ສ່ວນຝິ່ນຈຳນວນ 297 ຕອນ, ມີເນື້ອທີ່ທັງໝົດ 145,939 ເຮັກຕາ ແລະ ໄດ້ທຳລາຍຖິ້ມ 100 ສ່ວນຮ້ອຍ, ເມື່ອທຽບໃສ່ໃນປີ 2019 ມີເນື້ອທີ່ສວນຝິ່ນເພີ່ມຂຶ້ນຈໍານວນ 39,879 ເຮັກຕາ ໃນທົ່ວແຂວງ, ຫຼັງຈາກໄດ້ສຳເລັດການທຳລາຍສວນຝິ່ນແລ້ວຄະນະຮັບຜິດຊອບໄດ້ສຶກສາອົບຮົມກ່າວເຕືອນຕໍ່ອົງການຈັດຕັ້ງຂອງບ້ານ,ເຈົ້າຂອງສວນຝິ່ນໃຫ້ເຂົາເຈົ້າໄດ້ຮັບຮູ້ເຂົ້າໃຈກ່ຽວກັບລະບຽບກົດໝາຍຕ່າງໆ ແລະໄດ້ສ້າງບົດບັນທຶກໄວ້ເພື່ອເປັນບ່ອນອີງ ແລະພ້ອມທັງແນະ ນຳໃຫ້ ປກສ ກຸ່ມບ້ານສົມທົບກັບອົງການຈັດຕັ້ງບ້ານຕິດຕາມເປົ້າໝາຍບໍ່ໃຫ້ປະຊາຊົນພາຍໃນບ້ານເຄື່ອນໄຫວລັກປູກຝິ່ນຄືນອີກ.

ຂ່າວ: ສົມພອນ ຂຸນດາວົງ

แชร์