ທຫລ ສັກວັກແຊງກັນພະຍາດໂຄວິດ

   ທະນາຄານແຫ່ງ ສປປ ລາວ (ທຫລ) ໄດ້ເປີດຂະບວນການສັກຢາວັກແຊງກັນພະຍາດໂຄວິດ-19 ໃຫ້ບຸກຄົນໃນກຸ່ມເປົ້າໝາຍທີ່ມີຄວາມສ່ຽງສູງຮອບທີ 1 ໃນລະຫວ່າງວັນທີ 17 ຫາ 20 ມີນາ 2021 ທີ່ໂຮງໝໍເມືອງຈັນທະບູລີ ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມ ແລະສັກວັກແຊງດັ່ງກ່າວຂອງ ທ່ານ ສອນໄຊ ສິດພະໄຊ ຜູ້ວ່າການ ທຫລ ພ້ອມດ້ວຍຄະນະຜູ້ວ່າການ ແລະພະນັກງານຈໍານວນໜຶ່ງໃນກຸ່ມທີ່ມີຄວາມສ່ຽງສູງ.

   ການສັກຢາວັກແຊງກັນພະຍາດໂຄວິດ-19 ຄັ້ງນີ້ແມ່ນປະຕິບັດຕາມແຜນວຽກງານອັນລະອຽດທີ່ກະຊວງສາທາລະນະສຸກວາງອອກໃນການໃຫ້ບໍລິການວັກແຊງດັ່ງກ່າວຢູ່ ສປປ ລາວ ເພື່ອຫຼຸດຜ່ອນການເຈັບເປັນ ແລະ ການເສຍຊີວິດຈາກການລະບາດຂອງພະຍາດນີ້ທັງເປັນການຫຼຸດຜ່ອນສະພາວະກົດດັນທາງສັງຄົມ ແລະເສດຖະ ກິດ, ຮັບປະກັນສືບຕໍ່ການໃຫ້ບໍລິການທີ່ຈໍາເປັນ, ລະບົບສາທາລະນະສຸກເຄື່ອນໄຫວເປັນປົກກະຕິ ແລະແຜນແບ່ງປັນຢາວັກແຊງກັນພະຍາດໂຄວິດ-19 ແລະການຕົກ ລົງເຫັນດີເປັນເອກະພາບຂອງຄະນະນໍາ ທຫລ ກໍ່ຄືຄວາມສະໝັກໃຈຂອງບຸກຄົນໃນກຸ່ມເປົ້າໝາຍທີ່ມີຄວາມສ່ຽງສູງໃຫ້ໄດ້ຮັບການສັກວັກແຊງດັ່ງກ່າວ ແລະທຸກຄົນມີສຸຂະພາບດີ, ເປັນພະນັກງານການນໍາ ແລະວິຊາການ ທຫລ ທີ່ໄດ້ຮັບການສັກຢາວັກແຊງຊີໂນຟາມຈາກ ສປ ຈີນ; ການໃຫ້ວັກແຊງໃນກຸ່ມທີ່ມີຄວາມສ່ຽງສູງຮອບທີ 1 ຂອງ ທຫລ ຄັ້ງນີ້, ບັນດາຄະນະແພດກໍ່ໄດ້ກວດ, ໃຫ້ຄຳແນະນໍາແກ່ຜູ້ທີ່ຮັບການບໍລິການວັກແຊງທັງກ່ອນຮັບ-ຫຼັງຮັບວັກແຊງໃນການປະຕິບັດຕາມເງື່ອນໄຂ ແລະ ຂໍ້ຫ້າມຕ່າງໆ ເພື່ອໃຫ້ໄດ້ຮັບຜົນດີໃນຕໍ່ໜ້າ.

  ທ່ານ ດຣ. ລັດສະໝີ ວົງຄໍາຊາວ ຮອງຫົວໜ້າກົມຄວບຄຸມພະຍາດຕິດຕໍ່ກະຊວງສາທາລະນະສຸກໄດ້ຖະແຫຼງຂ່າວໃນວັນທີ 14 ມີນາ2021 ວ່າ: ສໍາລັບການສັກຢາວັກແຊງກັນພະຍາດໂຄວິດ-19 ນີ້ແມ່ນແກ້ໄຂພາວະສຸກເສີນຈາກການລະບາດພະຍາດດັ່ງກ່າວຊຶ່ງໄດ້ສຸມໃສ່ກຸ່ມເປົ້າໝາຍເປັນບູລິມະສິດກ່ອນເປັນຕົ້ນພະນັກງານແພດໝໍ, ພະນັກງານປະຈໍາຢູ່ຊາຍແດນລວມທັງຜູ້ທີ່ເຮັດວຽກຢູ່ສູນຈໍາກັດບໍລິເວນນັບແຕ່ສູນກາງຮອດທ້ອງຖິ່ນ; ມາເຖິງປະຈຸບັນນີ້, ໄດ້ສັກຢາຮອບທີ 1 ໃຫ້ແກ່ບຸກຄົນກຸ່ມ ເປົ້າໝາຍຫຼາຍກ່ວາ 40.700 ຄົນ (ເປັນຕົວເລກທີ່ບັນທຶກໄວ້) ປະກອບດ້ວຍແພດໝໍ 13.500 ຄົນ, ພະນັກງານທີ່ເຮັດວຽກທີ່ມີຄວາມສ່ຽງ 22.791 ຄົນ, ຜູ້ເດີນອອກນອກປະເທດທີ່ມີຄວາມຈໍາເປັນ 625 ຄົນ, ອາຍຸສູງກວ່າ 60 ປີ 220 ຄົນ, ຜູ້ທີ່ມີພະຍາດປະຈໍາຕົວ 31 ຄົນ ແລະກຸ່ມອື່ນໆ 4.060 ຄົນ; ຜ່ານການສັກຢາວັກແຊງດັ່ງກ່າວທຸກຄົນບໍ່ມີຜົນຂ້າງຄຽງຫຍັງ, ມີປະສິດທິພາບ-ປະສິດທິຜົນສູງ.

ປະຈຸບັນ, ການຕິດເຊື້ອໃໝ່ໃນທົ່ວໂລກແມ່ນມີທ່າອ່ຽງຫຼຸດລົງໂດຍສະເພາະ ສປປ ລາວ ຍ້ອນວ່າລັດຖະບານ, ຄະນະສະເພາະກິດ, ເຈົ້າໜ້າທີ່, ແພດໝໍ ແລະປະຊາຊົນໄດ້ຮ່ວມມືສະກັດກັ້ນ, ຕ້ານ ແລະ ປ້ອງກັນພະຍາດດັ່ງກ່າວຢ່າງເຂັ້ມງວດ; ຂໍໃຫ້ທຸກຄົນສືບຕໍ່ປະຕິບັດ “ຢູ່ຫ່າງ-ລ້າງມື-ໃສ່ແພອັດປາກ” ກາຍເປັນກິດຈະວັດປະຈໍາວັນຂອງທຸກໆຄົນ; ໃນຂະນະນີ້ບັນດາແຂວງໃນທົ່ວປະເທດພວມເປີດຂະບວນການສັກຢາວັກຊີນ ກັນພະຍາດໂຄວິດ-19 ໃຫ້ກຸ່ມເປົ້າໝາຍທີ່ມີຄວາມສ່ຽງສູງຮອບທີ 1 ໃຫ້ເປັນຂະບວນຕາມແຜນຂອງກະຊວງສາທາລະນະສຸກ ແລະກໍ່ຈະມີການສັກວັກແຊງດັ່ງກ່າວ ຮອບທີ 2 ຕື່ມອີກໃນມໍ່ໆນີ້.

ຂ່າວ: ຣັດສະໝີ ດວງສັດຈະ

แชร์