ໂຮງຮຽນເທບປັນຍາ ເນັ້ນຄຸນນະພາບການສຶກສາ

ຂ່າວ: ສີສຸວັນ

  ໂຮງຮຽນເທບປັນຍາເປັນໂຮງຮຽນເອກະຊົນອີກແຫ່ງໜຶ່ງທີ່ເນັ້ນຄຸນນະພາບການສຶກສາດ້ວຍຄຸນນະພາບເພື່ອພັດທະນານັກຮຽນໃຫ້ກາຍເປັນນັກຮຽນຮູ້,ຮຽນເກັ່ງນັບແຕ່ຕັ້ງໂຮງຮຽນມາເປັນປີທີ 7 ແລະ ໄດ້ນໍານັກຮຽນເກັ່ງຊັ້ນນ ປ5 ເຂົ້າສອບເສັງນັກຮຽນເກັ່ງລະດັບແຂວງເປັນປີທີ 5 ແລະ ສາມາດຍາດໄດ້ອັບດັບທີ 1, ທີ 2 ແລະທີ 3 ຂອງທຸກປີ.

  ທ່ານ ບົວພັນ ດວງພິຈິດ ຜູ້ອໍານວຍການໂຮງຮຽນເທບປັນຍາໃຫ້ສໍາພາດຕໍ່ທິມຂ່າວພວກເຮົາວ່າງບໍ່ດົນນີ້ວ່າ: ໂຮງຮຽນເທບປັນຍາຕັ້ງຢູ່ບ້ານໂພນສະຫວັນເຂດພັດທະ ນານໍ້າຖ້ວມເມືອງນໍ້າບາກແຂວງຫຼວງພະບາງນັບແຕ່ໄດ້ສ້າງຕັ້ງໂຮງຮຽນໃນປີ 2015 ແລະ ມີການຕອບຮັບຈາກພໍ່ແມ່ຜູ້ປົກຄອງທີ່ໄດ້ໃຫ້ຄວາມໄວ້ວາງໃຈໃນການສິດ ສອນຂອງໂຮງຮຽນ ແລະສົ່ງລູກຫຼານມາເຂົ້າໂຮງຮຽນນໍາທາງໂຮງຮຽນເທບປັນຍາຈຶ່ງໄດ້ຂະຫຍາຍໂຮງຮຽນອອກຕື່ມໜຶ່ງແຫ່ງຢູ່ເທສະບານເມືອງນໍ້າບາກ, ມາຮອດປະ ຈຸບັນຖືວ່າປັນປີທີ 7 ແລະເປັນຄັ້ງທີ 5 ທີ່ທາງໂຮງຮຽນໄດ້ສ້າງໃຫ້ມີນັກຮຽນເກັ່ງຫຼາຍນ້ອງທີ່ສາມາດເຂົ້າແຂ່ງຂັນເສັງນັກຮຽນເກັ່ງລະດັບຂັ້ນແຂວງ ແລະສາມາດຍາດ ໄດ້ອັບດັບທີ 1, ທີ 2 ແລະທີ 3 ຂອງທຸກປີ ແລະໃນປີ 2021 ນີ້ໄດ້ສົ່ງນ້ອງນ້ອຍ ປ5 ເຂົ້າແຂ່ງຂັນສອບເສັງ 3 ນ້ອງ ແລະໄດ້ 2 ນ້ອງ.

 ທ່ານກ່າວຕື່ມອີກວ່າສໍາລັບເປົ້າໝາຍຂອງໂຮງຮຽນເທບປັນຍາແມ່ນຕ້ອງໃຫ້ເປັນໂຮງຮຽນທີ່ໄດ້ຄຸນນະພາບ, ເປັນຕົວແບບໃນການສິດສອນໂດຍລົງເລິກໃຫ້ຄູສອນເອົາໃຈໃສ່ເປັນພິເສດໂດຍສະເພາະແມ່ນນັກຮຽນເກັ່ງຂອງໂຮງຮຽນຈະຕ້ອງໄດ້ບໍາລຸງໃຫ້ສາມາດເຂົ້າແຂ່ງຂັນລະດັບຂັ້ນແຂວງໄດ້ທຸກປີ ແລະໃນສົກຮຽນໜ້ານີ້ຕັ້ງເປົ້າໝາຍສົ່ງເຂົ້າສອບເສັງອີກ 3 ນ້ອງ ແລະຈະໃຫ້ໄດ້ 100%  ແລະໃນສົກຮຽນສິມານີ້ທາງໂຮງຮຽນເທບປັນຍາຈະເປີດໃຫ້ມີ ມ4 ສໍາລັບປີນີ້ແມ່ນໄດ້ເປີດ ມ3 ແລ້ວ, ຫຼັງຈາກທີ່ເປີດການຮຽນການສອນຊັ້ນ ມ4 ແລ້ວຈະສ້າງໃຫ້ມີນັກຮຽນເກັ່ງເພື່ອເຂົ້າແຂ່ງຂັນລະດັບຂັ້ນແຂວງຢ່າງຕໍ່ເນື່ອງ.

  ພ້ອມນີ້ທ່ານຜູ້ອໍານວຍການໂຮງຮຽນເທບປັນຍາຍັງໄດ້ສະແດງຄວາມຂອບໃຈມາຍັງຜູ້ປົກຄອງນ້ອງໆນັກຮຽນທີ່ໄດ້ໃຫ້ຄວາມໄວ້ເນື້ອເຊື່ອໃຈ,ໄວ້ວາງໃຈໃນການສິດສອນຂອງໂຮງຮຽນຕະຫຼອດມາ ແລະ ໃຫ້ພໍ່ແມ່ຜູ້ປົກຄອງໄວ້ໃຈໄດ້ເພາະທາງໂຮງຮຽນໄດ້ວາງລະບຽບການສິດສອນຢ່າງເປັນລະບົບ, ໃຫ້ການເບິ່ງແຍງເປັນພິເສດລວມເຖິງຄວາມປອດໄພແມ່ນມາເປັນອັນດັບໜຶ່ງເພື່ອໃຫ້ນ້ອງນັກຮຽນໄດ້ກາຍເປັນນັກຮຽນທີ່ໄດ້ຄຸນນຸພາບດີທີ່ສຸດ.

  ໂຮງຮຽນເທບປັນຍາມີພະນັກງານ ແລະຄູອາຈານສອນທັງໝົດ 55 ຄົນ ລວມທັງສອງແຫ່ງ ແລະແຫ່ງທີ 1 ມີຊັ້ນລ້ຽງເດັກອະນຸບານ 1; 2; 3 ແລະ ຊັ້ນປະຖົມ ປ1 ຮອດ ປ5 ແລະຊັ້ນ ມ ຕົ້ນ ມ1-ມ3 ແລະໃນປີໜ້າຈະເປີດ ມ4 ຕື່ມອີກ, ສ່ວນສາຂາສອງຢູ່ເທດສະບານ ເມືອງນໍ້າບາກ ມີຊັ້ນລ້ຽງເດັກອະນຸບານ, ຊັ້ນປະຖົມ ປ1 ຮອດ ປ5 ແລະໃນຕໍ່ໜ້າກໍຈະເປີດໃຫ້ມີຊັ້ນມໍຕົ້ນຕື່ມອີກ, ປັດຈຸບັນໂຮງຮຽນເທບປັນຍາລວມທັງສອງແຫ່ງມີນັກຮຽນທັງໝົດເກືອບ 800 ກວ່ານ້ອງ. 

 ສໍາລັບແຜນການໃນຕໍ່ໜ້າແມ່ນຈະໄດ້ປັບປຸງອາຄານໂຮງຮຽນນ້ອງໆນັກຮຽນນັບແຕ່ຂັ້ນອະນຸບານຈົນຮອດຊັ້ນ ມ ຕົ້ນ ແນໃສ່ໃນການອໍານວຍຄວາມສະດວກ ແລະການເພີ່ມຂຶ້ນຂອງນັກຮຽນໃນແຕ່ລະປີ.

แชร์