ນັກຮຽນລາວຮັບອາຫານທ່ຽງ

   ໃນວັນທີ 23 ມີນາ 2021, ທີ່ໂຮງແຮມແລນມາກນະຄອນຫຼວງວຽງຈັນ ໄດ້ມີກອງປະຊຸມຊີ້ແຈງ ແລະວາງແຜນໂຄງການອາຫານທ່ຽງໃນໂຮງຮຽນ 2020-2025 ສະໜັບສະໜູນໂດຍກະຊວງກະສິກຳສະຫະລັດອາເມລິກາ, ໂດຍການເປັນປະທານຮ່ວມຂອງທ່ານ ນາງ ຂັນທະລີ ສິຣິພົງພັນ ຮອງລັດຖະມົນຕີກະຊວງສຶກສາທິການ ແລະກີລາ ແລະທ່ານ ຢານ ເດລບາເຣີ ຜູ້ຕາງໜ້າອົງການອາຫານໂລກປະຈຳ ສປປ ລາວ, ມີ ທ່ານ ປີເຕີ ແຮມ໋ອນ ເອກ ອັກຄະລັດຖະທູດສະຫະລັດອາເມລິກາ ປະຈຳລາວ, ພ້ອມດ້ວຍພາກສ່ວນກ່ຽວຂ້ອງ ແລະບັນດາຄູ່ຮ່ວມພັດທະນາເຂົ້າຮ່ວມ.

  ທ່ານ ນາງ ຂັນທະລີ ສິຣິພົງພັນ ໄດ້ກ່າວວ່າ: ກະຊວງສຶກສາທິການ ແລະກີລາກຳລັງສຸມໃສ່ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ແລະແຜນພັດທະ ນາຂະແໜງການສຶກສາທິການ ແລະກີລາ 5 ປີ ຄັ້ງທີ IX, ໂຄງການອາຫານທ່ຽງໃນໂຮງຮຽນໂດຍສອດຄ່ອງກັບບັນດາບູລິມະສິດຂອງລັດຖະບານລາວ ແລະໄດ້ປະກອບສ່ວນປັບປຸງຕົວຊີ້ວັດການສຶກສາ ແລະລາຢ່າງຕັ້ງໜ້າໂດຍສະເພາະແມ່ນເຮັດໃຫ້ອັດຕາເຂົ້າລວມຂອງເດັກນ້ອຍດ້ອຍໂອກາດໃນເຂດຈຸດສຸມຂອງກະຊວງສຶກສາທິການ ແລະກີລາດີຂຶ້ນເທື່ອລະກ້າວ, ເຮັດໃຫ້ອັດຕາປະລະ ແລະສຸຂະພາບໂດຍພື້ນຖານຂອງນັກຮຽນດີຂຶ້ນ, ຊຶ່ງໂຄງການດັ່ງກ່າວຍັງສືບຕໍ່ຂະຫຍາຍວຽກງານສົ່ງເສີມອາຫານທ່ຽງໃນໂຮງຮຽນໄປສູ່ເຂດໂຮງຮຽນໃໝ່ໃຫ້ນັກຮຽນຊັ້ນອະນຸບານ ແລະ ປະຖົມສຶກສາໃນ 18 ເມືອງບູລິມະສິດຂອງກະຊວງສຶກສາທິການ ແລະກີລາກໍຄືເຂດບູລິມະສິດຂອງລັດຖະ ບານເຊັ່ນດຽວກັນ, ຊຶ່ງເປັນໂຮງຮຽນທີ່ຍັງບໍ່ເຄີຍມີການສົ່ງເສີມວຽກງານອາຫານທ່ຽງໃນໂຮງຮຽນມາກ່ອນ.

  ໃນໂອກາດດັ່ງກ່າວ, ທ່ານ ປີເຕີ ແຮ ມ໋ອນ ໄດ້ກ່າວວ່າ: ໂຄງການອາຫານທ່ຽງໃນໂຮງຮຽນແມ່ນໂຄງການທີ່ດີທີ່ສຸດ ແລະມີປະໂຫຍດທີ່ສຸດໃນການສະໜັບສະໜູນ ສປປ ລາວ, ຊຶ່ງສອດຄ່ອງກັບບັນດາບູລິມະສິດຂອງລັດຖະບານລາວແລະລັດຖະບານສະຫະລັດອາເມລິກາກ່ຽວກັບວຽກງານອາຫານໃນໂຮງຮຽນ, ໂພຊະນາການ ແລະການສຶກ ສາໂດຍໄດ້ມີການຈັດຕັ້ງບັນດາກິດຈະກຳຕ່າງໆທີ່ກ່ຽວຂ້ອງກັບສຸຂະພາບທີ່ລວມທັງກິດຈະກຳອາຫານທ່ຽງໃນໂຮງຮຽນ, ນໍ້າສະອາດ,ສຸຂະອະນາໄມ,ການປຸກລະດົມຊຸມຊົນ, ການກໍ່ສ້າງພື້ນຖານໂຄງລ່າງກ່ຽວກັບວຽກອາຫານທ່ຽງໃນໂຮງຮຽນ ແລະການຮຽນຮູ້ໜັງສື.

แชร์