5 ປີ ລາວສົ່ງງົວອອກ ແລະຄວາຍ 17 ພັນໂຕ

ໃນລະຫວ່າງວັນທີ 16-17 ມີນາ 2021 ທີ່ຫ້ອງປະຊຸມຫ້ອງວ່າການປົກຄອງແຂວງສາລະວັນກົມແຜນການ ແລະການເງິນ,ກະຊວງກະສິກໍາ ແລະປ່າໄມ້ໄດ້ຈັດກອງປະຊຸມວຽກງານແຜນການຂອງຂະແໜງກະສິກຳ, ປ່າໄມ້ ແລະພັດທະນາຊົນນະບົດປະຈໍາປີ 2020 ແລະທິດທາງແຜນການໃນຕໍ່ໜ້າໃຫ້ກຽດເປັນປະທານຮ່ວມໂດຍທ່ານ ລິນຄໍາ ດວງສະຫວັນ ຮອງລັດຖະມົນຕີກະຊວງກະສິກໍາ ແລະປ່າໄມ້,ທ່ານ ສົມໃຈ ອຸ່ນຈິດ ຮອງເຈົ້າແຂວງໆສາລະວັນ,ມີບັນດາຫົວໜ້າ-ຮອງຫົວໜ້າກົມ, ຫົວ ໜ້າພະແນກ-ຮອງຫົວໜ້າພະແນກກະສິກໍາ ແລະປ່າໄມ້ແຂວງຈາກພາກກາງ-ພາກໃຕ້ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ລິນຄໍາ ດວງສະຫວັນ ກ່າວວ່າ:  ກອງປະຊຸມຄັ້ງນີ້ແມ່ນຈະໄດ້ພ້ອມກັນຄົ້ນຄວ້າລົງເລິກເບິ່ງບັນຫາໃຫ້ມີລັກສະນະຄົບຊຸດ ແລະບັນຫາໃນສາຍກ່ຽວພັນໃນການວາງແຜນລະຫວ່າງກະສິກຳ, ປ່າໄມ້, ພັດທະນາຊົນນະບົດ ແລະລຶບລ້າງຄວາມທຸກຍາກບົນພື້ນຖານການປ່ຽນແປງຄວາມຮັບຮູ້ເກົ່າໄປສູ່ການປ່ຽນແປງຈິນຕະນາການໃນການຄິດວາງແຜນ ແລະວິທີປະຕິບັດ,ຕີລາຄາສິ່ງທ້າທາຍຂອງວຽກງານແຜນການຂອງຂະແໜງການກະສິກຳ, ປ່າໄມ້ແລະພັດທະນາຊົນນະບົດເພື່ອໃຫ້ມີຄວາມເປັນເອກະພາບກັນຢ່າງສູງຕໍ່ແຜນພັດທະນາກະສິກຳ,ປ່າໄມ້ ແລະພັດທະນາຊົນນະບົດ 5 ປີຄັ້ງທີIX (2021-2025) ບົນພື້ນຖານການຕີລາຄາຢ່າງຮອບດ້ານ,ມີຄວາມເປັນເອກະພາບໃນການກຳນົດໂຄງປະກອບການຜະລິດກະສິກຳຂອງແຕ່ລະແຂວງໃຫ້ສອດຄ່ອງກັບແຜນລວມຂອງມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກກະຊວງກະສິກຳ ແລະປ່າໄມ້, ແຜນພັດ

  ທະເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຂອງລັດຖະບານ ແລະມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງ ທີ XI  ຂອງພັກປະຊາຊົນປະຕິວັດລາວ.

  ທ່ານ ສົມໄຊ ສີຊາຊົນ ຫົວໜ້າກົມແຜນການແຜນການ ແລະການເງິນ, ກະຊວງກະສິກໍາ ແລະປ່າໄມ້ກ່າວວ່າ: ການຄໍ້າປະກັນສະບຽງອາຫານໄດ້ສຸມໃສ່ການຜະລິດເຂົ້າພືດສະບຽງ, ເປັນຕົ້ນຕໍໃນນັ້ນ: ການຜະລິດເຂົ້າ 5 ປີຜ່ານມາປະຕິບັດໄດ້ສະເລ່ຍ 3,7 ລ້ານໂຕນຕໍ່ປີ, ພືດສະບຽງປະຕິບັດໄດ້ສະເລ່ຍ 2,3 ລ້ານໂຕນຕໍ່ປີ,ຖ້າທຽບໃສ່ແຜນການແມ່ນເພີ່ມຂຶ້ນ 10,3%, ເດັ່ນກວ່າໝູ່ແມ່ນໄມ້ໃຫ້ໝາກ 7,04 ແສນໂຕນ,ສາລີຫວານ 2,22 ແສນໂຕນ,ເຜືອກມັນ 2,61 ແສນໂຕນ,ພືດຜັກຕ່າງໆ 1,2 ລ້ານໂຕນ, ການຜະລິດພືດເປັນສິນຄ້າສາມາດປະຕິບັດໄດ້ 34 ລ້ານໂຕນ (ສະເລ່ຍ 6,8 ລ້ານໂຕນຕໍ່ປີ) ແລະ ມີມູນຄ່າການການສົ່ງອອກ 4 ຕື້ໂດລາ (ສະເລ່ຍ 0.8 ຕື້ໂດລາຕໍ່ປີ), ຖ້າທຽບໃສ່ຊຸມປີຜ່ານມາເພີ່ມຂຶ້ນ 2 ເທົ່າຕົວ, ການສົ່ງອອກສັດໃຫຍ່ປະເພດງົວ, ຄວາຍແມ່ນບັນລຸໄດ້ 17 ພັນໂຕນ ລື່ນແຜນການທີ່ວາງໄວ້ 15 ພັນໂຕນ ຫຼື 13% ມີມູນຄ່າລວມ 42 ລ້ານໂດລາ.

แชร์