ແມ່ຂອງລົງທຶນ 111,6 ຕື້ກີບ ສ້າງໂຮງງານປຸງແຕ່ງໄມ້ປູກຄົບວົງຈອນ

ຂ່າວ: ກອງຄຳ 

 ພິທີວາງສີລາລືກກໍ່ສ້າງໂຮງງານປຸງແຕ່ງໄມ້ປູກຄົບວົງຈອນຂອງບໍລິສັດ ແມ່ຂອງປູກຕົ້ນໄມ້ ຈຳກັດ ຈັດຂຶ້ນໃນວັນທີ 16 ມີນາ 2021 ເປັນກຽດເຂົ້າຮ່ວມມີ ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້ກະຊວງກະສິກຳ ແລະ ປ່າໄມ້, ທ່ານ ບົວວັນ ວິລະວົງ ຫົວໜ້າກົມອຸດສາຫະກຳ ແລະ ຫັດຖະກຳກະຊວງອຸດສາຫະກຳ ແລະ ການຄ້າ, ທ່ານ ແອງ ກວ້າງມະນີວັນ ຜູ້ອຳນວຍການບໍລິສັດແມ່ຂອງປູກຕົ້ນໄມ້ ຈຳກັດ ພ້ອມດ້ວຍບັນດາທ່ານໃນຄະນະຊີ້ນຳກັບບໍລິສັດຂັ້ນແຂວງຄຳມ່ວນ, ບໍລິຄຳໄຊ, ບັນດາພະ ແນກການ, ເມືອງທີ່ກ່ຽວຂ້ອງຕະຫຼອດເຖິງພໍ່ແມ່ປະຊາຊົນເຂົ້າຮ່ວມ.

  ທ່ານ ແອງ ກວ້າງມະນີວັນ ຜູ້ອຳນວຍການບໍລິສັດແມ່ຂອງລາຍງານກ່ຽວກັບການຈັດຕັ້ງປະຕິບັດໂຄງການໃນໄລຍະຜ່ານມາ ໃຫ້ຮູ້ວ່າ: ບໍລິສັດແມ່ຂອງປູກ ຕົ້ນໄມ້ ຈຳກັດ ແມ່ນໄດ້ຮັບການສ້າງຕັ້ງຂຶ້ນໃນປີ 1999 ເປັນບໍລິສັດຮ່ວມທຸລະກິດປະສົມລະຫວ່າງລັດຖະບານລາວຖືຮຸ້ນ 15% ແລະນັກລົງທຶນຖືຮຸ້ນ 85%ເຊິ່ງລັດຖະບານລາວຈະສະໜອງເນື້ອທີ່ຂອງລັດໃຫ້ບໍລິສັດສຳປະທານໃນເນື້ອທີ່ 50 ພັນເຮັກຕາ ໃນໄລຍະການສຳປະທານ 50 ປີ (1999-2049) ໃນຂອບເຂດສຳປະທານ 2 ແຂວງຄື: ບໍລິຄຳໄຊ ແລະຄຳມ່ວນ ຕະຫຼອດໄລຍະການຈັດຕັ້ງປະຕິບັດໂຄງການຜ່ານມາໄດ້ມີການປ່ຽນຜູ້ຖືຮຸ້ນສ່ວນຕ່າງປະເທດມາແລ້ວ 3 ຄັ້ງຄື: ໄລຍະປີ 1999-2005 ແມ່ນບໍລິສັດບີຈີເອ ປູກຕົ້ນໄມ້ ຈຳກັດ, ໄລຍະປີ 2005-2017 ແມ່ນບໍລິສັດ ໂອຈິລາວ ແລະນັບແຕ່ວັນທີ 17 ມີນາ 2017 ເປັນຕົ້ນມາແມ່ນບໍລິສັດແມ່ຂອງປູກຕົ້ນໄມ້ ຈຳກັດ ພາຍໃຕ້ການບໍລິຫານ-ຈັດການ ໂດຍບໍລິສັດນິວ ຟໍເຣສທ ຈາກປະເທດອົສເຕຣຍ. 

   ມາຮອດປະຈຸບັນລັດຖະບານລາວໄດ້ສະໜອງເນື້ອທີ່ໃຫ້ແກ່ບໍລິສັດໄດ້ສຳຫຼວດ ແລະສຳປະທານແລ້ວຫຼາຍກວ່າ 24 ພັນເຮັກຕາ ໃນນັ້ນຢູ່ແຂວງບໍລິຄຳໄຊ 8.978 ເຮັກຕາ ແລະຄຳມ່ວນ 14.943 ເຮັກຕາ ໂດຍບໍລິສັດແມ່ນໄດ້ສົ່ງເສີມພໍ່ແມ່ປະຊາຊົນທີ່ຢູ່ອ້ອມຂ້າງປູກ ແລະບົວລະບັດຮັກສາສວນປູກເພື່ອສົ່ງເສີມວຽກເຮັດງານທຳແກ່ປະຊາຊົນ. ນອກນີ້ທາງບໍລິສັດຍັງໄດ້ປະກອບສ່ວນຊ່ວຍເຫຼືອທາງສັງຄົມກໍ່ຄືການສົມທົບທຶນພັດທະນາບ້ານເປັນເງິນຫຼາຍກວ່າ 13 ຕື້ກີບ ໃນການສ້າງທາງເຂົ້າບ້ານ, ເຈາະນໍ້າບາດານ, ສ້າງໂຮງຮຽນ, ໂຮງໝໍ-ສຸກສາລາ, ເອົາໄຟຟ້າລົງບ້ານ, ສະໜັບສະໜູນກອງທຶນບ້ານ, ສ້ອມແປງວັດ ແລະອື່ນໆ.

 ທ່ານ PetterSvensson ຫົວໜ້າພະແນກປຸງແຕ່ໄມ້ບໍລິສັດແມ່ຂອງກ່າວວ່າ: ໂຮງງານປຸງແຕ່ໄມ້ປູກຄົບວົງຈອນຂອງບໍລິສັດແມ່ຂອງແມ່ນຕັ້ງຢູ່ບ້ານດານຮີ ເມືອງຫີນບູນ ແຂວງຄຳມ່ວນ ໂດຍຈະໄດ້ເລີ່ມລົງມືການກໍ່ສ້າງໃນເດືອນມີນາ ແລະ ຄາດວ່າຈະໃຫ້ສຳເລັດການກໍ່ສ້າງໃນທ້າຍປີ 2021 ລວມມູນຄ່າການກໍ່ສ້າງທັງໝົດ 12 ລ້ານໂດລາສະຫະລັດ ປະມານ 111,6 ຕື້ກີບ ເຊິ່ງພາຍຫຼັງສຳເລັດການສ້າງຕັ້ງໂຮງງານຈະສາມາດປຸງແຕ່ງໄມ້ໄດ້ຫຼາຍກວ່າ 1,5 ແສນແມັດ ກ້ອນຕໍ່ປີພາຍໃນໂຮງ ງານແມ່ນປະກອບມີ 3 ໜ່ວຍງານຕົ້ນຕໍຄື: ເຄື່ອງຈັກຜະລິດໄມ້ຟານ (ລວມທັງເຕົາອົບ) ທີ່ສາມາດປອກໄມ້ໄດ້ 1 ແສນແມັດກ້ອນຕໍ່ປີ, ໂຮງເລື່ອຍທີ່ສາມາດເລື່ອຍໄມ້ໄດ້ 20 ພັນແມັດກ້ອນຕໍ່ປີ, ໂຮງງານໄມ້ບົດທີ່ສາມາດບົດໄດ້ 50 ແມັດກ້ອນຕໍ່ຊົ່ວໂມງ ແລະຈະສົ່ງຜົນໃຫ້ບໍລິສັດສ້າງລາຍຮັບເພີ່ມເປັນ 2 ເທົ່າ.

  ທ່ານ ຊູດຊາດ ໄຊຍະກຸມມານ ຫົວໜ້າກົມປ່າໄມ້ໄດ້ກ່າວວ່າ: ການສ້າງຕັ້ງໂຮງງານຂອງບໍລິສັດແມ່ຂອງກໍ່ເປັນໜຶ່ງໃນການສົ່ງເສີມການປູກຕົ້ນໄມ້ໂດຍສະເພາະແມ່ນເຮັດໃຫ້ປະຊາຊົນບັນດາ ແຂວງໃນເຂດເປົ້າໝາຍຂອງໂຄງການໄດ້ນຳໃຊ້ເນື້ອທີ່ດິນເປົ່າຫວ່າງປູກໄມ້,ສ້າງວຽກເຮັດງານທຳ, ສ້າງລາຍຮັບທີ່ໝັ້ນຄົງເພື່ອແກ້ໄຂຊີວິດການເປັນຢູ່ແກ່ພໍ່ແມ່ປະຊາຊົນໃນເຂດໃກ້ຄຽງ ແລະເພື່ອຫຼຸດຜ່ອນສະຖານະຂອງປະເທດໃນການສົ່ງອອກແຕ່ວັດຖຸດິບກ້າວມາເປັນຜູ້ສ້າງ, ຜູ້ຜະລິດ ແລະເປັນຜູ້ປຸງແຕ່ງເພື່ອເພີ່ມມູນຄ່າໄມ້ໃຫ້ສູງຂຶ້ນຕາມຈຸດປະສົງ ແລະນະໂຍບາຍຫຼັກຂອງລັດຖະບານ.

แชร์