ສາມັກຄີໄຊ ເປີດຕະຫຼາດຊຸມຊົນຢູ່ບ້ານຮົມ

ຂ່າວ: ວັດທະນາ

  ເມື່ອອາທິດຜ່ານມານີ້ ເມືອງສາມັກຄີໄຊ ແຂວງອັດຕະປື ໄດ້ເປີດຕະຫຼາດຊຸມຊົນຢູ່ບ້ານຮົມພາຍໃຕ້ການສະໜັບສະໜູນຂອງໂຄງການຮ່ວມມືປັບປຸງໂພສະນາການເລັ່ງ ໃສ່ຜະລິດກະສິກຳໂພຊະນາການ ແລະສຸຂະພາບທີ່ດີຂອງອົງການສຸພານິມິດສາກົນປະຈໍາລາວ, ພິທີເປີດຕະຫຼາດຊຸມຊົນໄດ້ຈັດຂຶ້ນຢ່າງເປັນທາງການທີ່ບ້ານດັ່ງກ່າວໂດຍໃຫ້ກຽດເຂົ້າຮ່ວມມີ ທ່ານ ພິທູນ ມະວົງສາ ຮອງເຈົ້າເມືອງສາມັກຄີໄຊ, ທ່ານ ໄຊຍະລາດ ຊຸມພົນພັກດີ ຮອງຫົວໜ້າຫ້ອງວ່າການປົກຄອງແຂວງອັດຕະປື, ມີຕາງໜ້າອົງການສຸພານິມິດຕະຫຼອດຮອດອົງການຈັດຕັ້ງຂັ້ນບ້ານ ແລະພໍ່ແມ່ປະຊາຊົນພາຍໃນບ້ານຮົມເຂົ້າຮ່ວມ.

  ທ່ານ ພິທູນ ມະວົງສາ ຮອງເຈົ້າເມືອງສາມັກຄີໄຊ ໄດ້ກ່າວວ່າ: ການເປີດຕະຫຼາດຊຸມຊົນຢູ່ບ້ານຮົມໃນຄັ້ງນີ້ເປົ້າໝາຍສໍາຄັນກໍ່ຄືເພື່ອປະກອບສ່ວນໃນການພັດທະນາ ເສດຖະກິດຂອງບ້ານ, ເພື່ອເຮັດໃຫ້ຕະຫຼາດຊຸມຊົນແຫ່ງນີ້ໄດ້ກາຍເປັນຈຸດລິເລີ່ມຂອງບ້ານຮົມ ແລະ ບ້ານເຂດໃກ້ຄຽງໃນການແລກປ່ຽນຊື້-ຂາຍສິນຄ້າເຊິ່ງກັນ ແລະ ກັນ, ເປັນຈຸດເຕົ້າໂຮມສິນຄ້າທີ່ເປັນຜະລິດຕະພັນຕ່າງໆປະຊາຊົນພາຍໃນບ້ານ, ເປັນຈຸດເຕົ້າໂຮມຂອງບັນດາພໍ່ຄ້າແມ່ຄ້າ ແລະທັງເປັນຈຸດຮຽນຮູ້ໃຫ້ແກ່ພໍ່ແມ່ປະຊາຊົນເພື່ອການສົ່ງເສີມການຜະລິດເປັນສິນຄ້າໃຫ້ຫຼາຍຂຶ້ນ, ເຮັດໃຫ້ມີອາຫານການກິນທີ່ຫຼາກຫຼາຍ ແລະພຽງພໍຕະຫຼອດປີ, ພ້ອມທັງມີລາຍຮັບເຂົ້າສູ່ຄອບຄົວ.

  ຕະຫຼາດຊຸມຊົນ ບ້ານຮົມຕັ້ງຢູ່ ແຄມທາງຜ່ານໄປ ເມືອງສະໜາມໄຊ ເປັນຕູບຊັ້ນດຽວ, ກວ້າງ 4 ແມັດ, ຍາວ 8 ແມັດ, ສູງ3,5 ແມັດ, ມຸ້ງດ້ວຍກະສັງກະສີ ແລະໂຄງສ້າງຕູບເຮັດດ້ວຍໄມ້, ມີ 3 ຫ້ອງ, ມີເນື້ອທີ່ທັງໝົດ 2.500 ຕາແມັດ, ມີ ຫ້ອງຂາຍເຄື່ອງທັງໝົດ 3 ລ໋ອກ, ຕະຫຼາດຊຸມຊົນແຫ່ງນີ້ຈະກາຍເປັນບ່ອນຈຳໜ່າຍຜະລິດຕະພັນກະສິກຳ, ຊື້-ຂາຍແລກປ່ຽນ, ຂາຍສົ່ງ-ຂາຍຍ່ອຍ, ຮັບປະກັນຄວາມສົດໃໝ່, ທັງເປັນພື້ນທີ່ສະໜອງຜະລິດຕະພັນການກະເສດສີຂຽວແບບພື້ນບ້ານໂດຍອີງໃສ່ການຄ້າຂາຍຜະລິດຕະພັນກະສິກຳເປັນຫຼັກ, ເປັນບ່ອນຮອງຮັບສິນຄ້າ ແລະບໍລິການກິດຈະການຂອງບ້ານ.

  ໂອກາດດັ່ງກ່າວບັນການນໍາຂອງແຂວງ, ເມືອງ, ບ້ານໄດ້ພ້ອມກັນຕັດຖຽບຜ້າ ແລະເປີດປ້າຍເພື່ອນຳໃຊ້ຕະຫຼາດຊຸມຊົນຢູ່ບ້ານຮົມຢ່າງເປັນທາງການ.

แชร์