ວິທະຍາໄລ ແສງສະຫວັນ ເປີດສອນຫຼັກສູດປະລິຍາຕີ

  ພິທີຖະແຫຼງຂ່າວຍົກຖານະວິທະຍາໄລບໍລິຫານທຸລະກິດແສງສະຫວັນຂຶ້ນເປັນສະຖາບັນທຸລະກິດແສງສະຫວັນ ແລະຮັບຮອງອະນຸມັດນໍາໃຊ້ຫຼັກສູດປະລິນຍາຕີໄດ້ຈັດຂຶ້ນໃນວັນທີ 1 ມີນາ 2019 ທີ່ສະຖາບັນທຸລະກິດແສງສະຫວັນ ບ້ານສີສະຫວາດ ເມືອງຈັນທະບູລີ ນະຄອນຫຼວງວຽງຈັນ.

 ທ່ານ ຄໍາແສນ ສີສະວົງ ປະທານກຸ່ມການສຶກສາ ແສງສະຫວັນ ກ່າວວ່າ: ກຸ່ມການສຶກສາ ແສງສະຫວັນ ໄດ້ຮັບການສ້າງຂຶ້ນໃນປີ 1998, ປະຈຸບັນລວມມີ ໂຮງຮຽນສອງພາສາ 3 ແຫ່ງ,ໂຮງຮຽນນານາຊາດ 1 ແຫ່ງ,ສະຖາບັນທຸລະກິດແສງສະຫວັນ 1 ແຫ່ງ (2 ວິທະນາເຂດ),ໂຄງການຮຽນນໍ້າເທີນສອງ 1 ໂຄງ ການ (ບໍລິຫານ ໂຮງຮຽນໃຫ້ບໍລິສັດນໍ້າເທີນ 2). ນອກ ຈາກນີ້ ຍັງໄດ້ຮ່ວມມືດ້ານວິຊາການ ແລະການບໍລິການວິຊາການ ກັບຫຼາຍ ສະຖາບັນຢູ່ຕ່າງປະເທດເຊັ່ນ: ມະຫະວິທະຍາໄລເດີະຊິດເຕີ, ບົວລະພາ, ຄິງມຸງກຸດ, ກຸງເທບທົດບູລີ, ສະຖາບັນເຕັກໂນໂລຊີວູຊີ, ສະຖາບັນທຸລະກິດ ມົງປາຮີເຢ້, ວິທະຍາໄລວິທະຍາ ໄລຕົງເລນ ໂປ້ ລີເຕັກນິກ.

  ສໍາລັບເງື່ອນໄຂການຍົກຖານະຈາກວິທະຍາໄລບໍລິຫານທຸລະກິດແສງສະຫວັນຂຶ້ນເປັນສະຖາບັນທຸລະກິດ ແສງສະຫວັນ ແລະຮັບຮອງອະນຸມັດນໍາ ໃຊ້ຫຼັກສູດປະລິນຍາຕີແມ່ນຍ້ອນເປັນວິທະຍາໄລທີ່ມີປະສົບການໃນການເປີດການຮຽນ-ການສອນມາກ່ອນແລ້ວ, ມີສະຖານທີ່ເໝາະສົມ, ມີອາຄານສະເພາະຈັດຮຽນທີ່ສະດວກສະບາຍ, ບຸກຄະ ລາກອນພຽງພໍ, ມີການພົວພັນຮ່ວມ ມືກັບພາຍໃນ ແລະຕ່າງປະເທດ ແລະ ເງື່ອນໄຂອື່ນໆອີກ. ສ່ວນຫຼັກສູດການ ເປີດການຮຽນ-ການສອນຂອງສະຖາບັນທຸລະກິດແສງສະຫວັນປະກອບດ້ວຍຊັ້ນສູງ 5 ຫຼັກສູດ ແລະປະລິນຍາຕີ 3 ຫຼັກສູດ, ໃນນັ້ນຊັ້ນສູງມີບໍລິຫານທຸລະກິດ (ມີລາວ ແລະສາກົນ), ການເງິນ, ການບັນຊີ, ຜູ້ປະກອບການ, ພາສາອັງກິດ; ສ່ວນປະລິນຍາຕີ 3 ຫຼັກສູດມີບໍລິຫານທຸລະກິດ,ຜູ້ປະກອບການ ແລະພາສາອັງກິດ. ນອກນີ້ຍັງມີຫຼັກສູດປະລິນຍາຕີຮ່ວມມືກັບມະຫາວິທະຍາໄລ FPT ສສ ຫວຽດນາມ ຊຶ່ງມີວິສະວະກໍາຊອບແວ ແລະການຄ້າອີເລັກໂຕຣ ນິກນໍາອີກ.

 ແນວໃດກໍດີສຳລັບຜູ້ທີ່ສົນໃຈການສຶກສາໃນລະດັບປະລິນຍາຕີສາຂາພາສາອັງກິດ-ທຸລະກິດ ແລະການສື່ສານແບບມີອາຊີບ, ປະລິນຍາຕີສາຂາບໍລິຫານທຸ ລະກິດສາກົນ ແລະປະລິນ ຍາຕີ ສາຂາຜູ້ປະກອບການ, ໂດຍສະ ຖາບັນທຸລະກິດແສງສະຫວັນໄດ້ຮັບ ອະນຸຍາດຢ່າງເປັນທາງການຈາກກະຊວງສຶກສາທິການ ແລະກີລາໄດ້ເປີດການຮຽນ-ການສອນໃນລະດັບປະລິນຍາຕີ, ໂດຍເລີ່ມສອບເສັງຄັດເລືອກໃນວັນທີ 4 ມີນາ ແລະເປີດເທີມໃໝ່ໃນວັນທີ 18 ມີນາ 2019 ນີ້, ຜູ້ທີ່ມີຄວາມສົນໃຈສາມາດຕິດຕໍ່ໄດ້ທີ່ສະຖາບັນທຸລະກິດແສງສະຫວັນສະຖານທີ່ຕັ້ງຢູ່ບ້ານສີສະຫວາດ ເມືອງຈັນທະບູລີ ນະຄອນຫຼວງວຽງຈັນ.

ຂ່າວ: ກິ່ງລັດຕະນະ-ນສພ ເສດຖະກິດ-ສັງຄົມ

แชร์